¹ اگر خدا نے تُہاکوں مسیح وِچ زندہ کیتے تاں آسمانی شئیاں دی تلاش اِچ راہو جتھاں مسیح موجودہِے اَتے خدا دے سجے ہتھ بیٹھے۔ ² زمینی شئیاں دی بجائے آسمانی شئیاں دی تلاش اِچ راہو۔ ³ کیوں جو تُساں مر گئے تے تُہاڈی زندگی مسیح دے نال خدا اِچ لُکی ہوئی ہِے۔ ⁴ مسیح جو ساڈی زندگی ہِے۔ جڈاں ظاہر کیتا ویسی تاں وَل تُساں وی اوُندے نال جلال اِچ ظاہر کیتے ویسو۔ ⁵ پس تُساں حرامکاری، پلیدگی، شہوت پرستی، بُری خواہش، تے لالچ جو بت پرستی دے برابر ہِےکوُ ختم کرو۔ ⁶ کیوں جو اِنہاں چیزاں دی وجہ تھوں خدا دا غضب نافرمانی دے پُتراں تے نازل تھیندِے۔ ⁷ تُساں وی اِنہاں ہی چیزاں دے مطابق ٹُردے تے اِنہاں وِچ ہی زندگی گزریندے ہاوے۔ ⁸ لیکن اِنہاں ساریاں شئیاں یعنی غصہ، قہر، بدخواہی، بدگوئی، تے مُنہ تھوں مندے آکھنا چھوڑڈیوؤ۔ ⁹ ہک ڈوجھے نال کوُڑ نہ بولو، کیوں جو ہُن تُساں پُرانی انسانیت کوُ اپنے کماں سمیت لہا سَٹیا ہِے۔ ¹⁰ اَتے نویں انسانیت کوُ پا گِدے جیہڑی معرفت حاصل کرن کیتے اپنے بناون آلے دی صورت تے نویں بن دی ویندی ہِے۔ ¹¹ اِیں کیتے ہُن نہ کوُئی یونانی ریہا، نہ یہودی، نہ طہور آلا، نہ بغیر طہور دے، سکوتی، نہ وحشی، نہ غلام، نہ آزاد بلکہ مسیح ساریاں دے وِچ تے مسیح ہی سارا کجھ ہِے۔ ¹² پس خدا دے چُنے ہویاں آلی کار جو پاک تے پیارے ہِن درد مندی، مہربانی، فروتنی تے حِلم تے صبر دے کپڑے پاؤ۔ ¹³ اگر کئیں کوُ کئیں نال شکایت ہےِ تاں ہک ڈوجھے دی برداشت کرے اَتے ہِک ڈوجھےدے قصور معاف چا کرے، جیویں خداوند نے تہاکوں معاف کیتا ہِے تُساں وی معاف کرو۔ ¹⁴ اِنہاں ساریاں دے نال اوّل درجہ محبت دا ہِےجو کہ کاملیت دا پرناہِے بَدگِھنو۔ ¹⁵ مسیح دا اطمینان جئیں واسطے تُساں ہک بدن ہوون کیتے سَڈے گئے ہیوے تہاڈے دِلاں تے حکومت کرے اَتے تُساں شکر گزاری کیتا کرو۔ ¹⁶ خدا دا کلام تہاڈے وِچ بہوں زیادہ کم کرے تے تُساں کمال حکمت نال ہک ڈوجھے کوُ تعلیم تےنصیحت کرو، اپنے دِلاں وِچ فضل دے نال خدا کیتے مزامیرتے گیت تے روحانی غزلاں گایا کرو۔ ¹⁷ اَتے جو وی کلام یا کم تُساں کریندے ہیوے اوہ ساراکجھ خداوند یسوع دے ناں تھوں کیتا کرو اَتے خدا باپ دا یسوع مسیح دے وسیلے نال شکر کرو۔ ¹⁸ اِے ذالو! اپنے پئیاں دی تابع راہوکیوں جو ایہہ خداوند اِچ مناسب ہِے۔ ¹⁹ اِے پئیو! اپنی ذالاں نال محبت رکھو تے اُنہاں نال تلخ مزاجی نہ کرو۔ ²⁰ اِے اولادو! اپنی ماں تے پیو دے فرماں بردار راہوکیوں جو ایہہ خدا کوُ پسند ہِے۔ ²¹ پیو اپنے بالاں کوُ غصہ نہ ڈیواون تاں جو اُنہاں دا حوصلہ قائم راہوے۔ ²² اِے نوکرو! جو جسمانی طور تے تہاڈے مالک ہِن ساریاں گالہیں وِچ اُنہاں دے تابع راہو اَتے لوگاں کوُ خوش کرن آلیاں دی کار ڈِکھاوےکیتےنئیں بلکہ صاف دِلی تے خدا دے خوف نال۔ ²³ جیہڑا وی کم کرو جی نال کرو تے ایہہ جان کے کہ خداوند کیتے کریندے ہو نہ کہ لوگاں کیتے۔ ²⁴ تُساں جان دے ہیوے کہ میراث اِچ خدا تھوں اجر پاسو کیونکہ تُساں خداوند مسیح دی خدمت کریندے ہو۔ ²⁵ کیونکہ جو بُرا کریندے اُوں کوُ اپنی بُرائی دابدلہ مِلسی۔ اُتھاں کئیں دی طرفداری نئیں۔