¹ میں تہاکوُ ڈسنا چاہندا ہاں کہ جو لودیکیہ وِچ ہِن تے بہوں سارے جو میکوُ جسمانی طور تے نہ ڈیکھ سگے اُنہاں کیتے میں کتنی جانفشانی کریندا ہاں۔ ² تاں جو اُنہاں دے دِل محبت اِچ کٹھے راہون تےتسلی مِلے تے پوری سمجھ دی سا ر ی دولت کوُ حاصل کرن اَتے خدا دے بھید یعنی مسیح کوُ سُنجانن۔ ³ ساری حکمت تے علم دے خزانے اوُں دے وِچ لُکے ہوئے ہِن۔ ⁴ میں تہاکوں ایں کیتے ڈسیندا ہاں جو کوُئی بندہ تہاڈے دِل کوُ اپنے پاسے کرن آلیاں گالہیں سُنا کے دھوکا نہ ڈیوے۔ ⁵ میں جسمانی طور تے نئیں بلکہ روحانی طور تے تہاڈے نال ہاں اَتے میں ایہہ جان کے خوش ہاں جو تُساں چنگی حالت اِچ ہیوے، مسیح ہسوع وِچ تہاڈا ایمان مضبوط ہِے۔ ⁶ خداوند یسوع مسیح اِچ تُساں اوُں طرح چلدے راہو جیویں تُساں اوُں کوُ قبول کیتے۔ ⁷ اوُندے وِچ جَڑ پکڑو، اوُندے وِچ ہی مضبو تھی کے ایمان وِچ ترقی کریندے ونجو۔ جیوں تُساں تعلیم پاتی ہِے اَتے خوب شکر گزاری کیتا کرو۔ ⁸ خبردار! کوئی تہاکوُ نکمے فلسفے دے پاروں جو انسانی رسماں تے ایں دُنیا دے اصولاں تے مبنی ہِےنہ کہ مسیح دے موافق۔ ⁹ کیوں جو خدا دی الوہیت دی ساری معموری اوُندے وِچ مجسم تھی کے راہندی ہِے۔ ¹⁰ تُساں اوُندے وِچ بھریج گئے ہیوے جو سارے اختیار تے حکومت دا سَر ہِے۔ ¹¹ تہاڈا طہوراوُندے وِچ ایہو جیا تھیا جو ہتھ نال نئیں تھیندایعنی مسیح دا طہورجیہڑا جسمانی بدن تھوں لہا کے کیتا ویندے۔ ¹² اَتے اوُں بپتسمہ دے نال دفن تھی گئے پر خدا دی طاقت تے ایمان گھن آون نال زندہ تھئے جئیں اوُں کوُ مُردیاں وِچوں زندہ کیتے۔ ¹³ جڈاں تُساں طہور دے بغیر گناہاں دے پاروں مُردہ ہاوے، اوُں نے تُہاکوُ زندہ کیتےاَتے ساڈے سارے گناہ معاف کر ڈِتے۔ ¹⁴ حکم جیہڑے ساڈے ناں تے ساڈے خلاف لکھے ہوئے ہَن اوُں نے صلیب تے کِلاں نال ٹھوک کے اوُں کوُ ختم کر ڈِتے۔ ¹⁵ اوُں نے حکومت تے اختیار والیاں کوُ سرعام تماشا بنا ڈِتے اَتے اوُں نے اُنہاں ساریاں تے صلیب دے ذریعے فتح حاصل کیتی۔ ¹⁶ پس کوُئی وی تُہاڈے تے کھاون پیون، عید، نویں چند یا سبت دے پاروں الزام نہ لاوے۔ ¹⁷ کیوں جو ایہہ آون آلی ساری شئیاں د ا سایہ ہِے پر حقیقت اِچ ایہہ مسیح دیاں ہِن۔ ¹⁸ کوُئی وی بندہ عاجزی تے فرشتیاں دی عبادت پسند کر کے تہاکوُ دوڑ دے انعام تھوں محروم نہ رکھے۔ ایہو جیا بندہ ظاہر ی چیزاں اِچ مصروف راہندا ہِے اَتے جسمانی سوچ دی وجہ تھوں فخر کریندا ہِے۔ ¹⁹ اَتے اوُہ سر کوُ پکڑے نئیں راہندا جیندے تھوں سارا بدن پٹھیاں تے جوڑاں دے ذریعے قابو اِچ راہندا تے ودھدا ہِے اَتے جیویں خدا بدن کوُ ودھاندا ہِے۔ ²⁰ اگر تُساں مسیح دے نال دُنیا دی شروع دیاں گالہیں دی طرفوں مَر گئے تاں وَل اُنہاں دی کار جیہڑے دُنیااِچ زندگی گزریندے پئین انسانی حکماں تے تعلیم دے مطابق ایہو جئے قاعدے دے کیوں پابند تھیندِن؟ ²¹ نہ ای اِیں کو پکڑنا، ناں ای اوُں کوُ چکھنا تے نہ ای اوُں کوُ ہتھ لاونا۔ ²² کیوں جو ایہہ ساریاں شئیاں استعمال دے نال تباہ تھی ویسن۔ ²³ اِنہاں حکماں وِچ اپنی بنائی ہوئی عبادت تےعاجزی تے جسمانی مشقت دے اعتبارنال حکمت دی صورت تاں ہِے پر جسمانی خاہشاں دے روکن اِچ اِنہاں کولوں کجھ فائدہ نئیں تھیندا۔