¹ ۱۔ تد یشُوع نے بنی روبن ، بنی جد تے منسی دے اِدھے گھرانے نوں صدیا۔ ² ۲۔ تے اوناں نوں آکھیا خداوند دے خادم موسیٰ نے تہانوں جہڑے حکم دِتے سن اوناں ساریاں تے تُسی عمل کیتا تے میرے سارے حکماں نوں وی تُسی منیا۔ ³ ۳۔ ایس لمے ویلے وِچ اِج دے دن تیک تُسی آودے بھراواں نوں نیں چھڈیا سگوں جہڑی خدمت تہاڈے خداوند نے تہانوں دِتی اونوں پورا کیتا۔ ⁴ ۴۔ ہون جدوں کہ خداوند تہاڈے خدا نے تہاڈے بھراواں نوں آودے وعدے دے مطابق آرام دِتا اےتُسی اوس ملک وِچ جہڑا خداوند دے خادم موسیٰ نے یردن دے اوس پار تہانوں دِتا اے اپنے اپنے گھراں نوں مُڑ جاوٰ۔ ⁵ ۵۔ پر خیال رہےکہ تُسی اوناں حکماں تے شریعت تے ہمشاں عمل کردے رہنا جہڑے خداوند دے خادم مو سیٰ نے تہانوں دِتےنے تے خداوند آودے خدا نال محبت رکھنا تے اوھدی ساریاں راھواں تے ٹرنا تے اوھدے حکماں نوں مننا۔ اوھدے نال چمڑے رہنا تے آودی سارے دل تے آودی ساری جان دے نال اوھدی خدمت کرنا۔ ⁶ ۶۔ تد یشُوع نے اوناں نوں برکت دِتی تے اوناں نوں گھل دِتا تے او آودے گھراں نوں ٹر گےٗ۔ ⁷ ۷۔ منسی دے اِدھےگھراں نوں مو سیٰ نے بسن وِچ ملک دِتا سی تے دوجے اِدھے گھراںنوں یشُوع نے یردن دے لیندے ول اوناں دے بھراواں دے نال ملک دِتے سن۔ جد یشوع نے:اوناں نوں گھلیا تے اوناں نوں ایہہ کہہ کے برکت دِتی کہ ⁸ ۸۔ تُسی وڈی دولت یعنی وڈے وڈے گلے ، چاندی ، سونا ، پیتل تے لوہا تے بوہت سارے پاون والے نال لے کے آودے گھراں نوں مُڑو تے آودے دشمناں توں لیا ہویا سامان نوں آودے بھراواں دے نال ونڈ لو۔ ⁹ ۹۔ تد بنی روبن ، بنی جد تے بنی منسی دے اِدھے گھراں نوں ملک کنعان دے سیِلاہ دے مقام اوتے بنی اسرائیل توں اجازت لئی تاں جے او خود آودے ملک جلعاد نوں مُڑن جہناں نوں اوناں نے مو سیٰ وِلوں دِتے ہوےٗ خداوند دے حکم دے مطابق حاصل کیتا سی۔ ¹⁰ ۱۰۔ جد او یردن دے کول کنعان دے ملک وِچ جیلِلَوت دی تھاں او تے آےٗ تے بنی روبن ، بنی جد تے منسی دے اِدھے گھرانے نے اوتھے یردن دے کنڈے اوتے اِک شاندار مذبح بنایا۔ ¹¹ ۱۱۔ جد بنی اسرائیل نے ایہہ سنیا کہ اوناں نے کنعان دی سرحد تے یردن دے کول جیلِلَوت دے مقام تے اِسرائیلیاں دی حداں وِچ مذبح بنایا اے۔ ¹² ۱۲۔ تے بنی اسرائیل دی ساری جمات سیلاہ وِچ کٹھی ہوئی تاں جے اوناں اوتے چڑھائی کرن۔ ¹³ ۱۳۔ چنانچہ بنی اسرائیل نے الیعزر کاہن دے پُتر فنہحاس نوں جلعاد دے ملک وِچ بنی روبن ، بنی جد ، تے منسی دے اِدھے گھرانے دے کول گھلیا۔ ¹⁴ ۱۴۔ تے بنی اسرائیل دے ہر قبیلے دا اک اک بندہ لے کے ا یِسس حساب نال وزیر اوھدے نال گھلے جہڑے بنی اسرائیل دے جدی گھرانیاں دے سردار سن۔ ¹⁵ ۱۵۔ جد او جلعاد وِچ بنی روبن ، بنی جد تے منسی دے اِدھے گھرانے دے کول گےٗ تے اوناں نے اوناں نوں آکھیا۔ ¹⁶ ۱۶۔ خداوند دی ساری جمات ایہہ کہندی اے تُسی اسرائیل دے خدا دے نال ایِسس طرح دی بے ایمانی کیوں کیتی؟ تُسی خداوند دی پیروی توں کیویں پھرگےٗ کہ ہون تُسی آودے لئی اک مذبح بنا لیا اے؟ ¹⁷ ۱۷۔ کی فغور دا گناہ ساڈے لئی کافی نیں سی؟ آج دے دن تیک اسیں اپنے آپ نوں ایس گناہ توں پاک نیں کیتا حالانکہ خداوند دی قوم وِچ وبا وی آئی۔ ¹⁸ ۱۸۔ تے ہون وی تُسی خداوند دی پیروی توں دور ہوندے پیےٗ او؟ جے اِج تُسی خداوند نال بغاوت کردے او تے کل او اسرائیل دی ساری قوم دے نا ل رُس جاوے گا۔ ¹⁹ ۱۹۔ جے تہاڈا ملک جہڑی تہاڈی ملکیت اے ناپاک ہووے تے اوس پار خداوند دے ملک وِچ آجاوٰ جیتھے خداوند دا گھر اے تے ساڈے نال ملکیت وِچ حصے دار بن جاوٗ پر خداوند ساڈے خدا دے مذبح دے علاوہ آودے لئی کوئی ہور مذبح بنا کے نہ تے خداوند نال بغاوت کرو تے نہ ساڈے نال۔ ²⁰ ۲۰۔ جد زارح دے پُتر عکن نے مسح کیتیاں شےواں وِچوں بے ایمانی کیتی تے کی اسرائیل دی ساری قوم اوتے خداوند دا قہر نازل نہ ہویا؟ عکن کلا ای آودے گناہ توں نیں مریا۔ ²¹ ۲۱۔ تد بنی روبن ، بنی جد ، تے منسی دے اِدھے گھرانے نے اسرائیلی گھرانیاں دے سرداراں نوں آکھیا۔ ²² ۲۲۔ خداوند خدوانداں دا خدا، خداوند خداوندا ں دا خدا جاندا اے تے اسرئیل وی جان لین کے جے اے خداوند دے خلاف بغاوت یا نافرمانی دا نتیجہ ہووے تے سانوں اِج دے دن تیک جیوندا نہ چھڈدا۔ ²³ ۲۳۔ جے اسیں خداوند دے حکماں توں منہ پھیریے تے اوھدے اوتے سوختنی قربانیاں تے نذر دِیاں قربانیاں یا سلامتی دے ذبحیے چڑھان لئی ایہہ مذبح آودے لئی بنایا اے تے خداوند ای ایسس دا حساب لووے۔ ²⁴ ۲۴۔ نیں سگوں اسیں ایسس ڈر دے نال ایہہ کییتا کے کسے دن تہاڈی اولاد ساڈی اولاد نوں ایہہ نہ کہے کہ تہانوں خداوند اسرائیل دے خدا توں کی لینا دینا اے؟ ²⁵ ۲۵۔ اے بنی روبن ، تے بنی جد خداوند نے یردن نوں تہاڈے تے ساڈے وِچ حد مقرر کیتا اے لہذا خداوند وِچ تہاڈا کوئی حصہ نیں اے ایسس طرح تہاڈی اولاد ساڈی اولاد توں خداوند دے ڈرنوں دور کر دِیوے گی۔ ²⁶ ۲۶۔ ایسس لئی اسیں آکھیا کہ آوٗ آودے لئی اک مذبح بنایےٗ جہڑا سوختنی قربانیاں یا ذبیاں لئی نہ ہووے۔ ²⁷ ۲۷۔ سگوں ایہہ ساڈے تے تہاڈے تے آن آلیاں نسلاں دے وِچ گواہ ہووے کہ اسیں آودیاں سوختنی قربانیاں ، ہددیے تے ذبحیاں نال خداوند دی عبادت اوھدے گھر وچ کریےٗ۔ تد اِگاں توں تہاڈی اولاد ساڈی اولاد توں ایہہ نہ کیہہ سکے گی کہ تہاڈا خداوند .وِچ کوئی حصہ نیں ²⁸ ۲۸۔ تے اسیں آکھیا جے او کدی سانوں یا ساڈی اولاد نوں ایہہ آکھن تے اسیں جواب دیوا ں گے کہ خداوند دے مذبح دے وانگر ایسس مذبح نوں بنیا ہویا وِیکھو جہنوں ساڈے پُیو دادے نے ایس لئی بنایا کہ او سوختنی قربانیاں تے ذبیاں لئی نہ ہووے سگوں ساڈے تے تہاڈے وِچ گواہ ٹھہرے۔ ²⁹ ۲۹۔ خداوند نہ کرے کہ اسیں خداوند نال بغاوت کریےٗ تے اِج خداوند ساڈے خدا دے مذبح دے علاوہ جہڑا اوھدے تنبو دے اگے وے سوختنی قربانیاں ، نذر دیاں قربانیاں تے ذبیاں لئی کوئی ہور مذبح بنا کے اوھدے توں دور ہو جاون۔ ³⁰ ۳۰۔ جدوں فینحاس کاہن تے قوم دے وڈھریاں نے جہڑے اسرائیلی گھرانیاں دے سردار سن ایہہ سارا سنیا جہڑا بنی روبن ، بنی جد تے بنی منسی نے آکھیا سی تے او خوش ہو گےٗ۔ ³¹ ۳۱۔ تے الیعزر کاہن دے پُتر فینحاس نے بنی روبن ، بنی جد ، تے بنی منسی نوں آکھیا اِج اسیں سمجھ لیا اے کہ خداوند ساڈے نال اے کیوں جے تُسی ایسس مسلے وِچ خداوند نال بیوفائی نیں کیتی تے ہون تُسی بنی اسرائیل نوں خداوند دے ہتھوں چھڈا لیا اے۔ ³² ۳۲۔ تد الیعزر کاہن دا پُتر فنحاس تے وڈھرے جلعاد وِچ بنی روبن تے بنی جد نال مل کے کنعان نوں مُڑ آےٗ تے بنی اسرائیل نوں ایہہ سارا کُجھ دِس دِتا۔ ³³ ۳۳۔ او ایہہ سن کے خوش ہوے تے اوناں نے خدا دی وڈیائی کیتی تے کدی اوناں دے خلاف جنگ کرن تے اوس ملک نوں تباہ کرن دا ناں تیک نہ لیا جیتھے بنی روبن تے بنی جد رہندے سن۔ ³⁴ ۳۴۔ تے بنی روبن تے بنی جد نے اوس مذبح نوں ایہہ ناں دِتا ایہہ ساڈے وِچ گواہ اے کہ خداوند ای ساڈا خدا اے۔