¹ ۱۔ تے جد وں یروشلیم دے بادشاہ ادونی صدق نے سنیا کہ یشوع نے عی نوں جِت کےاوہنوں تباہ و برباد کر دتا اے تے جیویں اوہنے یر یحو تے اوہدے بادشاہ نال کیتا اوُیں ای عیؔ تے اوہدے بادشاہ نال کیتا تے جبعون دے لوکاں نے اسِرائیل دے نال صلح دا عہد بھنیا تے او اوناں دے نال رہن لگے۔ ² ۲۔ تے او تے اوھدے لوک ایسس خبر توں بوہت ڈر گئے کیوں جے جبعون اک شاہی شہر وانگر بوہت خاص شہر سی ۔ او عی نالوں وی وڈا سی۔ تے اوہدے سارے بندے بوہت بہادر سن۔ ³ ۳۔ ایسس لئی یروشلیم دے بادشاہ ادونی صدق نے حبرون دے بادشاہ ہوہام تے یرموت دے بادشاہ پیرام تے لیکس دے بادشاہ یافیح تے عجلون دے بادشاہ دبیر نوں ا یہہ سنہا گھلیا ۔ ⁴ ۴۔ جبعون تے حملہ کرن لئی میری مدد لئی آو کیو ں جے اونے یشوع تے اسرایئلیاں دے نال صلح کر لئی اے۔ ⁵ ۵۔ تد یروشلیم، حبرون ، یرموت ، لکیس ، تے عجلون دے پنجواں امُوری بادشاواں نے آودیاں فوجاں کھٹیاں کر لیاں ۔ اوآودیاں ساریاں فوجاں دے نال ٹرے تے اوناں نوں جبعون دے مقابلے وِچ کھِریاں کر کے اوھدے اوتے حملہ کر دِتا۔ ⁶ ۶۔ تد جبعون دے لوکاں نے جلجال دی لشکر گاہ وچ یشوع نوں پیغام گھلیا کہ آودے خادماں توں ہتھ نہ چک چھیتی ساڈے کول آکے سانوں بچا ۔ساڈ ی مدد کر کیوں جے کوہستانی ملک دے سارے بادشاہ کٹھے ہو کے ساڈے خلاف فو ج لے کے آن آلے نے ۔ ⁷ ۷۔ تد یشوع سارے بوہت بہادر جنگی مرداں دے نال آودی ساری فوج نو ں لے کے جلجال توں ٹر پیا۔ ⁸ ۸۔ تے خداوند نے یشوع نوں آکھیا اوناں توں نہ ڈر ۔ میں اوناں نوں تیرے ہتھ وِچ کر دِتا اے اوناں وِچوں کوئی وی تیرا مقابلہ نیں کر سکے گا۔ ⁹ ۹۔ یشوع جلجال توں ساری رات ٹردا ہویا اچانک ای اوناں اوتے حملہ کر دِتا۔ ¹⁰ ۱۰۔ خداوند نے اوہناں نوں اسرائیلیاں دے سامنے نکھیڑ دِتا ۔یشُوع نے اوناں نوں ہرا دِتا تے جبعون وِچ وڈی فتح پائی ۔اسِرائیلیاں نے بَیت حورُون تیک جان آلی سڑک اوتے اونان دا پیچھا کیتا تے عزیقاہ تے مقیدہ تیک اوناں ماردے گئے ۔ ¹¹ ۱۱۔ جدوں او بَیت حورُون دے اُترائی توں عزیقاہ تیک اسرائیلیاں دے سامنے توں پج رے سن تے خداوند نے آسمان توں اوہناں اوتے وڈے وڈے گڑے وسائے تے اوہناں وچوں گڑیاں نال مرن والیاں دی گنتی اسرائیلیاں دیاں تلواراں دا شکار ہون والیاں توں بو ہت زیادہ سی۔ ¹² ۱۲۔ جس دن خداوند نے اموریاں نوں اسرائیلیاں دے قابو وچ کیتا اوس دِن یشوع نے خداوند دے حضور بنی اسرائیل دے سامنے اے آکھیا۔ اے سورج تو جبعون اوتے اے چن تو وادی ایالو ن اوتے رُک جا۔ ¹³ ۱۳۔ تے سورج رُکیاریا،تے چن کُھلوتا ریا، جدوں تیک قوم نے آودے دوشمناں توں بدلہ نہ لے لیا جیویں کہ آشر دی کتاب وچ لکھیا اے سورج آسمان وچ ٹھہریا ریا تے تقربیاً سارا دِن ڈوبن دی چھیتی نہ کیتی۔ ¹⁴ ۱۴۔ تے ایویں دا دِن نہ ایدے توں پہلاں کدی ہویا تے نہ ا ِہدے توں بعد ہووے گا جہدے وچ خداوند نے کسے بندے دی گل سنی ہووے۔ یقیناً خداوند اسرائیلیاں لئی لڑ دا پیا سی ! ¹⁵ ۱۵۔ تد یشُو ع سارے اسرائیلیاں دے نال جلجال دی لشکر گاہ وچ مڑ آیا۔ ¹⁶ ۱۶۔ تے او پنجے بادشاہ نٹھ کے مقیدہ دی غار وچ لُک گئے ۔ ¹⁷ ۱۷۔ جِدوں یشُوع نوں ایہہ خبر ملی کہ او پنجے بادشاہ مقیدہ دی غار وچ لُکے ہوئے نے۔ ¹⁸ ۱۸۔ تے اونےحکم دتا کہ غار دے منہ اوتے وڈے وڈے پتھر رکھ دیو تے کُجھ بندیاں نوں ا ودی رکھوالی لئی بھا دیو۔ ¹⁹ ۱۹۔ پر تُسی نہ رُکو ۔ آودے دشمناں دا پچھا کر و تے پچھوں دی اوناں اوتے حملہ کر دیو ۔ او آودے آودے شہر اں تیک نہ پُہنچ سکن کیوں جے خداوند تہاڈے خدا نے اوہناں نوں تہاڈے ہتھ وچ کر دتا اے۔ ²⁰ ۲۰۔ ایسس طرح یشُوع تے اسرائیلیاں نے اوہناں نوں تباہ و برباد کر دِتا تقریبا ًہر بندہ مِا ریا گیا پر جیہڑے کُجھ بچ گئے آودے آودے کند آلے شہراں وچ پہنچ کئے ۔ ²¹ ۲۱۔ تد ساری فوج ٹھیک ٹھاک مقیدہ دی لشکر گاہ وچ یشُوع دے کول مڑ آئی تے کسے نے اسرائیلیاں دے خلاف اک لفظ وی نہ آکھیا ۔ ²² ۲۲۔ تد یشُوع نے حکم دِتا کہ غار دا منہ کھولو تے اوہناں پنجاں بادشاواں نوں کڈ کے میرے کول لیاو۔ ²³ ۲۳۔ تد اونان نے یروسلیم، حبرون ، یرموت لکیس تے عجلون دے اوناں پنجاں بادشاواں نوں غار وِچوں باہر کڈیا۔ ²⁴ ۲۴۔ جدوں او اوہناں بادشاواں نوں یشُوع دے کول لے آئے تد اونےاسرائیل دے سارے بندیاں نوں صدیا تے ا ونے فوج دے اوناں سرداراں نوں جیہڑے ا وہدے نال آئے سن حکم دِتا کہ ایتھے آکے آودے آودے پیراں نوں اِناں بادشاواں دیاں گردناں اوتے رکھو ۔لہذا اوہناں نے اِگے آ کے آودے آودے پیرا ں نوں اوہناں دیاں گردناں اوتے رکھ دِتا۔ ²⁵ ۲۵۔ یشُوع نے اوہناں نوں آکھیا ڈرو نہ تے پریشان نہ ہووہ ،مضبوط بنو تے حوصلہ رکھو ۔ اوہناں ساریاں دشمناں دے نال خداوند ایویں ای کرے گا جہناں دا تُسی مقابلہ کرو گے۔ ²⁶ ۲۶۔ تد یشُوع نے اوہناں بادشاواں نوں ماریا تے قتل کر دِتا تےاوہناں نوں پنج رُوخاں اوتے لمکا دتا تے شام تیک او رُوخاں اوتے ای لمکے رے۔ ²⁷ ۲۷۔ سُورج دے ڈُبدے ویلے یشُوع دے حکم دے مطابق اوہناں نوں رُوخاں اوتوں لا یا گیا تے اوسے غار وچ سُٹیا گیا جیتھے او لُکے ہوئے سن تے غار دے منہ اوتے وڈے وڈے پتھررکھ دِتے گئے جیہڑے اج تیک اوتھے نے۔ ²⁸ ۲۸۔ اوسے دِن یشُوع نے مقیدہ نوں جِت لیا تے اوہنوں تے اوہدے بادشاہ نوں ختم کر دِتا تے اوہدے وچوں ہر بندے نوں ختم کر دتا اونے کسے نوں باقی نہ چھڈیا تے مقیدہ دے بادشاہ دے نال وی اوہی سلوک کیتا جیہڑا یر یحو دے بادشاہ دے نال کیتا سی۔ ²⁹ ۲۹۔ فیر یشُوع سارے بنی اسِرائیل دے نال مقیدہ توں لبنا ہ نوں گیا تے اوھدے اوتے حملہ کیتا۔ ³⁰ ۳۰۔ خداوند نے او شہر تے اوھدے بادشاہ نوں وی اسِرائیلیاں دے ہتھ وچ دے دِتا۔ یشُوع نے اونوں تے اوھدے شہر دے ہر جاندار نوں مار دِتا ۔اونے کسے نوں اوتھے زندا نہ چھڈیا تے اونے اوتھوں دے بادشاہ دے نال اوہی سلوک کیتا جیویں یریحو د ے بادشاہ دے نال کیتا سی۔ ³¹ ۳۱۔ فیر یشُو ع سارے بنی اسِرائیل دے نال لبناہ توں لکیس نوں گیا۔اونے اوھدے مقابلے وِچ مورچا بنیا تے اوھدے اوتے حملہ کیتا۔ ³² ۳۲۔ خداوند نے لکیس نوں اسرائیلیاں دے قبضہ وچ کیتا تے یشُوع نے دُوجے دِن اوھدے اوتے فتح پائی تے اونے اوس شہر تے اوہدے اندر دے ہر جاندار نوں ختم کیتا ٹھیک اُیویں ای جیویں اونے لبناہ دے نال کیتا سی۔ ³³ ۳۳۔ اوسے ویلے وِچ جزر دا بادشاہ ہورم، لکیس دی مدد کرن لئی آگیا پر یشُو ع نے اوہنوں تے اوہدی فوج نوں ہرا دِتا ۔اِتھوں تیک کہ کوئی بندہ زندہ نہ بچیا ۔ ³⁴ ۳۴۔ فیر یشُوع سارے بنی اسِرائیل دے نال لکیس توں عجلون نوں گیا اوناں نے اوھدے مقابلے وِچ مورچے بنائے تے اوھدے اوتے حملہ کیتا۔ ³⁵ ۳۵۔ اوناں نے اونوں اوسے دِن جِت لیا تے اوناں نوں ختم کر دِتا تے اودے وِچ جہڑا وی جیوندا سی اونوں ختم کر دِتا ٹھیک اُیویں ای جیویں اونے لکیس دے نال کیتا سی۔ ³⁶ ۳۶۔ فیر یشپوع سارے بنی اسِرائیل دے نال عجلون توں حبرون نوں گیا تے اوھدے اوتے حملہ کیتا۔ ³⁷ ۳۷۔ اوناں نے اوس شہر نوں جِت لیا تے اُنوں اوھدے بادشاہ اوھدے پنڈاں تے اوھدے اندر دے ہر جیوندے نوں مار دِتا ۔اوناں نے کسے نوں جیوندا نہ چھڈیا تے عجلون دے وانگوں اوناں نے اوھدا تے اوھدے اندر دے ہر جیوندے نوں مار دِتا۔ ³⁸ ۳۸۔ فیر یشُوع نے سارے بنی اسِرائیل دے نال مُڑ کے دبیر اوتے حملہ کیتا۔ ³⁹ ۳۹۔ اوناں نے اوس شہر اوھدے بادشاہ تے اوھدے پنڈاں اوتے قبضہ کر لیا تے اوناں نوں ختم کر دِتا۔ اوناں نے اوھدے ہر جیوندے نوں ختم کر دِتا تے کسے نوں جیوندا نہ چھڈیا۔ اوناں نے دبیر تے اوھدے بادشاہ دے نال او ای کیتا جہڑا لبناہ تے اوھدے بادشاہ تے حبرون دے نال کیتا سی۔ ⁴⁰ ۴۰۔ اِسے طرح یشُوع نے کوہستانی ملک، پہار پاسے دا ٹوٹا ، لیندے پاسے دیاں پہاڑیاں دے وِچ تے نیویں ملک دے نال اوس پورے علاقے نوں اوناں دے سارے بادشاواں دے نال فتح کر لیا۔اونے کسے نوں جیوندا نہ چھڈیا ۔تے خداوند اسِرائیل دے خدا دے حکم دے مطابق ہر جاندار نوں بالکل ختم کر دِتا۔ ⁴¹ ۴۱۔ تے یشُوع نے قادِس برنیع توں لے کے غزہ تیک تے جشن توں لے کے جبعون تیک دے سارے علاقے نوں فتح کر لیا۔ ⁴² ۴۲۔ اِناں ساریاں بادشاواں تے اوناں دے ملُکاں نوں یشُوع نے اِک ای دفعہ ہرا دِتا کیوں جے خداوند اسِرائیل داخدا اسِرائیل لئی لڑیا۔ ⁴³ ۴۳۔ تد یشُوع سارے بنی اسِرائیل دے نال جلجال دی لشکرگاہ وِچ مُڑ آیا۔