¹ ۱۔ یربعل دا پتر ابی ملک ، سکم ول اپنی ماں دے بھراواں کول گیا تے اوہناں نال تے اپنی ماں دی ساری اَ ل نوں آکھیا ۔ ² ۲۔ سکم دے سارے لوکاں توں پچھ پئی تہاڈے لئی کیہ چنگا اے ؟ ایہہ پئی یر بعل دے سارے ستر پتر تہاڈے اتے راج کرن یاں کلا اک بندہ ؟ تاں جو یاد رہوے پئی میرا تے تہاڈ ا خونی رشتہ اے ۔ ³ ۳۔ جہدوں ابی ملک دی ماں دے بھراواں نے سکم دے واسیاں نال ایہدے بارے دسیا تے اوہ ابی ملک دے پچھے ٹرن تے راضی ہو گئے ۔ کیوں جو اوہناں نے آکھیا پئی اوہ تے ساڈا بھرا اے ۔ ⁴ ۴۔ اوہناں نے اوہنوں بعل بریت دے مندر چوں ستر مثقال چاندی دتی ۔ جہدی مدد نال اوہنے کجھ بدمعاشاں تے لفنگیاں نوں اپنے پچھے ٹرن لئی راضی کیتا۔ ⁵ ۵۔ اوہ عفرہ وچ اپنے پیو دے گھر گیا تے اپنے ستر بھراواں نوں جہڑے یربعل دے پتر سن ، اک ای پتھر نال قتل کر دتا ۔ پر یربعل دا نکا پتر ، یوتام لُک گیا تے بچ نکلیا۔ ⁶ ۶۔ تدوں سکم تے بیت ملو دے کل واسی سکم وچ تھم دے کول بلوط دے نیڑے ابی ملک دی تاجپوشی لئی کٹھے ہوئے۔ ⁷ ۷۔ جدوں یقتام نوں ایہ سُوہ لگی تے اوہ کوہِ کرزیم دی چوٹی اتے جا کھلوتا تے ڈہڈاں مارکے آکھن لگا : اے سکم دے واسیوں ! میری گل وسنو تاں جو رب تہاڈی سنے۔ ⁸ ۸۔ اک دن رُکھ کسے نوں مسح کرکے اپنے لئی بادشاہ بنان نکلے ۔ اوہناں نے زیتون دے رکھ نوں آکھیا : ساڈے اتے بادشاہی کر ! ⁹ ۹۔ پر زیتون دے رکھ نے جواب دتا : کیہ میں اپنا تیل چھڈ کے جہڑا خدا تے انساناں دونواں دی عزت لئی ورتیا جاندا اے ، رکھاں تے ھکم چلان جواں گا ؟ ¹⁰ ۱۰۔ تدوں رکھاں نے انجیر دے رکھ نوں آکھیا پئی آ تے ساڈے اتے بادشاہی کر! ¹¹ ۱۱۔ پر انجیر دے رکھ نے جواب دتا : کیہ میں اپنا پھل جہڑا چوکھا چنگا تے مٹھا اے ، چھڈ کے رکھاں تے حکم چلان جاواں ؟ ¹² ۱۲۔ تدوں اوہناں رکھاں نے انگور4 دی ول نوں آکھیا پئی ساڈے اتے بادشاہی کر! ¹³ ۱۳۔ پر انگور دی وَل نے جواب دتا : کیہ میں اپنی مے چھڈ کے جہڑی خدا تے انسان دونواں دی خوشی دا سبب اے ، رکھاں اتے حکم چلان جاواں ؟ ¹⁴ ۱۴۔ اوڑک رکھاں نے اونٹ کٹارے نوں آکھیا ! آ تے ساڈے اتے بادشاہی کر! ¹⁵ ۱۵۔ اونٹ کٹارے نے رکھاں نوں آکھیا ! جیکر تسیں سچی مچی مینوں مسح کرکے اپنا بادشاہ متھنا چاہندے او تے آئو تے میری چھاں تھلے پناہ لوئو تے جے نئیں تے اگ نکل کے لوبان دے رکھاں نوں سواہ کر دیوے ! ¹⁶ ۱۶۔ ہن جیکر تسیں ابی ملک نوں بادشاہ مِتھن چ چنگی طرحاں تے چنگے ارادے نال کم لیا جاوے تے جیکر تسیں یربعل تے اوہدے ٹبر دے نال نیاں کیتا ہووے تے اوہدے نال اونج دا سبا ء ورتیا جاوے جہدا اوہ حق دا ر اے ۔ ¹⁷ ۱۷۔ تے ایہہ سوچیا اے پئی میرا پیو تہاڈے لئی لڑیا تے تہانوں مدیان دے ہتھوں چُھڈان لئی اپنی جان دی واہ لائی ، تے ٹھیک اے ۔ ¹⁸ ۱۸۔ پر اج تسیں میرے تے میرے پیو دے گھرانے نال توکھا کیتا اے تے اوہدے ستر پتراں نوں اک ای پتھر تے قتل کیتا تے اوہدی نوکرانی دے پتر ابی ملک نوں سکم دے واسیاں دا بادشاہ متھیا اے کیوں جو اوہ تہاڈا بھرا اے )۔ ¹⁹ ۱۹۔ جیکر اج تسیں یربعل تے اوہدے ٹبر دے نال بڑی چنگی طرحاں تے چنگے ارادے دا سبا ء ورتیا ۔ تے ابی ملک توں خوش رہوو تے تے اوہ تہاڈے توں خوش رہن ۔ ²⁰ ۲۰۔ پر جے تسیں اینج ناں کیتا تے ابی ملک چوں اگ نکلے تے ابی ملک نو ساڑھ کے سواہ کر دیوے ! ²¹ ۲۱۔ تدوں یوتام پج کے تے بیر ول ٹر گیا تے اوتھے ای اوتھے ای رہیا کیوں جو اوہ اپنے بھرا ابی ملک توں ڈردا سی ۔ ²² ۲۲۔ ہنے ای تے ابی ملک نے اسرائیل اتے تن ورھے بادشاہی کیتی سی پئی ²³ ۲۳۔ خدا نے ابی ملک تے سکم دے واسیاں دے وچکار اک بدروح کلی جہدے سببوںسکم دے واسی ابی ملک نال غداری کرن تے اتر آئے۔ ²⁴ ۲۴۔ خدا نے ایہہ ایس لئی کیتا پئی یربعل دے ستر پتراں دے خلا ف کیتے ہوئےپاپ تے اوہناں دا لہو وگان دا بدلہ اوہدے بھرا ابی ملک توں تے سکم دے واسیاں توں لیا جاوے جہناں نے اپنے بھراواں نوں قتل کرن وچ اوہدی مدد کیتی سی . ²⁵ ۲۵۔ اوہدی مخالفت چہ سکم دے واسیاں نے پہاڑیاں دیاں ٹیسیاں اتے چھاپہ مارن والیاں نوں بٹھا دتا جہڑے آن جان والے ساریاں بندیاں نوں لٹ لیندے سن ۔ ایہدی سُوہ ابی ملک نوں ہوئی۔ ²⁶ ۲۶۔ تدہ عبید دا پتر جعل اپنے بھراواں سنے سک وچ آیا تے اوتھوں دے واسیاں نے اوہدے تے یقین کیتا ۔ ²⁷ ۲۷۔ فیر اوہ پیلیاں چہ گئے تے انگور کٹھے کرکے ایہناں دا رس کڈھیا ۔ اوہدے باد اوہ اپنے دیوتا دے مندر چہ جا کے نچن پُڑکن لگے۔ تے جہدوں اوہ کھا بی رہ سن تے ابی ملک تے لعنت کرن لگ پئے۔ ²⁸ ۲۸۔ تدوں عبد دا پتر جعل نے آکھیا : ابی ملک کون اے تے سکم کون اے پئی اسیں اوہدی گل کیوں اوہدے پچھے چلئیے؟ کیہ اوہ یربعل دا پتر نئیں تے زبول اوہدا قائیم مقام نئیں ؟ تسیں سکم دے پیو حمور دے لوکاں دے پچھاں چلو، اسیں تے ابی ملک دے پچھے چلاں گے ۔ ²⁹ ۲۹۔ کیہہ سی جے ایہہ لوکی میرے ہتھ تھلے ہندے ، تدھ میں ابی ملک توں پچھاں ہٹ جاندا ۔ میں ابی ملک نوں کہندا : اپنی ساری فوج نوں سدھ لیا ۔ ³⁰ ۳۰۔ جدوں شہر تے حکم چلان والے زبول نے عبد دے پتر جعل دیاں گلاں سنیاں تے اوہ بوہت رُس گیا۔ ³¹ ۳۱۔ اوہنے سُوہ لگیاں بناں ابی ملک ول چٹھی دین والے گھلے تے کہوا گھلیا پئی عبد دا پتر جعل تے اوہدے بھراسکم وچ آئے نیں تے اوہ شہر نوں تیرے خلاف پمکا ہ رئے نیں ۔ ³² ۳۲۔ سو تو تے تیرے لوکی رات نوں اٹھن تےمیدان چ لُک کے بیہہ جان ۔ ³³ ۳۳۔ تے صبح سورج نکلدیاں ای شہر تے چڑھائی کرن ۔ جدوں جعل تے اوہدے لوکی تیرا مقابلہ کرن آن تے جو کجھ تیرے توں ہووے اوہ کریں ۔ ³⁴ ۳۴۔ تدھ ابی ملک تے اوہدی فوج دے سارے لوکی چاراں کونیاں چ رات دے ویلے آ کے سکم دے نیڑے لُک کے بیہہ گئے ۔ ³⁵ ۳۵۔ ٹھیک اوس ویلے جدوں عبد دا پتر جعل باہر جا کے شہر دی بروُہ تےجا کھلوتا ۔ ابی ملک تے اوہدے سپاہی اپنی لُکن دی تھاں توں نکل گئے ۔ ³⁶ ۳۶۔ جدوں جعل نے اوہناں نوں ویکھیا تے زبول نوں آکھیا : ویکھ لوکی پہاڑاں دیاں ٹیسیاں توں تھلے اُتر رئے نیں ۔ زبول نے اوہنوں آکھیا : تینوں تے پہاڑاں دے پرچھاویں چ وی بندے وکھالی دیندے نیں ۔ ³⁷ ۳۷۔ پر جعل نے فیر آکھیا : ویکھ میدان دے وچکار روں لوکی لگے آ رئے نیں ۔ تے اک فال گیر ٹولی بلوط ولوں آ رئ اے ۔ ³⁸ ۳۸۔ تدھ زبول نےاوہنوں آکھیا :ہن تیری اوہ آکڑ کتھے گئی جہڑا توں کہندا سی پئی ابی ملک کون اے پئی اسیں اوہدے پچھے ٹرئیے؟ کیہ ایہ اوہ لوکی نئیں جہناں نوں تو گھٹیا جان دا سی؟ ہن جا تے اوہناں نال لڑ۔ ³⁹ ۳۹۔ تدھ جعل سکم دے واسیاں نوں لے نکلیا تے ابی ملک نال لڑیا۔ ⁴⁰ ۴۰۔ ابی ملک نے اوہنوں گھسیٹیا تے شہر دی بروُہ ول اپڑ دیاں اپڑدیاں کئی لوکی مارے گئے۔ ⁴¹ ۴۱۔ ابی ملک ارومہ وچ رُکیا ۔ تے زبول نے جعل تے اوہدے بھراواں نوں سکم چوں کڈھ دتا ۔ ⁴² ۴۲۔ دسورے دیہاڑے سکم دے لوکی میدان چ جان لئی نکلے تے ابی ملک نوں اوہدی سوُہ لگی ۔ ⁴³ ۴۳۔ تدھ اوہنے اپنے لوکاں نوں لیا تے اوہناں نوں تِن ٹولیاں چہ وکھو وکھ کیتا تے میدان وچ لُک کے بیہہ گئے ۔ جد اوہنے لوکاں نوں شہرولوں باہر آئوندیاں ویکھیا تے اوہ وار کرن لئی اگاں ودھے۔ ⁴⁴ ۴۴۔ ابی ملک تے اوہدے نال دے سنگی پج کے شہر دی بروُہ تے جا کھلوتے تے اوہ ٹولیاں اوہناں لوکاں ول لڑن لئی ودھیاں جہڑے لوکی میدان وچ سن ۔ تے اوہناں نوں مارن لگ پئے۔ ⁴⁵ ۴۵۔ ابی ملک پورا دن شہر نال لڑدا رئیا ۔ ایتھوں تیِک پئی اوہنوں فتح کر لیا تے اوہناں لوکاں نوں جہڑے اوتھے سن قتل کر دتا ۔ تے شہر نوں ڈھا کے تے اوہدے اتے لون سٹیا ۔ ⁴⁶ ۴۶۔ ایہہ سن کے سکم دے برج دے سارے لوکی البریت دے مندر دے قلعے وچ وڑ گئے۔ ⁴⁷ ۴۷۔ جدوں ابی ملک نے ایہہ سنیا پئی اوہ اوتھے کٹھے ہوئے نیں ۔ ⁴⁸ ۴۸۔ تے اوہ تے اوہدے سارے لوکی ضلمون دے پہاڑ اتے چڑھ گئے ۔ اوہنے اک کواہڑا لیا تے کجھ ٹہنیاں کٹ کے اپنے موہڈیاں تے رکھ لیاں تے اپنے نال دیاں لوکاں نوں آکھیا پئی جو کجھ تسیں مینوں کردیاں ویکھیا اے تسیں وی چھیتی نال اوہو ای کرو۔ ⁴⁹ ۴۹۔ تدھ ساریاں لوکاں نے ٹہنیاں کٹیاں تے اوہ ابی ملک دے پچھے ٹر پئے تے قلعے دے سامنے اوہناں دا ادھا ڈھیر لا کے تے اوہناں نوں اگ لا دتی تے لوکی اندر ای پھنسے رئے ۔ تدھ سکم دے برج دے اندر ساریاں زنانیاں تے بندے جہڑے گنتی چ گھٹو گھٹ اک ہزار سن ، مر گئے ۔ ⁵⁰ ۵۰۔ اوہدے بعدوں ابی ملک تبعیض ول گیا تے اوہنوں گھیرے چہ لے کے تے اوہدے تے قبضہ کر لیا ۔ ⁵¹ ۵۱۔ سو شہر دے اندر اک بوہت پکا برج سی جہدے وچ شہر دیاں ساریاں زنانیاں تے بندے پج کے جا وڑے تے اپنے آپ نوں اندر وں بند کرکے برج دے اتاں چھت تے چڑھ گئے ۔ ⁵² ۵۲۔ ابی ملک برج دے کول گیا تے اوہدے اتے حملہ کر دتا ۔ لیکن جسطراں ای اوہ برج دے بوہے تے اوہنوں اگ لان اپڑیا ۔ ⁵³ ۵۳۔ کسے زنانی نے چکی دا اُتلا پُڑوا اوہدے سر اتے ڈیگ دتا ۔ جہیدے نال اوہدی کھوپڑی پاٹ گئی۔ ⁵⁴ ۵۴۔ اوہنے اوسے ویلے اپنے ہتھیار چکن والے نوں آواز دتی تے آکھیا اپنی تلوا ر کھچ تے مینوں قتل کر دے تاں جو ایہہ لوکی ایہہ ناں آکھ سکن پئی ایہہ اک زنانی نے مینوں مار دتا اے ۔ سو اوہدے نوکر نے اپنی تلوار اوہدے بدن وچ کھبا دتی تے اوہدے ساہ نکل گئے ۔ ⁵⁵ ۵۵۔ جدوں اسرئیلیاں نے ویکھیا پئی ابی ملک مر گیا تے اوہ گھر مڑ گئے ۔ ⁵⁶ ۵۶۔ ایس طرحاں خدا نے ابی ملک نوں اوس بدی دا بدلہ دتا ۔جہڑا اوہنے ستر بھراواں نوں قتل کرکے اپنے پیو دے نال بدی کیتی گئی سی ۔ ⁵⁷ ۵۷۔ خدا نے سکم دے لوکاں نوں وی ااوہناں دی بدی دی سزا دتی تے یربعل دے پتر یوتام دی لعنت اوہناں تے آ ئی ۔