¹ ۱۔ تد یُر بعل (یعنی جدعون اے) تے اوہدے نال سب لوکاں نیں صبح سویرے اُٹھ کے حرود دے چشمے دے کول اپنے ڈیرے لائے۔مِدیانیاں دی لشکر گاہ اوہناں دے شمال وَل کوہِ مورہ دے کول دی وادی وچ سی۔ ² ۲۔ خداوند نیں جِدعون نوں آکھیا: تیرے نال اینے کُو لوک نیں پئی پئی میں مِدیانیاں نوں اوہناں دے ہتھ وچ نئیں کر سکدا ۔ایہہ نہ ہووے پئی اسرائیل میری بجائے اپنے اُتے فخر کرن لگن پئی اوہناں دی اپنی قوت نیں اوہناں نوں بچایا ۔ ³ ۳۔ ایس لئی لوکاں وچ اعلان کر پئی جو کوئی خوف زدہ اے اوہ کوہِ جِلعاد چھڈ کے پرت جائے ۔ایس طراں بائی ہزار لوکی تے پرت پئے پر دس ہزار اوتھے ای جمے رہے۔ ⁴ ۴۔ پر خداوند نیں جِدعون نوں آکھیا:ہُن وی لوکی بوہتے نیں۔اوہناں نوں چشمے دے کول ہیٹھا لےجا تے اوتھے میں تیری خاطر اوہناں نوں پرکھا ں گا ۔تد میں جس دے بارے چ آکھاں گا پئی اے تیرے نال جاوے گا تد اوہ جاوے گا پر جے میں آکھاں پئی اوہ تیرے نال نہ جاوے تے اوہ نئیں جاوے گا ۔ ⁵ ۵۔ ایسطراں اوہ اوہناں لوکاں نوں چشمے دے کول تھلے لے گیا۔اوتھے خداوند نیں اوہنوں آکھیا پئی ویکھ کون کون اپنی زبان نال کُتے وانگ چپڑ چپڑ کر کے پانی پیندا اے تے کون کون اپنے گوڈے ٹیک کے پیندا اے۔اوہناں نوں وَکھ وَکھ کر لینا۔ ⁶ ۶۔ تین سو لوکاں نیں تے چلّو وچ پانی لے کے اوہنو چپڑ چپڑ کر کے پیتا تے باقی سب نیں گوڈے ٹیک کے پیتا۔ ⁷ ۷۔ خداوند نیں جِدعون نوں آکھیا:ایناں تین سو بندیاں دے راہیں جیناں نیں چپڑ چپڑ کر کے پیتا میں تہانوں بچاواں گاتے مِدیانیاں نوں تہاڈے ہتھاں وچ کر دواں گا۔باقی لوکاں نوں اپنی اپنی تھاں پرتن دینا۔ ⁸ ۸۔ ایس طراں جِدعون نیں اوہناں اسرائیلیاں نوں اپنے اپنے خیمیاں وَل بھیج دِتاتے اوہناں نیں اپنے اپنے توشے تے نرسنگے اوہناں تین سو بندیاں دے حوالے کر دِتے جیناں نوں جِدعون نیں اپنے نال رکھ لیا سی۔ہن مِدیانیاں دی لشکر گاہ اوہناں دے ہیٹھاں وادی وچ سی۔ ⁹ ۹۔ اوسے رات خداوند نیں جِدعون نوں آکھیا:اُٹھ تے تھلے اُتر کے لشکر گاہ اُتے چڑھائی کر کیون جو میں اوہنوں تیرے ہتھ وچ کر دیوا ں گا۔ ¹⁰ ۱۰۔ جے تُوں اوہناں اُتے حملہ کرن توں ڈردا ایں تے اپنے خادم فوارہ دے نال تھلے اوہناں دی لشکر گاہ وچ جا۔ ¹¹ ۱۱۔ تے سُن پئی اوہ کی کہہ رہے نیں۔تد تیرے وچ اوس لشکر گاہ اُتے حملہ کرن دی ہمت پیدا ہو جاوے گی۔فیر اوہ اپنے خادم فوارہ دے نال لشکر گاہ دی باہرلی چوکی اُتے گیا۔ ¹² ۱۲۔ تے مِیانی ،عمالیقی تے دوجے سب مشرقی لوکی وادی وچ ٹِڈیاں وانگ پھیلے ہوئے سن۔اوہناں دے اُنٹاں داشمار کرنا اوہنا ای مشکل سی جینا سمندر دے کنارے دی ریت دا۔ ¹³ ۱۳۔ جدوں جِدعون اوتھے اَپڑیا تے اوس ویلے اِک بندہ اپنے یار نوں اپنا خواب دس دا پیا سی۔اوہ کہہ رہیا سی پئی میں خواب پئی جَوکی اِک گول مول روٹی لُڑھکدی ہوئ مِدیانیاں دی لشکر گاہ وچ آئی ۔اوہ خیمے نال اینی کُو زور نال وَجی پئی اوہ خیمہ اُلٹ کے ڈِگ گئی تے زمین اُتے جا ویچھیا ۔ ¹⁴ ۱۴۔ اوہدے یار نیں آکھیا:ایہہ اوس اسرائیلی مرد یوآس دے پُتر جِدعون دی تلوار دے سَوا ہور کجھ نئیں ہوسکدا ۔خداوند نیں مِدیانیاں نوں تے سارے لشکر نوں اوہدے ہتھ وچ کر دِتا۔ ¹⁵ ۱۵۔ جدوں جِدعون نیں اوہ خواب تے اوس دی تعبیر سُنی تے خدا نوں سَجدہ کیتا ۔اوہ اسرائیلیاں دی لشکر گاہ وچ پرتیا تے کہن لگا :اُٹھو ! خداوند نیں مِدیانی لشکر نوں تہاڈے ہتھ وچ کر دِتا اے ۔ ¹⁶ ۱۶۔ اوہنے اوہناں تین سو بندیاں نوں تین دستیاں(جتھیاں) وچ وَنڈ دِتا تے اوہناں ساریاں دے ہتھاں وچ نرسنگے تے خالی گھڑے دے دیوے تے ہر گھڑے دے اندر اِک اِک مشعل سی۔ ¹⁷ ۱۷۔ اوہنے اوہناں نوں آکھیا :جیویں مینوں کردیاں ویکھو تسی وی اونج ای کرنا ۔جدوں میں لشکر گاہ دے کنڈے اَپڑاں تے جو کجھ میں کراں تسی اونج ای کرنا۔ ¹⁸ ۱۸۔ جدوں میں تے میرے سب ساتھی اپنے اپنے نرسنگے پھونکیے تے تسی لشکر گاہ دے چاراں پاسیاں توں اپنے اپنے نرسنگے پھونکنا تے للکار نا پئی خداوند لئی تے جِدون دے لئی ¹⁹ ۱۹۔ جویں ای درمیانی پہرہ شروع ہویا تے پہرے دار بلے گئے،جِدعون تے اوہ سَو بندے جیہڑے اوہدے نال سن۔لشکر گاہ دے کنارے اَپڑے۔اوہناں نیں نرسنگے پُھونکے تے ہتھاں وچ تھامے ہوئے گھڑیاں نوں توڑ دِتا۔ ²⁰ ۲۰۔ تد اوہناں تیناں دستیاں (جتھیاں )نیں وی نرسنگے پُھونکے تے اپنے گھڑیاں نوں توڑ دِتا تے اپنے کھبے ہتھاں وچ مشعلاں لئیاں تے اپنے سجے ہتھاں وچ نرسنگے لے کے اوہناں نوں پُھونکیا تے زور زور نال نعرے مارن لگے :"خداوند دی تے جِدعون دی تلوار" ²¹ ۲۱۔ جدوں سب بندے لشکر گاہ دے چاراں پاسیاں تے اپنی اپنی تھاں تے کھلوتے رہےتے مِدیانی اوہناں نوں ویکھ کے گھبرا گئے تے چِکاں ماردے ہوئے بھج گئے۔ ²² ۲۲۔ ایس لئی جدوں تین سو نرسنگے پُھونکے گئے تے خداوند نیں اوہناں دے لشکر گاہ تے اِک دی تلوار اوہدے ساتھی تے چلوائی سی تے سارا لشکر صریرات وَل بیت سِقہ تِک تقریباََطبات دے نیڑے ابیل محلُولہ دی سرحد تِک بھجیا۔ ²³ ۲۳۔ تد نفتالی ،آشر تے سارے منسیاںدے دیس توں اسرائیلی بندے جمع ہوکے نکلے تے اوہناں نیں مِدیانیاں دا پیچھا کیتا۔ ²⁴ ۲۴۔ جِدعون نیں افرائیم دے سارے کوہستانی علاقے وچ وی قاصد بھیجے تے اوتھے دے لوکاں نوں کہلا بھیجیا پئی مِدیانیاں دے مقابلے لئی ہیٹھاں آؤ تے اوہناں توں پیلا ں بیت بارہ تِک یردن دے گھاٹیاں تے قابض ہو جاؤ۔سو سب افرائیمی بندے اَکٹھے ہوئے تے اوہناں نیں بیت بارہ تِک یردن دے گھاڑیاں اُتے قبضہ کر لیا۔ ²⁵ ۲۵۔ اوہناں نیں مِدیانیاں دے دو سرداراں عوریب تے زئیب نوں پھڑ لیا تے عوریب نوں عوریب دی چٹان اُتے تے زئیب نوں زئیب دے کولہو دے کول قتل کیتا۔اوہناں نیں مِدیانیاں دا تعاقب کیتا تے عوریب تے زئیب دے سِر کاٹ کے یردن دے پار ِجد عون دے کول لے آئے۔