¹ ۱. خداوند نیں اوہناں قوماں نوں رہن دِتا تاں جو اوہ اوہناں سارے اسرائیلیا نوں پرکھے جیہڑ ے کِنعان وچ کسے لڑائی وچ حصہ نئیں لیا سی۔ ² ۲. اوہنے ایہہ صرف ایس لئی کیتا پئی بنی اسرائیل نوں جیناں نسلاں نال لڑن دا وَل نئیں سی اوہناں نوں جنگ کرن دا گُر سکھایا جاوے۔ ³ ۳. فِلستیاں دے پنج حکمران ،سارے کنعانی ،صیدانی تے کوہ ِ بعل حبرون توں لے کے حمات دے اندر آن والے بوہے تِک لبنان دیاں پہاڑاں دے وسنیک سارے حوی اوتھے ای رہ پئے ۔ ⁴ ۴. اوہناں نوں ایس لئی رہن دِتا گیا تاں جو اوہناں دے سببوں اسرائیلیاں دی پرکھ ہووے پئی اوہ خداوند دے اوہناں حکماں نؤں منن گے یاں نئیں جیہڑے اوہناں نوں موس راہیں اوہناں دے پیو دادے نوں دِتے گئے سن۔ ⁵ ۵. سو بنی اسرائیل کنعانیاں ،حتیاں ،اموریاں فرزیاں ،حویاں تے یبوسیاں دے وچکار وس گئے۔ ⁶ ۶. اوہ اوہناں دھیاں ویاہندے تے اپنیاں دھیاں اوہناں دے نال ویاہ دیندے تے اوہناں دے دیوتاواں دی پوجا کردے سن۔ ⁷ ۷. بنی اسرائیل تے خدا دی نظر وچ بدی کیتی۔ اوہ خداوند اپنے خدا نوں بھل گئے تے بعلیم دیوتاواں تے مورتاں دی پوجا کرن لگ پئے ۔ ⁸ ۸. خداوند دا غصہ اسرائیلیاں اُتے بھڑکیا تے اوہنے اوہناں نوں مسوپتامیہ دے بادشاہ کوشن رسحتیم دے ہتھ ویچ چھڈیا ۔سو بنیی اسرائیل اُٹھ ورہیاں تک اوہناں دے تابعدار رہے۔ ⁹ ۹. پر جدوں اوہناں نیں خداوند اَگے بینتی کیتی تاں اوہنے اوہناں دے لئی اِک چُھڈان والا گھلیا جیہڑا کالب دے نکے بھرا قنز دا پُتر محتنی ایل سی،جینے ایناں نوں چھڈایا۔ ¹⁰ ۱۰. خداوند دی روح اوہدے اُتے اتری جیدے سببوں اوہ اسرائیل دا قاضی بن گیا تے لڑن لئ نکلیا ۔خداوند نیں ارام دے بادشاہ کوشن رسعتیم نوں عتنی ایل دے ہتھ وچ کر دِتا تے اوہ اوہدے اُتے حاوی ہو گیا ۔ ¹¹ ۱۱. ایس طراں دیس وچ قنز دے پُتر عتنی دے مرن تک چالھ سال سوکن رہیا۔ ¹² ۱۲. بنی اسرائیل نیں فیر اک واری خداوند دیاں نظراں وچ بدی کیتی تے اوہناں دی بدی دے سببو ں خداوند نیں موآب دے بادشاہ عجلون نوں اسرائیل اُتے حاوی کر دِتا۔ ¹³ ۱۳. عجلون بنی امون تے بنی عمالیق نوں اپنے نال لے کے آیا تے اسرائیل اُتے وار کر کے کھجوراں دے شہر اُتے قبضہ کر لیا۔ ¹⁴ ۱۴. بنی اسرائیل اٹھارہ ورھیاں تک موآب دے بادشاہ عجلون دے تابع رہے۔ ¹⁵ ۱۵. فیر بنی اسرائیل نیں خداوند اَگے بنتی کیتی تے اوہنے بنیامین دے گھرانے وچوں اک بندہ جیرا دت پُتر اہود نوں جیہڑا اپنے کھبے ہتھ توں کم لیندا سی اوہناں دا چھڈ اون والامتھیا گیا۔بنی اسرائیل نیں اوہدے راہیں موآب دے بادشاہ عجلون نوں ہدیے اپڑائے ۔ ¹⁶ ۱۶. اہود نیں کوئی ڈیڑھ فُٹ لمی دودھاری تلوار بنائی جنہوں اوہنے اپنے کپڑیاں ہیٹھا ں سجے پٹ نال بنھ لیا۔ ¹⁷ ۱۷. اوہنے اوہ ہدیے موآب دے بادشاہ عجلون دی خدمت وچ لیاندے جیہڑا چوکھا موٹا بندہ سی۔ ¹⁸ ۱۸. جد اہود ہدے چڑھا چکیا تے اوہنےہدیے اُٹھا ن والے خادماں نوں بھیج دِتا ۔ ¹⁹ ۱۹. تے آپیں پتھر دی اوس کان وَلو ں جیہڑی جلجال دے نیڑے سی پرت کے بادشاہ دے کول آیا تے آکھن لگا پئی اے بادشاہ میرے کول تیرے لئی اکِ بھید اے۔بادشاہ نیں آکھیا :اجے کجھ ناں آکھ ۔ایہہ سن کے بادشاہ دے سارے نوکر جیہڑے اوہدے کول سن۔دور چلے گئے ۔ ²⁰ ۲۰. بادشاہ اپنے ہوادا ر محل دے اُتلے کمرے وچ کلا بیٹھا رہویا سی۔اہود نیں اوہدے نیڑے جا کے آکھیا :میں خدا وَلوں تیرے لئی سنیا لیایا واں۔جیوویں ای بادشاہ اپنی تھاں توں اٹھیا۔ ²¹ ۲۱. اہود نیں اپنا کھبا ہتھ ودھایا تے اپنے سجے پٹ توں تلوار کھیچ کے بادشاہ دے ڈھیڈ وچ کھوب دِتا۔ ²² ۲۲۔ ایتھوں تک پئی اوہدی نوک دوجے پاسے جا نکلی سگوں پھل مُٹھ سمیت زخم وچ دھس گیا ۔اہود نیں تلوار پیچھاں ناں کھیچی تے چربی اوہدےپھل دے اُتے ولیٹی گئی۔ ²³ ۲۳. تد اہود برانڈے وچوں نکل آیا تے اُتلے کمریاں دے بوہیاں نوں بند کر کے اوہناں نوں جندرا مار دِتا۔ 4۲۴. جداوہ ٹُر گیا تد خادماں نیں آکے ویکھیا پئی اُتلے کمرے دے بوہیان نوں تالے لگے نیں ۔اوہ آکھن لگے پئی اوہ ضرور مکان دے ہیٹھلے کمرے وچ حاجت رفع کر رہیا ہووے گا۔ 5۲۵. اوہ باہر کھلوتے کھلوتے گھابر گئے تے جد اوہنے کمرے دے بوہے نہ کھولے تے ویکھیا پئی اوہنا دا آقا بھوئیں تے مویا پیا سی۔ ²⁶ ۲۶. تے اجے اوہ اوتھے ای کھلوتے سن پئی اہود بھیج گیا ۔اوہ پتھر دی کان دے کول ہوندا ہویا جان بچان لئی سیعرت وچ جا وڑیا۔ ²⁷ ۲۷. اوتھے اپڑکے اوہنے افرائیم دے پہاڑی دیس وچ نرسنگا وجایا تے بنی اسرائیل اوہدے نال دیاں پہاڑیاں اُتوں ہیٹھا اٹرے اتے اوہ اوہناں دے اَگے ٹُرن لگ پیا۔ ²⁸ ۲۸. اوہنے اوہنوں آکھیا : میرے پیچھے پیچھے ٹُرے آؤ کیوں جو خداوند نیں تہاڈے دشمناں مطلب پئی موآبیاں نوں تہاڈے ہتھ وچ کردِتا اے۔اوہ اوہدے پیچھے پیچھے ہیٹھا ں اُترے تے اوہناں نیں یردن دیاں وادیاں تے قبضہ کر لیا۔ جیہڑیان موآب وَل سن تے کسے نوں وی پار اُترن نئیں دِتا۔ ²⁹ ۲۹. اوس ویلے اوہناں نیں گھٹوگھٹ دس ہزار موآبیاں نوں جیہڑے سارے دے سارے ڈھیر طاقت والے تے سورما سن،قتل کر دِتا ۔اوہناں وچوں کوئی وی پیچھے ناں بچیا۔ ³⁰ ۳۰. اوس دیہاڑے موآب اُتے بنی اسرائیل داقبضہ ہو گیا تے دیس وچ اَسی ورھے تک امن چین رہیا۔ ³¹ ۳۱. اہود دے بادوں عنات دا پُتر شجر اُٹھیا جینے ڈھگے ہانکن والی سوٹی نال چھ سو فلستی مار دِتے۔اوہنے وی اسرائیلیاں نوں بچایا۔