¹ ۱۔ تے افرائیم دے پہاڑ وچ اک مرد سی۔ جہدا ناں میکا سی ۔ ² ۲۔ اوہنے اپنی ماں نوں آکھیا۔ پئی اوہ گیارہ سو مثقال چاندی جیہڑی تیرے کولوں لے گئے سن تے جنہاں بابت توں لعنت بھیجی جیہڑی میرے کن تیکر پہنچی۔ میرے کول نیں۔ اوہ میں لتے سن ۔ تاں اوہدی ماں نے آکھیا۔اے میرے پتر! خدا وند تینوں برکت دیوے۔ ³ ۳۔ تاں اوہنے چاندی دے اوہ یارہ سو مثقال اپنی ماں نوں موڑ دتے۔ تاں اوہدی ماں نے آکھیا۔میں ایہہ چاندی خدا وند لئی متھی سی ۔ پئی اپنے ہتھ ناؒ اپنے پتر نوں دے دیاں۔ تاں جو ایہدے نال اک گھڑیا ہویا تے اک ڈھلیا ہویا بت بناوے۔ ایس لئی میں تینوں دے دیندی ہاں۔ ⁴ ۴۔ جدوں اوہنے اوہ چاندی اپنی ماں نوں دے چھڈی۔ تاں اوہدی ماں نے چاندی وچوں دو سو مثقال لے کے اک کاری گر نوں دتے ۔۔ تاں اوہدے نال اوہنیں اک گھڑیا ہویا تے اک ڈھلیا ہویا بت بنایا۔ تے ایہہ دوویں میکا دے گھر وچ سن ۔ ⁵ ۵۔ تے میکا نے معبوداں لئی اک گھر وکھرا کیتا۔ تے اوہنے افود تے ترافیم بنائے۔ تے اپنے اک پتر دا ہتھ پاک کیتا ۔ تاں اوہ اوہدے لئی کاہن بنیا۔ ⁶ ۶۔ تے اوہناں دناں وچ اسرائیل دا کوئی بادشاہ نہیں سی۔ تے ہر اک بندہ جیہڑا اودیاں نظراں وچ چنگا لگدا ، اوہی کردا سی ۔ ⁷ ۷۔ تے یہودہ دے بیت الحم وچ یہودہ دے قبیلے وچوں اک جوان سی ، جو لاوی سی ۔ تے اوہ اوتھے رہندا سی ۔ ⁸ ۸۔ سو اوہ یہودہ دے بیت الحم دے شہر توں ٹُریا۔ پئی کتے ہور رہن دی تھاں لبھے۔۔ تاں اوہ پینڈا کردا ہویا افرائیم دے پہاڑ وچ میکا دے گھر آیا۔ ⁹ ۹۔ تاں میکا نے اوہنوں آکھیا۔ توں کتھوں آیا ایں۔ اوہنے آکھیا میں یہودہ دے بیت الحم وچوں اک لاوی ہاں ۔ تے نکلا ہاں۔ پئی جتے کتے تھاں لبھے ، اوتھے ای رہواں ۔ ¹⁰ ۱۰۔ تاں میکا نے اوہنوں آکھیا۔ توں میرے کول رہ۔ تے میرا پیو تے میرا کاہن ہو ۔ تے میں تینوں دس مثقال چاندی ورھے دی تے اک جوڑا لیڑے تے روٹی دیاں گا۔ ¹¹ ۱۱۔ تے لاوی اُس بندے نال رہن تے راضی ہویا۔ تے اوہ جوان اوہدے کول اوہدے پتراں وچوں اک وانگ سی ۔ ¹² ۱۲۔ تے میکا نے اُس لاوی دے ہتھ نوں پاک کیتا۔ تاں اوہ جوان اوہدا کاہن بنیا۔ تے میکا دے گھر وچ رہیا ۔ ¹³ ۱۳۔ تد میکا نے آکھیا۔ ہن میں جانیا۔ پئی خدا میرے نال نیکی کرے گا۔ کیوں جو میرا کاہن لادیاں وچوں اے۔