1 ଦିନେ ଯୀଶୁ ଆପଣା ଶିଷ୍ୟମାନଙ୍କ ସହିତ ଶସ୍ୟ କ୍ଷେତ୍ର ମଧ୍ୟଦେଇ ଚାଲି ଯାଉଥିଲେ, ସେଦିନ ବିଶ୍ରାମ ବାର ଥିଲା l ଶିଷ୍ୟମାନେ ଭୋକିଲା ଥିବାରୁ ଶସ୍ୟର ଶିଷାଁ ଛିଣ୍ଡାଇ ଖାଇବାକୁ ଲାଗିଲେ l ମୋଶାଙ୍କ ଏଥିପାଇଁ କିଛି ବିଧି ଥିଲା l 2 କିନ୍ତୁ କେତେକ ଫାରୁଶୀମାନେ ତାହା ଦେଖି ଯୀଶୁଙ୍କ ପାଖକୁ ଆସି ଆପତ୍ତି କଲେ, ଦେଖ ତୁମ୍ଭର ଶିଷ୍ୟମାନେ ଆମ୍ଭମାନଙ୍କ ବିଶ୍ରାମବାରରେ କାର୍ଯ୍ୟ କରୁଅଛନ୍ତି, ଯାହା ବ୍ୟବସ୍ଥା ଆମ୍ଭମାନଙ୍କ ଅନୁମତି ଦିଏ ନାହିଁ l 3 ମାତ୍ର ଯୀଶୁ ସେମାନଙ୍କୁ ଉତ୍ତର ଦେଲେ, ଶାସ୍ତ୍ରରେ ଏପରି ଲେଖା ଅଛି, ଆମ୍ଭମାନଙ୍କ ପୂର୍ବ ପୁରୁଷ ରାଜା ଦାଉଦ ଓ ତାଙ୍କର ସହଚରମାନେ ଯେତେବେଳେ ଭୋକିଲା ଥିଲେ, ଏହା କ’ଣ ପାଠ କରିନାହଁ l 4 ଦାଉଦ ମନ୍ଦିର ଭିତରେ ପ୍ରବେଶ କରି ଯାହା କେବଳ ଯାଜକମାନଙ୍କ ନିମନ୍ତେ ଯେଉଁ ପବିତ୍ର ରୋଟୀ ଥାଏ, ତାହା ଆଣି ଖାଇଲେ, ମାତ୍ର ଏହା ମୋଶାଙ୍କ ନିୟମ ବିରୁଦ୍ଧରେ ଥିଲା l 5 ଆଉ ମନ୍ଦିରରେ କାର୍ଯ୍ୟ କରୁଥିବା ଯାଜକମାନେ ବିଶ୍ରାମବାରରେ କାର୍ଯ୍ୟ କରିପାରନ୍ତି, ଏକଥା କ’ଣ ମୋଶାଙ୍କ ବ୍ୟବସ୍ଥା ପୁସ୍ତକରେ ତୁମ୍ଭେମାନେ କେବେ ପାଠ କରିନାହଁ? 6 ଏହାର ଅର୍ଥ ମୁଁ କହୁଅଛି ଶୁଣ, ମୁଁ ତୁମ୍ଭମାନଙ୍କୁ ନିକଟକୁ ଆସିଅଛି ଆଉ ମୁଁ ଏହି ମନ୍ଦିରଠାରୁ ମଧ୍ୟ ଶ୍ରେଷ୍ଠ ବା ମହାନ ଅଟେ l 7 ତୁମ୍ଭେମାନେ ଶାସ୍ତ୍ରରେ ଯେବେ ଈଶ୍ୱରଙ୍କ ବାକ୍ୟକୁ ବୁଝିଥାନ୍ତ ତେବେ ମୁଁ ତୁମ୍ଭମାନଙ୍କର ବଳିଦାନ ଅପେକ୍ଷା ଦୟାଳୁ ହୁଅ ବୋଲି ଯେ ଇଚ୍ଛା କରିଥାଏ ତେବେ ତୁମ୍ଭେମାନେ ନିର୍ଦ୍ଦୋଷକୁ ଦୋଷୀ କରି ନ ଥାନ୍ତ l 8 ମୁଁ ମନୁଷ୍ୟ ପୁତ୍ର, ବିଶ୍ରାମବାରରେ କ’ଣ କରିବାକୁ ହେବ ତାହା ଲୋକମାନଙ୍କୁ ଜଣାଇଥାଏ l 9 ତା’ପରେ ଯୀଶୁ ଉପାସନାଳୟକୁ ଗଲେ l 10 ସେ ସେଠାରେ ଜଣେ ଲୋକକୁ ଦେଖିଲେ ଯେ ତାହାର ଗୋଟିଏ ହାତ ଶୁଖି ଯାଇଅଛି, ଏଥିରେ ଫାରୁଶୀମାନେ ଯୀଶୁଙ୍କୁ ପଚାରିଲେ ବିଶ୍ରାମବାରରେ ସୁସ୍ଥ କରିବା ବିଧିସଙ୍ଗତ କି? ସେମାନେ ଯୀଶୁଙ୍କ ଯେପରି ଦୋଷୀ କରିପାରିବେ ଏଥିପାଇଁ ଏହା ପଚାରିଲେ l 11 ଯୀଶୁ ସେମାନଙ୍କୁ ଉତ୍ତର ଦେଲେ, ତୁମ୍ଭର ଯେବେ ଗୋଟିଏ ମେଣ୍ଢା ଥାଏ, ଓ ତାହା ବିଶ୍ରାମବାରରେ କୁଅରେ ପୋଡି ଯାଏ, ତୁମ୍ଭେ ତାହାକୁ ଉଦ୍ଧାର କରିବା ପାଇଁ କ’ଣ ସେଦିନ କାର୍ଯ୍ୟ କରିବ ନାହିଁ l 12 କିନ୍ତୁ ଜଣେ ମନୁଷ୍ୟ ଗୋଟିଏ ମେଣ୍ଢାଠାରୁ କେତେ ଶ୍ରେଷ୍ଠତର ଅଟେ l ତେବେ ବିଶ୍ରାମବାରରେ ଅନ୍ୟର ଉପକାର କରିବା ସମ୍ପୂର୍ଣ୍ଣ ବିଧି ସଙ୍ଗତ ଅଟେ l 13 ତାପରେ ଯୀଶୁ ସେହି ଲୋକଟିକୁ କହିଲେ, ତୁମ୍ଭର ହାତ ବଢାଅ ଆଉ ସେ ହାତ ବଢାଇବା କ୍ଷଣି ତାହାର ଶୁଷ୍କ ହସ୍ତଟି ଅନ୍ୟ ହସ୍ତ ପରି ସୁସ୍ଥ ହେଇଗଲା l 14 ଏହାପରେ ଲୋକେ ଯୀଶୁଙ୍କୁ ବାନ୍ଧି କରି ହତ୍ୟା କରିବା ଉଦ୍ଦେଶ୍ୟରେ ଏକ ଷଡଯନ୍ତ୍ର କରିବା ପାଇଁ ଫାରୁଶୀମାନଙ୍କ ଏକ ସଭା ଡାକିଲେ l 15 କିନ୍ତୁ ଯୀଶୁ ସେମାନଙ୍କର କଳ୍ପନା ବୁଝିପାରି ଆପଣାର ଶିଷ୍ୟମାନଙ୍କୁ ଘେନି ସେଠାରୁ ଚାଲି ଗଲେ ଆଉ ଅନେକ ଲୋକ ତାହାଙ୍କ ପଛେ ପଛେ ଗଲେ ପୁଣି ସେମାନଙ୍କ ମଧ୍ୟରେ ଯେତେ ରୋଗୀ ଥିଲେ ସେ ସମସ୍ତଙ୍କୁ ସୁସ୍ଥ କଲେ l 16 କିନ୍ତୁ ସେ ତାହାଙ୍କ ଆଶ୍ଚର୍ଯ୍ୟ କର୍ମର କଥା ସବୁ କାହାକୁ ନ କହିବା ପାଇଁ ସେମାନଙ୍କୁ ସଚେତନ କରାଇଲେ l 17 ତାହାଙ୍କ ସମ୍ବନ୍ଧରେ ବହୁ ବର୍ଷ ପୂର୍ବେ ଯିଶାଇୟ ଭବିଷ୍ୟତ ବକ୍ତାଙ୍କ ର ଲିଖିତ ଏହି ଭବିଷ୍ୟତ ବାଣୀ ସଫଳ ହେଲା, 18 ମୋହର ଦାସଙ୍କୁ, ମୋହର ମନୋନୀତ ବ୍ୟକ୍ତିଙ୍କୁ ଦେଖ, ଯାହାଙ୍କୁ ଆମେ ପ୍ରେମ କରୁ ଓ ତାହାଙ୍କଠାରେ ଆମ୍ଭେ ସନ୍ତୁଷ୍ଟ ଅଟୁ, ତାହାଙ୍କଠାରେ ଆମ୍ଭର ଆତ୍ମା ଅଧିଷ୍ଠାନ କରିଅଛି ଏବଂ ସେ ବିଭିନ୍ନ ଜାତିମାନଙ୍କର ନ୍ୟାୟ ବିଚାର କରି ସେମାନଙ୍କୁ ପରିତ୍ରାଣ ଦେବେ l 19 ସେ ଲୋକମାନଙ୍କ ସହିତ ବିବାଦ କରିବେ ନାହିଁ, କି ଚିତ୍କାର କରିବେ ନାହିଁ, କି ନଗର ମଧ୍ୟରେ ଉଚ୍ଚ ସ୍ଵରରେ କଥା କହିବେ ନାହିଁ, 20 ସେ ଦୁର୍ବଳମାନଙ୍କ ପ୍ରତି ଭଦ୍ରତା ଓ କ୍ଷୀଣମାନଙ୍କୁ ପରିତ୍ୟାଗ କରିବେ ନାହିଁ ଏବଂ ସେ ଲୋକମାନଙ୍କୁ ନ୍ୟାୟରେ ବିଚାର କରି ଦୋଷୀ ଓ ନିର୍ଦ୍ଦେଶ କରିବେ l 21 ଆଉ ସମଗ୍ର ଜାତି ତାହାଙ୍କ ଉପରେ ଭରଷା ରଖିବେ l 22 ଦିନେ ଲୋକମାନେ ଯେଉଁ ଭୂତଗ୍ରସ୍ତ ଲୋକ ଯେ କି ମୂକ ଓ ଘୁଁଙ୍ଗା ଥିଲା ତାହାକୁ ଯୀଶୁଙ୍କ ନିକଟକୁ ଆଣିଲେ ଆଉ ଯୀଶୁ ତାହାଠାରୁ ଭୂତାତ୍ମା ବାହାରକରି ତାହାକୁ ସୁସ୍ଥ କଲେ ତହିଁରେ ସେହି ଲୋକଟି କଥା କହିଲା ଓ ଦୃଷ୍ଟି ଫେରି ପାଇଁ ସବୁ ଦେଖି ପାରିଲା l 23 ଏହି ଆଶ୍ଚର୍ଯ୍ୟ କର୍ମ ଦେଖି ଲୋକମାନେ କହିବାକୁ ଲାଗିଲେ ଏହି ବ୍ୟକ୍ତି ଦାଉଦଙ୍କ ବଂଶଜ ମସୀହ ଅଟନ୍ତି କି? ଯାହାଙ୍କର ଅପେକ୍ଷାରେ ଆମ୍ଭେମାନେ ଅଛୁ? 24 କିନ୍ତୁ ଫାରୁଶୀମାନେ ଏହି ଆଶ୍ଚର୍ଯ୍ୟ କର୍ମ କଥା ଶୁଣି କହିଲେ, ସେ ଭୂତମାନଙ୍କ ରାଜା ଶୟତାନର ଶକ୍ତିରେ ଭୂତ ଛଡାଇ ପାରୁଅଛି ମାତ୍ର ଏ ଈଶ୍ଵର ନୁହେଁ l 25 ମାତ୍ର ଫାରୁଶୀମାନେ ମନରେ କ’ଣ ଭାବୁଅଛନ୍ତି ଏହା ଯୀଶୁ ସେହି କ୍ଷଣି ଜାଣି ପାରି ଉତ୍ତର ଦେଲେ, ଯଦି ଗୋଟେ ରାଜ୍ୟର ଲୋକେ ଅନ୍ୟ ରାଜ୍ୟର ସହିତ ଯୁଦ୍ଧ କରନ୍ତି, ଆଉ ସେମାନେ ସେମାନଙ୍କ ରାଜ୍ୟକୁ ବିନାଶ କରନ୍ତି l ଯଦି କୌଣସି ନଗର ବା ପରିବାର ବିଭକ୍ତ ହୋଇ ନିଜ ନିଜ ବିରୁଦ୍ଧରେ ଉଠନ୍ତି ତେବେ ତାହା ଆଉ ତିଷ୍ଠି ପାରେ ନାହିଁ l 26 ସେହିପରି ଶୟତାନ ଯେବେ ଶୟତାନକୁ ଛଡାଏ, ଏବେ ସେ ଆପଣା ବିରୁଦ୍ଧରେ ଯୁଦ୍ଧ କରୁଅଛି ଓ ଆପଣାର ରାଜ୍ୟକୁ ନିଜେ ବିନାଶ କରିଅଛି l 27 ପୁଣି ତୁମ୍ଭମାନଙ୍କ କହିବା ଅନୁସାରେ ମୁଁ ଯଦି ଶୟତାନର ଶକ୍ତିରେ ଭୂତ ଛଡାଉ ଅଛି, ତେବେ ତୁମ୍ଭମାନଙ୍କ ଶିଷ୍ୟମାନେ ମଧ୍ୟ କାହା ଶକ୍ତିରେ ଭୂତ ଛଡାଉ ଅଛନ୍ତି? ତେବେ ସେମାନେ ହିଁ ତୁମ୍ଭର ଅଭିଯୋଗରେ ଉତ୍ତର ଦିଅନ୍ତୁ l 28 କିନ୍ତୁ ମୁଁ ଯେବେ ଈଶ୍ଵର ଦ୍ଵାରା ଭୂତ ଛଡାଉ ଥାଏ, ତେବେ ତ ତୁମ୍ଭମାନଙ୍କ ମଧ୍ୟରେ ଈଶ୍ଵରଙ୍କ ରାଜ୍ୟ ଆସିଗଲାଣି l 29 ମୁଁ ଯେ କହିରେ ଭୂତାତ୍ମାମାନଙ୍କୁ ବାହାର କରୁଅଛି, ଏହା ତୁମ୍ଭମାନଙ୍କୁ ଦେଖାଇ ଅଛି l ଗୃହର ବଳିଷ୍ଠ ଯେପର୍ଯ୍ୟନ୍ତ ବନ୍ଧା ଯାଇ ନାହିଁ ସେ ପର୍ଯ୍ୟନ୍ତ କେହି ତାହା ଗୃହରେ ପ୍ରବେଶ କରି ପାରିବ ନାହିଁ, ମାତ୍ର ଯେତେବେଳେ ତାହାକୁ ବନ୍ଧା ଯାଏ, ସେତେବେଳେ ଲୋକେ ଗୃହରେ ପଶି ଗୃହରେ ଥିବା ସମସ୍ତ ବିଷୟକୁ ହରଣ କରିନେଇପାରିବେ l 30 ଯେ ମୋହର ସପକ୍ଷ ନୁହେ ସେ ମୋର ବିପକ୍ଷରେ ଅଛି ଆଉ ଯେ ମତେ ସାହାଯ୍ୟ କରେ ନାହିଁ ସେ ମୋହର ଅନିଷ୍ଟ କରୁଅଛି l 31 ତୁମ୍ଭେମାନେ କହୁଅଛ ପବିତ୍ର ଆତ୍ମାଙ୍କ ଦ୍ଵାରା ସେ ମନ୍ଦ ଆତ୍ମାକୁ ବାହାର କରୁନାହିଁ l ଆଉ ମୁଁ ତୁମ୍ଭକୁ ଏହା କହୁଅଛି, ଯଦି କେହି କାହାର ଅପମାନ କରେ, ତେବେ ଈଶ୍ଵର ତାହାକୁ କ୍ଷମା କରିବେ, କିନ୍ତୁ ଯେ ପବିତ୍ର ଆତ୍ମାଙ୍କୁ ଦୁଃଖ ଦିଏ ଈଶ୍ଵର ତାହାକୁ କ୍ଷମା କରିବେ ନାହିଁ l 32 ଖ୍ରୀଷ୍ଟଙ୍କ ବିରୁଦ୍ଧରେ ନିନ୍ଦା କିମ୍ବା ଅନ୍ୟ ଯେକୌଣସି ପାପ କ୍ଷମା ଦିଆ ଯାଇ ପାରିବ | ସବୁ ପାପର କ୍ଷମା ଅଛି, ମାତ୍ର ପବିତ୍ର ଆତ୍ମାଙ୍କ ବିରୁଦ୍ଧରେ ନିନ୍ଦା ଜନିତ ପାପକୁ ଈଶ୍ୱର ଇହ ଜଗତରେ କି ପର ଜଗତରେ କ୍ଷମା କରିବେ ନାହିଁ | 33 ଯେତେବେଳେ ତୁମ୍ଭେ ଏକ ଫଳନ୍ତି ଗଛର ଫଳକୁ ଦେଖ, ତାହା ଭଲ କି ମନ୍ଦ ଜାଣି ପାରି ଥାଅ | ଯଦି ଫଳ ଭଲ ତେବେ ତୁମ୍ଭେ ଗଛଟିକୁ ଭଲ କହିଥାଅ, ଆଉ ମୁଁ ଯଦି ଭଲ କର୍ମ କରୁଅଛି, ତେବେ ତାହା ଭଲ କି ମନ୍ଦ ତୁମ୍ଭେମାନେ ଜାଣିଅଛ | 34 ତୁମ୍ଭେମାନେ ତ ବିଷଧର ସର୍ପର ସନ୍ତାନ, ତୁମ୍ଭେମାନେ କେବେହେଲେ ଉତ୍ତମ କହି ଜାଣ ନାହିଁ, କାରଣ ତୁମ୍ଭେମାନେ ଦୁଷ୍ଟ ଅଟ | ମନୁଷ୍ୟର ହୃଦୟରେ ଯାହା ଥାଏ, ତାହା ସେ କରିବା ଦ୍ୱାରା ପ୍ରକାଶ ପାଏ | 35 ଉତ୍ତମ ବ୍ୟକ୍ତି ସର୍ବଦା ଉତ୍ତମ କଥା କହେ, କାରଣ ଉତ୍ତମ ମନୁଷ୍ୟର ଉତ୍ତମ କଥାବାର୍ତ୍ତା ତାହାର ଅନ୍ତରସ୍ଥ ଉତ୍ତମ ଭଣ୍ଡାରରୁ ଉତ୍ତମତା ପ୍ରକାଶ କରେ, ଆଉ ମନ୍ଦ ଲୋକ ସର୍ବଦା ମନ୍ଦ କଥା କହିଥାଏ, କାରଣ ମନ୍ଦ ମନୁଷ୍ୟ ତା’ହୃଦୟର ମନ୍ଦ ଭଣ୍ଡାରରୁ ମନ୍ଦତା ପ୍ରକାଶ କରେ | 36 କିନ୍ତୁ ମୁଁ ତୁମ୍ଭମାନଙ୍କୁ କହୁଛି, ତୁମ୍ଭମାନଙ୍କ ପ୍ରତ୍ୟେକ ଅସାର କଥାବାର୍ତ୍ତା ପାଇଁ ମହା ବିଚାର ଦିନରେ ତୁମ୍ଭମାନଙ୍କୁ ହିସାବ ଦେବାକୁ ପଡିବ | 37 ଆଉ ଈଶ୍ଵର ତୁମ୍ଭମାନଙ୍କ କଥାବାର୍ତ୍ତା ଦ୍ଵାରା ତୁମ୍ଭମାନଙ୍କୁ ମହାବିଚାର ଦିନରେ ଧାର୍ମିକ ବା ଅଧାର୍ମିକ ବୋଲି ଦୋଷୀ ସାବ୍ୟସ୍ତ କରିବେ | 38 ଥରେ କେତେକ ଫାରୁଶୀ ଓ ଶାସ୍ତ୍ରଜ୍ଞ ଯୀଶୁଙ୍କ ନିକଟକୁ ଆସି ପଚାରିଲେ, ହେ ଗୁରୁ, ଆପଣଙ୍କୁ ଯେ ଈଶ୍ଵର ପଠାଇଅଛନ୍ତି, ଏହାର ପ୍ରମାଣ ସ୍ଵରୂପେ ଆମେ ତୁମ୍ଭଠାରୁ ଏକ ଆଶ୍ଚର୍ଯ୍ୟ କର୍ମ ଦେଖିବାକୁ ଚାହୁଁଛୁ | 39 ମାତ୍ର ଯୀଶୁ ସେମାନଙ୍କୁ କହିଲେ, ତୁମ୍ଭେମାନେ ମୋ’ଠାରେ ଅନେକ ଆଶ୍ଚର୍ଯ୍ୟର କର୍ମ ଦେଖିସାରିଅଛ | ତୁମ୍ଭେମାନେ ତ ଦୁଷ୍ଟ ଓ ଈଶ୍ୱରଙ୍କ ଉପାସନା ବିଶ୍ୱସ୍ତ ଭାବରେ କରୁନାହଁ, ତଥାପି ଈଶ୍ୱର ମୋତେ ପଠାଇଅଛନ୍ତି କି ନାହିଁ ଏହାର ପ୍ରମାଣ ଚାହୁଁ ଅଛ? କିନ୍ତୁ ଈଶ୍ୱର ଭାବବାଦୀ ଯୂନସଙ୍କ ଘଟଣା ଦେଇ ତୁମ୍ଭମାନଙ୍କୁ ଆଶ୍ଚର୍ଯ୍ୟ କର୍ମ ଦେଖାଇ ଅଛନ୍ତି | 40 ଯୂନସ ଯେପରି ତିନିଦିନ ଓ ତିନି ରାତି ଏକ ବୃହତ୍ ମାଛର ଉଦରରେ ଈଶ୍ୱରଙ୍କ ଆଦେଶ କ୍ରମେ ଥିଲେ, ସେହିପରି ଖ୍ରୀଷ୍ଟ ମଧ୍ୟ ପୃଥିବୀ ଗର୍ଭରେ ତିନିଦିନ ଓ ତିନି ରାତି ରହିବେ ଓ ଈଶ୍ଵର ତାହାଙ୍କୁ ତୃତୀୟ ଦିନରେ ମୃତ୍ୟୁରୁ ଉଠାଇବେ | 41 ମହାବିଚାର ଦିନରେ ନିନିବୀର ଲୋକେ ଏହି ଜାତି ବିରୁଦ୍ଧରେ ଉଠି, ତାହାକୁ ଦୋଷୀ ସାବ୍ୟସ୍ତ କରିବେ, କାରଣ ଯେତେବେଳେ ଯୂନସ ସେମାନଙ୍କ ନିକଟରେ ପ୍ରଚାର କଲେ, ସେତେବେଳେ ସେମାନେ ଅନୁତାପ କରିଥିଲେ | ଅଥଚ ଯୂନସଙ୍କ ଅପେକ୍ଷା ମହାନ୍ ଜଣେ ବ୍ୟକ୍ତି ଏଠାରେ ଅଛନ୍ତି, ଆଉ ତୁମ୍ଭେମାନେ ତାହାଙ୍କଠାରେ ବିଶ୍ୱାସ କରୁ ନାହଁ | 42 ମହା ବିଚାର ଦିନରେ ମଧ୍ୟ ଶିବା ଦେଶର ରାଣୀ ଏହି ଜାତି ବିରୁଦ୍ଧରେ ଉଠି ତାହାକୁ ଦୋଷୀ ସାବ୍ୟସ୍ତ କରିବେ | କାରଣ ସେ ଇସ୍ରାଏଲ ଦେଶର ଦକ୍ଷିଣ ପ୍ରାନ୍ତରୁ ଆସି ଶଲୋମନଙ୍କ ବିଜ୍ଞ ଉପଦେଶ ଶୁଣିବା ପାଇଁ ଦୂର ଦେଶରୁ ଆସିଥିଲେ, ଅଥଚ଼ ବର୍ତ୍ତମାନ ଶଲୋମନଙ୍କ ଅପେକ୍ଷା ମହାନ୍ ଜଣେ ବ୍ୟକ୍ତି ଏଠାରେ ଅଛନ୍ତି, ଆଉ ତୁମ୍ଭେମାନେ ତାହାଙ୍କଠାରେ ବିଶ୍ୱାସ କରୁ ନାହଁ ! 43 ଭୂତାତ୍ମା ଯେତେବେଳେ ଜଣେ ମନୁଷ୍ୟଠାରୁ ବାହାରି ଯାଏ, ସେତେବେଳେ ସେ ବିଶ୍ରାମ ପାଇବା ନିମନ୍ତେ ଚାରି ଆଡେ ଘୁରି ବୁଲେ, ଆଉ ସେ ଯେତେବେଳେ କାହାରିକୁ ନ ପାଏ, 44 ସେତେବେଳେ ସେ ବିଶ୍ରାମ ନ ପାଇ କହେ, ମୁଁ ଯେଉଁ ମନୁଷ୍ୟ ଠାରୁ ବାହାରି ଆସିଥିଲି, ତାହା ନିକଟକୁ ଫେରି ଯିବି | ଆଉ ସେ ଫେରି ଆସି ଯେତେବେଳେ ଦେଖେ ଯେ, ତାହାରିଠାରେ ପରମେଶ୍ୱରଙ୍କ ଆତ୍ମା ନାହାନ୍ତି, 45 ସେତେବେଳେ ସେହି ଦୁଷ୍ଟାତ୍ମା ତାହାଠାରୁ ଅଧିକ ଶକ୍ତିଶାଳୀ ଆଉ ସାତୋଟି ଭୂତାତ୍ମାମାନଙ୍କୁ ସଙ୍ଗରେ ଆଣି ସେହି ମନୁଷ୍ୟର ମଧ୍ୟରେ ପ୍ରବେଶ କରି ବାସ କରନ୍ତି | ଫଳରେ ସେହି ଲୋକର ପ୍ରଥମ ଦଶା ଅପେକ୍ଷା ଶେଷ ଦଶା ଅଧିକ ମନ୍ଦ ହୁଏ | 46 ଯୀଶୁ ଏକ ଜନ ଗହଳି ଗୃହରେ ଥାଇ ଲୋକମାନଙ୍କୁ ଉପଦେଶ ଦେଉଥିବା ସମୟରେ, ତାଙ୍କର ମାଁ ଓ ଭାଇମାନେ ଆସି ବାହାରେ ଠିଆ ହୋଇ ତାଙ୍କ ସହିତ କଥାବାର୍ତ୍ତା କରିବାକୁ ଇଚ୍ଛା କରୁଥିଲେ, 47 ଏଣୁ କେହି ଜଣେ ଆସି ତାଙ୍କୁ ଏହା ଜଣାଇ କହିଲେ, ଆପଣଙ୍କ ସହିତ କଥାବାର୍ତ୍ତା କରିବାକୁ ଆପଣଙ୍କ ମାଁ ଓ ଭାଇମାନେ ବାହାରେ ଅପେକ୍ଷା କରିଅଛନ୍ତି | 48 ସେଥିରେ ଯୀଶୁ ସେହି ଲୋକକୁ କହିଲେ, ପ୍ରକୃତରେ କେଉଁମାନେ ମୋର ମାଁ ଓ ଭାଇମାନେ ଅଟନ୍ତି, ତାହା ମୁଁ ତୁମ୍ଭମାନଙ୍କୁ କହୁଅଛି | 49 ଆଉ ସେ ଆପଣା ଶିଷ୍ୟମାନଙ୍କ ଆଡକୁ ହାତ ଦେଖାଇ କହିଲେ, ଦେଖ, ଏମାନେ ହିଁ ପ୍ରକୃତରେ ମୋର ମାଁ ଓ ଭାଇମାନେ | 50 ଏଣୁ ଯେ କେହି ମୋହର ସ୍ଵର୍ଗସ୍ଥ ପିତାଙ୍କର ଆଜ୍ଞା ପାଳନ କରେ, ସେ ହିଁ ପ୍ରକୃତରେ ମୋର ଭାଇ, ଭଉଣୀ ଓ ମାଁ |