¹ Тер цагт Иисус онһцд орад, теңгс һатлад эврәннь балһснд ирв. ² Терүн тал сүүдр гемтә кү кевтртәһинь авч ирв. Иисус теднә иткл үзәд, сүүдр гемтә күүнд келв:«Көвүн, серг! Чамд чини килнцс тәвгдҗәнә.» ³ Тиигхлә зәрм дегтр бичдг улс ухалҗ:«Эн бийән Бурхнла дүңгцүлҗәнә.» ⁴ Теднә ухан – санаһинь медәд Иисус келв: «Тана зүркнд яһад хар санан орҗахм?» ⁵ Ю келхд амр: «Чини килнц тәвдгдҗәнә эс гиҗ босад йов?» ⁶ Зуг тадн медх зөвтәт, Күмни Көвүн һазр деер килнцс тәвх йоста. Тегәд Иисус сүүдр гемтә күүнд келв: « Бос, эврәннь кевтрән авад герүрн хәр.» ⁷ Тернь босад герүрн хәрв. ⁸ Бурхн күүнд тиим йос өгснднь әмтн алң болад, Бурхиг магтад бәәцхәв. ⁹ Тендәс Иисус йовҗ йовад, Матфей гидг нертә кү үзв. Тер алв цуглулдг ормд сууҗ. Иисус терүнд келв:«Намаг дахад йов.» Матфей босад Терүнә ардаснь йовҗ. ¹⁰ Иисус герт кевтсн цагт дала алв цуглулдг болн килнцтә улс ирәд, Терүнтә болн Терүнә сурһульчнрин өөр сууҗ. ¹¹ Фарисеймуд энүг үзәд, Иисусин сурһульчнрт келв: « Тана Багш мөңг цуглулдг болн килнцтә улста юңгад хот ууҗахмб?» ¹² Иисус энүг соңсчкад, теднд келв: «Гемтә улст эмч кергтә, эрүл улст эмч керго.» ¹³ Тадн ю хәәҗәхән медәд дасҗ автн – хәәрлт эс гиҗ бәрц кергтәй? Би чик үнн седклтә улсиг цеврүлхин төлә дуудхар ирсн угав, килнцтә улсиг дуудхар ирүв.» ¹⁴ Иисус тал уснд кирслдг Иоанна сурһульчнр ирәд сурв: «Юңгад мадн болн фарисеймуд Бурхнд дала өдр нерәднәвидн, зуг Тана сурһульчнр Бурхнд өдрмүд нерәдхш?» Иисус эднд келв:«Хүрм болҗасн цагла күргнә өөр бәәсн үүрмүднь гейүрәд бәәхий? ¹⁵ Үүрмүдәс күргнь булаһад авх цаг ирхлә, тегәд тедн Бурхндан өдрмүд нерәдх. ¹⁶ Кен чигн хуучн хувцнд шин халас тәвхш, юңгад гихлә шин халасн хуучнас тасрад шуурхань улм ик болх. ¹⁷ Шин чаһр хуучн бортхд кедм биш. Юңгад гихлә хуучн бортхс шуурхла чаһр асхрна, бортхс үрнә. Тегәд хойраһинь хадһлхин төлә шин чаһран шин бортхд кедмн.» ¹⁸ Иисус теднд энүнә тускар келҗәсн цагт Терүнүр нег ахлач ирәд, өмннь сөгдәд келв: «Мини күүкн ода өңгрн гиҗәнә, кемр Та ирәд эврәннь һаран күргхлә, күүкм әмдрх.» ¹⁹ Иисус босад, Эврәннь сурһульчнртаһан терүг дахв. ²⁰ Иисус йовҗ йовсн цагла арвн хойр җилдән цусна гемәр муулян эдлсн нег гергн ардаснь өөрдәд, Терүнә хормаднь һаран күргв. ²¹ Юнгад гихлә тер дотран ухалад авчксмн бәәҗ: «Би Терүнә хувцнднь һаран күргхлә – эдгхүв.» ²² Иисус ардан хәләчкәд, энүг үзәд келв: «Күүкн Мини бичә әәһәд бә. Чини иткл чамаг аврв!» Күүкд күн тер дарунь эдгҗ одв. ²³ Иисус ахлачин герт ирәд, күүкиг оршахин төлә дуудсн бүшкүр татдг болн үүмҗәсн әмтиг үзв. ²⁴ Иисус келв: «Гертәс һарцхатн, юңгад гихлә күүкн өңгрсн уга, унтҗ кевтнә.» Тенд бәәсн улс наад бәрәд инәлдв. ²⁵ Әмтиг һарһад көөчкхлә, Иисус орҗ ирәд, терүнә һараснь авхла, күүкн босв. ²⁶ Эн өвәрцин тускар цуг һазрар соңсгдв. ²⁷ Иисус тендәс ирҗ йовхла, Терүнә ард хойр сохр күн дахад йовҗ хәәкрв: «Давидин Көвүн Иисус, мадниг хәәрлтн.» ²⁸ Иисус герт орхла хойр сохр күн Терүнүр өөрдв. Иисус теднд келв: «Энүг Би кеҗ чадхв гиҗ тадн иткҗәнәт?» Тедн Терүнд келв: «Э-э, күндтә Деед Эзн.» ²⁹ Тиигхлә Тер теднә нүднднь һар күрәд келв: «Тана иткмҗәр болтха!» ³⁰ Теднә нүднь үздг болв. Иисус теднд закв: «Бичә күүнд келтн.» ³¹ Зуг тедн һарчкад, Терүнә тускар цуг тер һазрар келәд йовҗ. ³² Тер хойр һархла, Терүнүр келн уга хар сәкүснд авлгдсн кү дахулҗ ирв. ³³ Хар сәкүсн Терүнәс көөгдсн хөөн, келн уга күн келдг болв. Әмтн алң болад келв:«Иим өвәрц юмн Израильд төрүц болдго бәәсмн.» ³⁴ Фарисеймуд болхла келҗ:«Тер эрлгин эзнә чидләр хар сәкүсдиг көөҗәнә.» ³⁵ Иисус цуг балһсдудар, селәдәр йовад, синагогмудт сурһад, Бурхна Орн- нутгин туск Байрта зәңг келәд болн цуг гемтә улсиг эдгәһәд бәәсмн. ³⁶ Тиигәд Иисус цуглрсн олн улс үзәд, теднд санань зовад, Тер тедниг хармнв, юңгад гихлә муулян эдләд тарсн улс хөөч уга хөд кевтә бәәсмн. ³⁷ Тегәд тер Эврәннь сурһульчнртан келв: «Урһц дала, зуг тәрә хаддг улс баһ. ³⁸ Тегәд Эврәннь тәрәһән хаддг улсиг йовултха гиҗ, урһцин Деед Эзиг сурцхатн.»