¹ Иисус уулас дорагшан буухла, дала əмтн Терүг дахв. ² Терүнүр хальдвр гемтə күн өөрдəд, сөгдҗ келв: «Зерг! Дурн бəəхлə, намаг цеврлҗ чадҗанач». ³ Иисус һаран суңһад, əрə терүг көңдəһəд келв: «Цевр бол», - гемтə күн дарунь тер гемəсн цеврлгдв. ⁴ Иисус терүнд келв: «Күүнд бичə кел, бийəн Бурхна ах əрүн күүнд үзүл, Моисеин өгсн закврар бəрцинь авч од, тер теднд герчлһ болх». ⁵ Иисус Капернаумд ирхлə, Терүнүр цергин толһач өөрдəд келв: ⁶ «Зерг! Мини зарц тəкрсн цогцта гертəн кевтнə, йир икəр зовҗана.» ⁷ Иисус терүнд келв: «Би ирəд, терүг эдгəнəв». ⁸ Цергин ахлач хəрү өгв: «Зерг! Таниг эврəннь герт орулх, би нертə – төртə күн бишв, зуг нег үг келхлəтн, мини зарц эдгҗ одх. ⁹ Яһад гихлə, би йосар бəəдг күмб, болв мини заквр авдг цергчнр бəəнə. Негнднь «Йов» гихлə – тер йовна. Талданд келнəв: «Нааран йов» - тер ирнə. Зарцдан келнəв: «Энүг ке» - кенə.» ¹⁰ Келсиг соңсчкад, Иисус алң болһад, ардаснь йовсн улст келв: «Үнəр келҗ бəəнəв: Израильд тиим иткл олҗ чадсн угав. ¹¹ Таднд келҗəнəв, дала əмтн зүн үзгəс болн барун үзгəс ирəд, Авраамин, Исаакин, Иаковин өөр Бурхна орн-нутгт суух. ¹² Бурхна Теңгрин Хаана нутгт бəəсн көвүд көөгдəд тамд хайгдх. Тендəс уульһн болн шүдин тачкнлһн соңсгдх.» ¹³ Иисус цергин ахлачд келв: «Йов, чини итклəр чамд болх». Тер цагла түүнə зарц эдгв. ¹⁴ Иисус Пётрин герт орхла, халута кевтсн хадм экинь бəəснь үзҗ. ¹⁵ Иисус терүнə һарт, Эврəннь һаран əрə күргхлə – халунь уурч одв. Гергн босад хотан болһв. ¹⁶ Асхн ирхлə, Иисусур олн шулмсд авлгдсн əмтиг көтлəд авч ирв. Тер үгəрн шулмсиг көөһəд һарһв, гемтə улсиг эдгəв. ¹⁷ Исаин келсəр болтха гиһəд: «Эн бийдəн мана гем авад йовв». ¹⁸ Иисус өөрəн дала əмт үзчкəд, заквр сурһульчнртан өгв – талдан үзгүр усчх. ¹⁹ Нег Бурхна Зака меддг күн Иисус тал өөрдəд келв: «Багш! Хамаран та одв чигн, би Таниг дахнав.» ²⁰ Иисус терүнд келв: «Аратд нүкн бəəнə, теңгрин шовудт үр бəəнə, Күмни Көвүнд толһаһан тəвдг орм уга.» ²¹ Талдан сурһульчнь Терүнд келв: «Зерг! Нанд зөвшəлəн өгтн, эцкəн оршахар седҗəнəв.» ²² Болв Иисус терүнд келв: «Намаг дахад йов, үксн əмтн үксəн оршатха». ²³ Иисус оңһцд орсна хөөн, сурһульчнр ардаснь орцхав. ²⁴ Теңгст һалв салькн үлəв, усн дольглад оңһциг дүүргв, болв Иисус серсн уга. ²⁵ Тиигхлə Терүнə сурһульчнр Терүн тал өөрдəд, Терүг серүлəд келв: «Зерг! Мадниг харсч ав!» ²⁶ Иисус теднд келв: «Яһад тадн əəҗəхмт, баһ итклтə əмтн?». Хөөнь Эн босад, салькн теңгс хойриг зогсав. Тагчг болв. ²⁷ Əмтн алң болад келцхəв: «Эн кемб, салькн чигн, теңгс чигн Энүнə үлмəд орна.» ²⁸ Иисус талдан көвəд Гергесинск һазрт ирхлə, тенд шулмсар авлгдсн хойр күн оршалһна яршгас һарцхав. Тедн йир догшн билə, əмтн тер хаалһар йовхдан əəдг билə. ²⁹ Шулмс хəəрцхəв: «Маднд юмб, Иисус, Бурхна көвүн? Та нааран эрт ирəд, мадниг зовахар бəəнəт?» ³⁰ Эднəс хол һазрт дала һахас хот хəəҗ йовла. ³¹ Шулмс Терүг сурцхав: «Мадниг көөхəр бəəхлə, һахас тал йовул.» ³² Иисус эднд келв: «Йовтн.» Тедн һарчкад, һахас дотр орцхав. Сүрг һахас һолын эрг деерəс теңгст орад үкҗ одцхав. ³³ Малчнр балһснур гүүһəд, тенд юн болсинь , шулмсудин тускар келҗ өгцхəв. ³⁴ Тиигхлə цуг балһснд бəəдг əмтн Иисусин өмн һарв. Терүг үзчкəд, эднə һазрас Терүг һархинь сурцхав.