¹ Күүнə тускар бичə му санад гемшəтн юңгад гихлə əмтнə тускар тадн му санад гемшəһəд бəəхлə, тадниг бас гемшəх. ² Тадн медх зөвтəт: күн болһна келснь, кеснь, күцəснь хəрү тер күүнүр ирх. Юңгад гихлə тадн ямаран кемҗəлəр кемҗəлнəт , тиигҗ таднд кемҗəлгдх. ³ Яһад чи ахиннь нүднд бəəсн зорһс хəлəһəд бəəнəч? Зуг эврəннь нүднд мод бəəсинь үзҗəхн угач? ⁴ Чи яһҗ ахдан келхəр бəəхмч? Өглчн, би чини нүднəс зорһс һарһҗ авнав, эврə нүдн мод бəəтл? ⁵ Хойр чирəтə күн! Түрүлəд эврəннь нүднəс мод һарһчкад, яһҗ ахиннь нүднəс зорһс һарһҗ авхан медхич. ⁶ Əрүн юман нохаст бичə өгтн, сəəхн сувсиг һахасин өмн бичə хайтн, эс гиҗ тедн терүг көлəрн ишкəд, хамхлад, танур өөрдəд тадниг шуучх. ⁷ Суртн - таднд өгх. Хəəтн – олҗ авхт. Үүд цоктн — таднд сəкх. ⁸ Юңгад гихлə кен болвчн сурхла – авх, юм хəəсн – олх, үүд цокснд — сəкх. ⁹ Тадн дунд тиим күн бəəхий, терүнə көвүн эцкəсн өдмг сурхла чолу өгхий? ¹⁰ Эс гиҗ заһс сурхла, моһа өгхий? ¹¹ Тегəд та уурта бəəсн болвчн, эврəннь күүкдтəн сəн юм өгч чаднат, түүнəс үлүһəр тана Теңгрин Эцк сəн юм сурсн улст сəн юм өгх. ¹² Тегəд əмтнлə сə бəəх дурта болхла, тадн теднлə чиктəн бəəтн. Энүнд цуг Закан болн Əəлдəчнр. ¹³ Уутьхн үүдəр ортн, яһад гихлə өргн үүдн болн өргн хаалһ үклд авч ирнə. Дала əмтн эн хаалһар йовна. ¹⁴ Уутьхн үүдн болн цувг хаалһ җирһл тал йовулна, цөкн күн тер хаалһ олҗ авна. ¹⁵ Худл келдг əəлдəчəс бийəн хол бəртн, тедн танур хөөнə арс өмсəд ирнə, бийснь əəмшгтə чонмуд болҗана. ¹⁶ Тадн темсəрнь тедниг медхт. Уста үзм көглин моднас цуглулҗ болхий? Эс гиҗ лошхас инҗр цуглулҗ болхий? ¹⁷ Тегəд ямаран болв чигн сəн темснə модн – сəн темс өгнə, му темснə моднас му темс урһна. ¹⁸ Сəн темснə моднд му темсн урһхш, му моднас сəн темсн һархш. ¹⁹ Сəн темс өгдго мод болһниг чавчад һалд хайцхана. ²⁰ Аш сүүлднь тадн эдниг темсəрнь медхт. ²¹ Күн болһн Нанд: «Деед Эзн! Деед Эзн!» - гиһəд келсн бийнь, Бурхна Теңгрин нутгт оршго. Болв зуг Мини Теңгрин Эцкин таал күцəсн күн Бурхна Теңгрин нутгт орх.» ²² Тер өдр дала əмтн Нанд келх: «Тана Нерн деерəс мадн əмт эс сурһсмб? Тана Нерəр шулмсиг эс көөсмб? Тана Нерəр өврмҗтə йовдл һарһсм биший?» ²³ Тиигхлə теднд келнəв: «Таниг Би медҗəхшув. Нанас хол йовтн. Закаг эвдҗəх əмтн.» ²⁴ Тиигəд күн болһн Мини үг соңсад, терүг күцəхлə, ухата күүнлə дүңцүлнəв, тер күн эврəннь герəн чолун деер тосхв. ²⁵ Хур орвчн, һолын усн асхврчн, салькн үлəвчн тосхсн гер нурсн уга, яһад гихлə герин сүүрнь — чолун билə. ²⁶ Күн болһн Мини эн үг соңсҗахла болв Мини заавриг эс күцəхлə, элсн деер герəн тосхсн, муңхг күүнə бəəдлтə болна. ²⁷ Тер гер деер хур орад, һолын усн асхрад, салькн үлəһəд ирхлə, тосхсн гернь нурад унҗ одв. Гернь хамхрв, герин тарлһн йир ик билə. ²⁸ Иисус дасхҗах сурһулян келəд чилəхлə, əмтн йир икəр алң болцхав. ²⁹ Яһад гихлə Иисус тедниг Бурхнас авсн йостаһар сурһдг бəəсмн. Бурхна Зака умшдг əмтн болн фарисеймуд тиигҗ сурһдго билə.