¹ Əмтнд цаһан санаһарн нөкд болчкад, бийəн бичə əмтнə нүднд бууляд бəəтн, юңгад гихлə тиим улсиг Бурхн таасшго. Теднд Теңгрин Эцк ачлвр өгшго. ² Кемр ямаранчн күн эврəннь дурарн болн цаһан санаһарн талдан күүнд юм өгхлə, бичə əмтнд соңсхад бəəтн. Хойр чирəтə улс синагогд болн һаза нөкд болсн тускар келəд бийəн бууляд бəəцхəнə, юңгад гихлə тедн əмтн дунд бийəн туурулхар седнə. Үнəр таднд келҗəнəв: «Тедн ачвлран ода авчана.» ³ Чи күүнд нөкд болҗасн цагт зүн һарчн барун һар ю өгчəхинь бичə медтхə. ⁴ Тегəд чини хəəрлəд өгсн юмн нуувч болтха. Цуг нуувч юм үздг Теңгрин Эцк чамаг ачлх. ⁵ Тадн зальврхларн хойр чирəтə улсиг бичə дуратн. Тедн бийəн əмтнд үзүлхд дурта болад, синагогмудтан болн хаалһин керчлһнмүдəр зогсад зальврцхана. Үнəр таднд келҗəнəв: «Тедн ода белгəн авчана.» ⁶ Чи зальврхларн эврəннь хорадан орад, үүдəн хааһад авчкад, Теңгриннь Эцкдəн зальвр. Цуг нуувч юм үздг Тана Теңгрин Эцк чамаг ачлх. ⁷ Тадн зальврсн цагтан талдан келн улс дураһад үлү үг бичə келтн, Бурхн соңсх гиҗ санад, үлү үг бичə келтн. ⁸ Тедниг бичə дуратн, юңгад гихлə тана Теңгрин Эцктн тадниг сурад уга бəəтл таднд юн кергтəһинь меднə. ⁹ Тадн иигҗ зальвртн: «Мана Теңгрин Эцк, Тана Нернтн əрүн болтха! ¹⁰ Тана йосн иртхə! Тана эвəлтн теңгрт бəəснлə əдл һазр деер бүттхə! ¹¹ Эндр өдр маднд кергтə өдмг өгтн! ¹² Бидн яһҗ əмтнə килнцинь тəвнəвидн, тиигҗ Та мана килнциг тəвҗ өгтн. ¹³ Бичə мадниг сөрдг юмнла харһулыт, хар чидлəс гетлгит. Яһад гихлə, Тана Йосн, Тана чидл, Тана туурмҗ мөңкинд! Тиигтхə!» ¹⁴ Кемр тадн əмтнə геминь болн буру йовдлмуднь эс тəвхлə, тана Теңгрин Эцк бас буруһитн тəвшго. ¹⁵ Кемр тадн əмтнə геминь болн буру йовдлмуднь эс тəвхлə, тегəд тадниг Тана Эцк буруһитн болн гемитн бас тəвшго. ¹⁶ Бурхндан иткдг болн бийəн нерəдсн улсла əдл бичə болтн. Тедн Бурхндан өдр нерəдҗəхəн үзүлхəр, һундлта чирəһəрн əмтнд медүлнə, хот уулго, зальврад, Бурхндан өдрəн нерəднə. Тегəд тадн Бурхндан нерəдсн өдрмүдтəн хойр чирəтə улсиг бичə дуратн. Тедн болхла һундлта чирəһəн əмтнд үзүлəд, Бурхндан өдр нерəдҗəхəн медүлхəр седнə. Би үнəр келҗəнəв: «Тедн эврəннь ачлвран ода авчана.» ¹⁷ Бурхндан өдрмүд нерəдҗəсн цагт, чи толһаһан тослад эврəннь чирəһəн уһаһад, ¹⁸ эмтнд биш, нуувч юм үздг, Теңгрин Эцкдəн өдрмүд нерəдҗəхəн үзүл. Тегəд нуувч юм үздг чини Эцк чамаг ачлх. ¹⁹ Һазр деер зүсн зүүл байн зөөр бичə цуглултн. Зев болн гүр тедниг үрəҗəнə. Хулхачнр һазр малтад хулхална. ²⁰ Зөөрəн Теңгр деер хуратн. Тенд зев чигн, гүр чигн үрəшго, хулхач һазр малтҗ хулхалшго. ²¹ Юңгад гихлə зөөрəн хадһлсн ормд тана зүркн бəəнə. ²² Тана нүднтн – тана цогцин герл. Нүднт цевр болхла — тана цогцтн чигн цевр болх. ²³ Кемр тана нүднтн цевр эс болхла, тана цогцтн чигн хар болх. Чамд бəəсн герл хар болхла, тегəд харңһу ямаран бəəдлтə болх? ²⁴ Нег чигн күн хойр эзнд церглҗ чадшго. Яһад гихлə негнднь дурго болад, хойрдгчднь — дуран өгх. Эс гиҗ негнь дөңнəд, хойрдгчнь төртəн авшго. Тадн Бурхн мөңгн хойрт хамднь церглҗ чадшгот. ²⁵ Тегəд Би таднд келҗəнəв: « Ю идхəн, ю уухан, ю өмсхəн хəəһəд бичə зовтн. Тана седкл хотас деер биший? Цогц — махмудтн хувцнас деер биший? ²⁶ Теңгрт нисдг шовудиг хəлəхнтн. Тедн тəрə чигн тəрҗ өскхш, буудя хурадг ормд цуглулхш, тана Теңгрин Эцк тедниг асрад бəəнə. Тадн теднəс үнтə болн деер. ²⁷ Кен чигн күн бийəн кедү килмҗəд хəлəв чигн, нег тоха үлүһəр өслтəн немҗ чадхий? ²⁸ Хувцна тускар юңгад зовад бəəнəт? Кеер урһдг цецгəс хəлəхнтн. Тедн көдлхш, хувц уйҗ түрҗəхш. ²⁹ Би иигҗ таднд келҗəнəв: Соломон хан ямаран туурмҗта бəəсн бийнь теднлə əдл сəəхн хувцн уга билə. ³⁰ Тегəд теегт урһҗах цецгəсиг, маңһдур хумхарад бешт хайгдҗ одх ноһаг, Бурхн тиим сəəхн бəəдлтəһəр кеҗəхлə, баахн итклтə улс , тадниг түүнəс үлүһəр өмскх. ³¹ Тегəд тадн ю уухан, ю идхəн, ю өмсхəн? - бичə хəəтн, бичə зовтн. ³² Терүнə тускар келн-əмтн зовад бəəцхəнə. Зуг тана Теңгрин Эцктн таднд юн кергтəһинь меднə. ³³ Тадн түрүлҗ Бурхна йос болн Терүнə чик үнинь хəəцхəтн. Цуг наадк юмнь таднд немгдəд бəəх. ³⁴ Тегəд маңһдур «яахмб»- гиҗ бичə зовад бəəтн. Маңһдурк өдр бийнь бийəн олх. Өдр болһнд эврəннь килмҗлһн бəəдмн.