¹ Иисус олн кү үзчкəд, уул деер һарв. Уул деер суухлань, Терүн тал сурһульчнрнь өөрдв. ² Иисус тедниг сурһад келв. ³ Деед Эзнə төлə угатя болснь-кишгтə. ⁴ Һашудад уульснь — кишгтə. Бурхн тедниг төвкнүлх. ⁵ Номһн улс кишгтə болх юңгад гихлə тедн һазр эзлх зөвтə. ⁶ Йоста үн хəəһəд, шунҗ йовсн улс кишгтə юңгад гихлə тедниг үнəр цадхах. ⁷ Цаһан седклтəнь кишгтə юңгад гихлə тедн хəəрлгдх. ⁸ Цевр зүрктə улс кишгтə юңгад гихлə тедн Бурхиг үзх. ⁹ Эв - төвкнүн төлə бəəдг болн Терүг хəəдг улс кишгтə юңгад гихлə тедниг Бурхн Эврəннь үрдүд гиҗ нерəдх. ¹⁰ Үннə төлə көөгдсн улс кишгтə юңгад гихлə Бурхна Теңгрин орн-нутг теднə болх. ¹¹ Тадниг Нанас көлтə һутаһад, му келəд, көөһəд бəəхлə, тадн кишгтə болхт. ¹² Байрхҗ байрлтн юңгад гихлə тана ик ачлвр теңгр деер бəəнə. Тиим кевəр тана өмн бəəсн əəлдəчнриг көөдг билə. ¹³ Тадн - һазрин давсн. Кемр давсн амтан геехлə, кен амтынь хəрү орулҗ өгхмб? Тер давсн тус уга, тегəд энүг һарһад əмтнə көл дор хайчкна. ¹⁴ Тадн - нарта орчлңгин герл. Уулын ора деер бəəсн балһсн бултлҗ чадшго. ¹⁵ Шатасн шамиг деерəснь савар бүркдмн биш, болв терүг деегшəн тəвəд, əмтнд герл өгтхə гиҗ тəвнə. ¹⁶ Тиигҗ тана герл олн əмтнд герлттхə, əмтн тана цаһан саната кергүд үзəд, тана Теңгрин Эцкиг туурулх. ¹⁷ Намаг Бурхна зака болн əəлдəчнриг бəəдгинь уурулхар ирв гиҗ бичə сантн, уурулхар биш - күцəхəр ирв. ¹⁸ Таднд үнинь келҗəнəв: «Теңгр һазр хойр уга болтл, Бурхна закаһас нег чигн үзгнь уга болшго. Цугнь күцх. ¹⁹ Кен чигн Бурхна закаһас нег чигн бичкн тасрхаһинь хаҗһрар зааһад дасхла, тер Бурхна Теңгрин орн-нутгт хамгин бичкнд тоолгдх. Кен болвчн зааҗ өгсинь күцəхлə, Бурхна Теңгрин орн-нутгт алдр күн гиҗ нерəдгдх. ²⁰ Фарисеймуд болн зака бичдг багшнрас үлүһəр Бурхна таалынь эс күцəхлə, Бурхна Теңгрин орн-нутгт орҗ чадшгот. ²¹ Тадн соңссн болхт, юн гиҗ тадна өвкнрт келгдсинь: «Күүнə əм бичə тасл, күүнə əм таслсн күн зарһла харһх.» ²² Би болхла таднд келҗəнəв: « Кен чигн ах-дүүһəн хара зөңгдəн уурлснь тер зарһла харһх. Кен эврəннь ахдан « хоосн» гиҗ келхлə, терүнд синедрион зарһ кех, кен чигн «ухан уга» гиһəд келсн күн, тер халун тамд тусх зөвтə. ²³ Тегəд кемр чи Бурхндан бəрц авч ирҗ йовад, генткн зууран чини ах эс гиҗ дүүчн чамд һундлта бəəхинь санандчнь орхла, ²⁴ чи бəрцəн хооран тəвəд, хəрү эргəд, ахтаһан эвцлд. Дарунь ирəд, бəрцəн бəəрүлҗ өг. ²⁵ Кемр чамаг зарһчд авч йовхар седхлə, тер күүнлə хаалһдан эвцлд. Эс гиҗ тер күн чамаг зарһд бəрүлəд өгх. Тернь түүрмд суулһчкх.» ²⁶ Би чамд иигҗ келҗəнəв: «Түүрмəсн чи нег бичкн деншг күртл өрəн эс өгтлəн һарч чадшгоч.» ²⁷ Тадн соңслт, юн гиҗ тана өвкнрт келгдсмб: «Авсн авальдан үнн итклтə болтн.» ²⁸ Залу күн җилвтə болад, күүкн күн тал хəлəхлə, тер итклиг эврəннь зүркндəн терүнлə эвдҗəнə. ²⁹ Кемр чини барун нүдн чамаг җилвлтүлхлə, чи тер нүдəн бийəсн таслад авад хайчк. Юңгад гихлə чини цогцин өрəл зовлң үзхтхə. Өрəсн нүдтəһəн Бурхна Тенгрин орн -нутгт орсн чамд деер болх. ³⁰ Кемр барун һарчнь җилвлтүлҗ бəəхлə терүг чавчад хайчк. Өрəсн һартаһан Бурхна Тенгрин орн-нутгт орсн чамд деер болх. Бүкл мөчтəһəн халун тамд унсн дорхнь. ³¹ Бурхна заканд иигҗ келгдҗəнə: « Кемр кен болвчн эврəннь гергтəһəн салхла, залу күн гергндəн саллһна цаас өгтхə. ³² Би таднд келҗəнəв: «Кемр гергтəһəн залу күн салх дурн бəəхлə, болв гергнь үгəн бəрсн болхла, тер күн килнц һарһҗана. Залуһасн салсн герг авсн күн бас тиим килнц кеҗəнə. ³³ Дəкəд тадн юн гиҗ тана өвкнрт келгдснь соңслат: «Андһар бичə өг, болв Бурхндан өгсн андһаран күцə.» ³⁴ Би таднд келҗəнəв: « Андһар төрүц бичə өгтн: Теңгрəр чигн – Теңгр Бурхна ширə, ³⁵ Һазрар чигн – һазр Бурхна көлин тəвц , Иерусалимəр чигн – тер алдр Бурхна балһсн. ³⁶ Толһаһарн чигн бичə андһар өг. Чи нег чигн үсəн харлулҗ чадшгоч, эс гиҗ цаһаллҗ чадшгоч. ³⁷ Чини келсн үг «э-э» гисн болхла - тиим болтха. «Уга» гисн болхла - уга болтха. Түүнəс үлүнь - хортнас. ³⁸ Иигҗ бичəтə тадн соңслт : «Чамаг һундасн күүнəс -кезə чигн өшəһəн нек.» ³⁹ Би болхла таднд иигҗ келҗəнəв: « Өшəһəн бичə нек, чамаг барун халхарчн ташхла, зун халхан тəвҗ өг. ⁴⁰ Кен чамла зарһд орад, чамас киилгичн авхар бəəхлə, терүнд чи деерк хувцан чигн өг. ⁴¹ Чамаг нег дуунд йовий гихлə, хойр дуунд йов. ⁴² Юм сурснднь өг, чамас өгъяһəр сурхар бəəхлə, чи бичə булт. ⁴³ «Өөрхн бəəсн күүндəн дуран өг болн эврəннь хортндан дурго бол»-гиҗ бичəтəһинь тадн соңслт? ⁴⁴ Би болхла таднд келҗəнəв: «Хортндан дурта бол. Тадниг харасн улсиг йорəһəд бə. Таднд дурго улст сə кетн. Тадниг өлүлəд көөҗ йовсн улсин төлə зальвртн. ⁴⁵ Теңгрин Эцкин көвүд болхин төлə зальвртн. Юңгад гихлə Тер Эврəннь наран сəн седклтə улс деер болн хар саната улс деер һарһна. Бурхнд иткдг болн Бурхнд иткдго улс деер хур орулна. ⁴⁶ Тадн кемр тадн дурта улст дурлхла, тегəд тадн ямаран ачлвр күлəҗəнəвт? Алв цуглулдг улс тиигҗ эс кенə? ⁴⁷ Кемр тадн зуг эврəннь ахнр-дүүнртəһəн үнн седклəрн байрлҗ мендлҗəхлə, юн ончта юм кеҗəхмт? Буру бурхдудт иткдг улс бас тиигҗ кенə. ⁴⁸ Дуту уга, эркн чинрт күртн юңгад гихлə тана Теңгрин Эцктн дуту уга эркн чинртə.