¹ Иисус арвн хойр Эврәннь сурһульчнран дуудад, хар сәкүсиг көөдг болн әмтиг ямаран чигн гемәс эдгәх йос болн чидл өгв. ² Эн арвн хойр апостолмудын нерд: түрүнкнь — Симон Пётр гиҗ нерәддг. Терүнә ах – Андрей, Иаков – Зеведеин көвүн, терүнә ах – Иоанн; ³ Филипп болн Варфоломей, Фома болн алв цуглулдг Матфей, Алфеин көвүн Иаков, Левей талданар Фаддей; ⁴ Кананитын Симон болн Иисусиг бәрүлҗ өгсн Иуда Искариот. ⁵ Иисус эн сурһульчнран илгәһәд иим зака өгв: «Буру бурхдудт иткдг болн Самаритяна балһснд бичә одтн, ⁶ Израилин гермүдин үксн хөөдүр одхла сән болх. ⁷ Бурхна Теңгрин орн-нутг өөрдҗ ирв гиҗ келәд йовтн. ⁸ Гемтәһинь эдгәтн, арсна му гемтәһинь цеврүлтн, үкчәсинь әмдрүлтн, шулмсиг көөҗ һарһтн. Өңгәр авсан – өңгәр өгтн. ⁹ Бийләһән алт чигн, цаһан мөңг чигн, улан мөңг чигн эврәннь бүсдән бичә автн. ¹⁰ Дорв чигн, сольх хойр хувц чигн, буршмг чигн, тайг чигн бичә автн. Юңгад гихлә көдлмш кеҗәх күүнд теҗәл олдх. ¹¹ Ямаран чигн балһснд болн селәнд орхларн, түрүләд сән седклтәһинь медҗ авад, тер герт тендәс һартлан үлдтн. ¹² Герт орхларн, иигҗ мендлтн: «Гертн эвәлтә болн төвкнүн болтха!» ¹³ Тер гер тадниг орулхла, тана эв теднд күртх. Кемр эс орулхла, тана эв таднд хәрү эргәд ирх. ¹⁴ Тадниг орулҗ авлго, тана үгмүдиг соңслго бәәснәснь һарад, башмгиннь тоорминь саҗтн. ¹⁵ Би таднд үн келҗәнәв: «Зарһин өдрлә Содом Гоморра хойр балһснд тер таниг эс орулҗ авсн балһснас гиигн болх. ¹⁶ Би тадниг чонмуд заагт йовҗ йовх хөөдлә әдл илгәҗәнәв. Тер төләд көглҗрһнлә әдл амр болтн, моһала әдл цецн болтн. ¹⁷ Әмтнәс саглтн юңгад гихлә тадниг тедн зарһла харһулад, эврәннь синагогмудтан цокх. ¹⁸ Тедн тадниг эврәннь һардачнр тал болн хаадуд тал Нанас көлтә авч одх. Теднә болн буру бурхдудт иткдг улсин өмн Мини тускар герчлхин төлә. ¹⁹ Тадниг зарһд авч ирхлә, тадн ю келхмб гиҗ бичә зовтн. Тер часла таднд ю келхинь өггдх. ²⁰ Юңгад гихлә тадн биш, тана дотрас Деед Эзнә Эцкин Сәкүсн келх. ²¹ Ах дүүһән аллһнд өгх, эцкнь — көвүһән . Күүкднь эк-эцк талан һаран өргәд алх. ²² Мини Нернәс көлтә таднд цугтан дурго болх. Сүл күртл тесснь – тер күнь авргдх. ²³ Тадниг нег балһснас көөсн цагт талдан балһснур гүүтн. Би таднд үнәр келҗәнәв: «Израилин балһсдуд эргҗ чиләд уга бәәтл, Күмни Көвүн күрч ирх.» ²⁴ Сурһульч багшасн деер биш, ялч эзнәсн деер биш. ²⁵ Сурһульч эврәннь багшлаһан әдл болад ирхлә, ялчнь чигн герин эзнлә әдл болхла болҗана. Герин эзиг эрлг гиҗәхлә, герт бәәсн әмтиг үлү мууһар эс дуудхий? ²⁶ Тегәд теднәс бичә әәтн, юңгад гихлә секгддго нуувч юмн уга. ²⁷ Харңһуд таднд келсиг герлтә цагла келтн. Тана чикнд шимлдәд келсиг герин ора деер келтн. ²⁸ Цогцитн алснас бичә әәтн. Тана седклитн тер алҗахш. Халун тамд тана цогцитн, седклтәһинь хамднь алад уга кедг Терүнәс әәтн. ²⁹ Хойр бичкн шовун нег деншгәр эс хулдгдну? Теңгрин Эцкин зөв угаһар теднәс негнь чигн һазрт уншго. ³⁰ Тадна толһа деер цуг үснтн Бурхнд тоота. ³¹ Бичә әәтн: тадн Бурхнд олн шовудас деерт. ³² Тегәд әмтнә нүднд Намаг «меднәв» гисиг Би Теңгрин Эцкин өмн «меднәв» гихв. ³³ Намаг «медхшүв» гиһәд әмтнә өөр гөрдсн күүг, Би чигн Теңгрин Эцкин өмн «медхшв»гихв. ³⁴ Намаг һазр деер эв авч ирв гиҗ бичә сантн. Эв биш селм авч ирүв. ³⁵ Юңгад гихлә Би эцкинь көвүтәһинь салһад, экнь — күүктәһинь, хадм экинь — бертәһинь салһхар ирүв. ³⁶ Күүнә дәәснь — герткснь болх. ³⁷ Эк-эцкән Нанас үлүһәр дурлснь мини болҗ чадшго. Көвүһән болн күүкән Нанас үлүһәр дурлснь — мини болҗ чадшго. ³⁸ Эврәннь кирсән авад, Намаг эс дахснь — мини болҗ чадшго. ³⁹ Эврәннь әмән-седклән хадһлҗ чадснь терүгән геех. Мини төлә эврәннь әмн седклән геесн күн – әмән седклән хадһлх. ⁴⁰ Тадниг орулҗ авснь — Намаг орулҗ авна. Намаг орулҗ авснь Намаг Илгәсиг орулҗ авна. ⁴¹ Әәлдәчиг әәлдәчин нерн деерәс орулҗ авснь — әәлдәчин ачлвр авх. Кен Бурхнд иткдг кү орулҗ – тер Бурхндан иткдг күүнә белг авна. ⁴² Кен эн бичкниг ааһ киитн уусар ундынь хәрүлнә тер сурһульчин нернә төлә эврәннь белгән авчана. Би таднд цуг энүг үнәр келҗәнәв – гиҗ Иисус келв.