¹ Иисус арвн хойр сурһульчнртан даалһврмудан өгәд чиләчкәд, теднә балһсдудар сурһҗ дасххар болн келхәр һарад йовв. ² Түүрмд суусн Иоанн Иисусин кесн кергүдин тускар соңсчкад, эврәннь хойр сурһульчан терүнәс суртн гиҗ илгәв: ³ «Та Тер ирх зөвтәнь болҗахмт? Эс гиҗ бидн талданиг күләхмби?» ⁴ Иисус эднд иим хәрү өгв: «Иоаннд үзсән, соңссан келтн: ⁵ сохр улс үздг болҗ, доһлңгнь йовна, арснь му гемтә улс цеврлгдҗәнә, дүләнь — соңсҗана, үкснь әмдрҗәнә болн угатя әмтн Бурхна Байрта Зәңг келҗ йовна. ⁶ Нанд итксн күн буйн кишгтә болх.» ⁷ Тедниг йовсна хөөн Иисус әмтнд Иоанна тускар экләд келв: «Ю үзхәр тадн көдәд одвт?Салькнд нәәхлсн хулсиг хәләхәрий? ⁸ Тадн ю хәләхәр одсмт? Җөөлн байн хувцта кү үзхәрий? Байн җөөлн хувц өмсдг улс хаана бәәшңгүдт бәәцхәнә. ⁹ Тадн ю үзхәр одсмбт? Әәлдәчиг үзхәрий? Э, Би таднд келҗәнәв: «Әәлдәчәс даву әәлдәчиг үзләт.» ¹⁰ Бурхна бичгт түүнә тускар иигҗ бичәтә: «Би Чини өмн Эврәннь элчән йовулҗанав. Тер Чини өмн йовад хаалһичин ясх.» ¹¹ Би таднд үнәр келҗәнәв: «Цуг һазр деер күүкд күүнәс һарсн улсас уснд кирслдг Иоанн хамгин ик, зуг Бурхна Теңгрин орн-нутгт хамгин бичкнь терүнәс ик. ¹² Уснд кирслдг Ионна цагас авн ода күртл Бурхна Теңгрин орн-нутг чидләр авгдна. Уха- санаһан, чидлән өгсн улс Бурхна Теңгрин орн-нутгт күрх. ¹³ Юңгад гихлә цуг әәлдәчнр болн Закан Иоанна цагин өмн зарлгдсн билә. ¹⁴ Кемр тадн орулҗ авх белн болхла, тертн ирх зөвтә бәәсн Илия болҗана. ¹⁵ Кенд соңсхин төлә чикн бәәхлә соңсцхаг!» ¹⁶ Эн цагин улсиг кенлә дүңцүлхв. Эдн һаза наачах бичкдүдлә әдл болҗана, юңгад гихлә тедн үүрмүдтән иигҗ келв: ¹⁷ «Бидн таднд бүшкүр татлавидн, зуг тадн биилсн угат. Бидн таднд һашута дуд дууллавидн, зуг тадн уульсн угат. ¹⁸ Юңгад гихлә Иоанн ирәд хот-хол чигн идхш, чаһр чигн уухш. Тер бийнь келцхәнә: «Энүнә дотрнь шулм бәәнә.» ¹⁹ Күмни Көвүн ирәд хот иднә болн чаһр ууна. Тер бийнь келцхәнә: «Эн күн хот чигн эдлнә, чаһр чигн ууна, алв цуглулдг болн килнцтә улсла үүрлҗәнә. Цуг цецн юмн кергәрнь үзгднә.» ²⁰ Тегәд Иисус зәрм балһсдыг гемшәв, юңгад гихлә тер балһсдудт Иисус дала чидлән болн өвәрцән үзүлсн бийнь, тедн гемән сурсн уга, килнцән хайсн уга: ²¹ «Хоразин болн Вифсаида зовлң эдлхит! Юңгад гихлә Тир,Сидон хойрт тиим дала чидл болн өвәрцс үзүлгдсн болхла, тедн кезәнә шуурха му хувцан өмсәд, үмсн деер унад тедн килнцәсн цөкрх билә.» ²² Зуг Би таднд келҗәнәв: «Тир, Сидон хойрин һазрт зарһин өдрлә тадн дорхнь деер болх. ²³ Чи, Капернаум, теңгр күртл өөдлсн тамин йоралд унхч, юңгад гихлә чамд өгсн чидл болн өвәрцс Содомд бас үзүлгдсн болхла, тер Содом ода чигн бәәх билә. ²⁴ Тер төләд Би келҗәнәв: зарһин өдрлә тадн дорхнь Содомин һазрт деер болх.» ²⁵ Цааранднь Иисус иигҗ зальврв: «Хәәрхн Эцкм, теңгрин болн һазрин Эзн, цецн ухата улсас нууһад бичкдүдт медүлҗ өгсндтн Танд магтал болн ханлт өргҗәнәв. ²⁶ Э-э, Мини Эцк, Тана эвәлтн тиим билә. ²⁷ Мини Эцкм цугинь Нанд даалһв. Эцкәс талдан нег чигн күн Көвүһинь медҗәхш. Көвүнәс талдан нег чигн күн Эцкиг медхш. Ямаран күүнд Көвүнь секхәр бәәхнь бас нег чигн күн медҗәхш. ²⁸ Цуг муурсн, зовсн улс Нанур ирцхәтн, Би тадниг амранав. ²⁹ Мини зааврмудыг бийдән автн, Нанас дасч автн, юңгад гихлә Би җөөлн болн номһн зүрктәв. ³⁰ Тана седкл амрад җирһх, Мини өгсн зааврмуд амр, Мини ацан гиигн.»