¹ Бурхна суббот өдр ирхлə, Иисус буудя тəрсн һазрар йовҗ йовла. Терүнə сурһульчнр йир икəр өлсцхəв. Тегəд эдн буудян толһас таслад идцхəв. ² Фарисеймуд энүг үзəд Терүнд келв: «Чини сурһульчнр Бурхна суббот өдрлə кех зөв уга юм кеҗəнə.» ³ Иисус теднд хəрү өгв: «Давид болн терүнлə бəəсн улс өлсхлəрн ю кесинь тадн умшсн угавт? ⁴ Давид Бурхна герт орад, Бурхна өмн тəвсн өдмг теднлə хуваһад идҗ. Бурхна өмн тəвсн өдмг Давид чигн, өөрнь бəəсн əмтн идх зөв уга билə. Тер өдмг һанцхн əрүн Бурхна улс идх зөвтə бəəсмн. ⁵ Тадн Заканд иигҗ бичтəһиннь умшсн угавт? Бурхна суббот өдр болһн əрүн улс сүмд Бурхна суббот өдриг эвдвчн, тедниг бурушахш. ⁶ Зуг таднд келҗəнəв, энд Бəəснь Иерусалимин сүмəс ончта болн ачта. ⁷ Бəрц биш, хəəрлт сурҗанав «гисн үгмүдин чинринь медсн болхла, тадн буру уга улсиг гемншго билəт. ⁸ Күмни Көвүн Бурхна суббот өдрин Деед Эзн болҗана.» ⁹ Тендəс һарад, Иисус синагогд орв. ¹⁰ Тенд хагсу һарта күн бəəҗ. Иисусиг гемшəхин төлə сурҗ: «Бурхна суббот өдрлə кү эдгəҗ болхий?» ¹¹ Тер теднд хəрү өгв: «Кен таднас бəəсн һанцхн хөөһəн Бурхна суббот өдрлə нүкнд унхла, терүг нүкнəс татҗ авлго бəəхий? ¹² Күн болхла кедү дəкҗ хөөнəс деер! Тегəд Бурхна суббот өдрлə сəн болн цаһан саната йовдлмуд кеҗ болхмн.» ¹³ Терүнə хөөн Иисус хагсу һарта күүнд келв: «Һаран суңһ!» Тернь һаран суңһхла, һарнь дарунь эдгҗ одв. Хойрдгч һарлань əдл болв. ¹⁴ Фарисеймуд һарад, хоорндан яһҗ Иисусин əминь таслхар күүндцхəв. Зуг Иисус терүгинь медəд, тендəс һарад йовҗ одв. ¹⁵ Терүг дахад дала əмтн йовцхав. Иисус цуг улсиг гемəснь эдгəв. ¹⁶ «Зуг Мини тускар əмтнд бичə келтн» - гиҗ Иисус закв. ¹⁷ Исайя əəлдəчин келсинь күцхин төлə иигҗ бичəтə: ¹⁸ «Эн Мини шүүҗ авсн Ялч. Мини Дурта Көвүн, Мини седкл Терүнд. Эврəннь Сəкүсəн Терүн деернь тəвхв. Эн цуг келн - əмтнд зарһ зəңглх. ¹⁹ Тер зүткшго, хəəкршго, кен чигн уульнцмудар Терүнə дууһинь соңсшго. ²⁰ Тер зарһан кетл, Терүнə үнн орчлңгиг диилтл, əрə хуһрха хулсиг хуһлшго, уңгдсн олс унтрашго. ²¹ Терүнə Нернд цуг келн-əмтн нəəлх.» ²² Тиигхлə шулмд авлгдсн, сохр болн келн уга күүг авч ирв. Иисус энүг эдгəв, эн үздг болн келдг болв. ²³ Цуг əмтн алң болад келцхəв: «Эн Христос биший, Давидин көвүн?» ²⁴ Фарисеймуд энүг соңсад келв: «Тер эрлгин чидлəр шулмсиг болн хар сəкүсиг һарһна.» ²⁵ Зуг Иисус санаһинь медəд теднд келв: «Ямаран йосн болв чигн нег- негнлəһəн дотран дəəлдхлə – хоосрх. Кемр ямаранчн балһсн эс гиҗ гер – хоорндан нег- негнлəһəн өшə көөхлə, эн балһсн болн гер əңгрəд тарҗ одх. ²⁶ Кемр эрлг эрлгиг көөҗ һарһхла, тер бийнь дотрасн əңгрх. Тиигхлə түүнə йосн əңгрҗ тарлго бəəхий? ²⁷ Кемр Би эрлгин чидлəр шулмсиг көөҗ һарһхла, тана көвүд юуһар көөҗ һарһна? Тегəд тедн тана зарһчнр болх. ²⁸ Кемр Би Бурхна сəкүсəрн эрлгиг көөҗ һарһхла, танур БурхнаТеңгрин орн- нутг ирснь маһд уга. ²⁹ Чидлтə күүнə герт кен орҗ зөөринь булаҗ авч чадх? Түрүлəд эн чидлтə эзн күүг күлəд, тегəд гертк зөөринь булаҗ авх. ³⁰ Намаг эс дахсн күн – Нанд дурго болҗана. Нанла эс хурасн күн – тер тараҗана. ³¹ Тегəд таднд Би келҗəнəв: «Ямаран чигн килнц, му келлһн – əмтнд тəвгдх, зуг Əрүн Сəкүсиг му келхлə – əмтнд тəвгдшго. ³² Кемр ямаран чигн күн Күмни Көвүнə өмнəс буру үг келхлə, терүнə бурунь тəвгдх, зуг кен чигн Эрүн Сəкүснə өмнəс буру үг келхлə, терүнə бурунь ода цагт чигн, ирх цагт чигн тəвдшго.» ³³ Ямаранчн модыг темсəрнь медтн: сəн модд – сəн темстə, му модд – му темстə. Юңгад гихлə ямаран чигн модн темсəрн медгднə. ³⁴ Хорта моһан үйнр! Тадн хар саната бəəһəд бəəҗ яһҗ сəн үг келҗ чадхмт? Күүнə зүркнд бəəсн юмн, терүнə амар һардмн. ³⁵ Сəн седклтə күн сəн зөөрəсн сəəнинь һарһна, му седклтə күн му седклəсн мууһинь һарһна. ³⁶ Би таднд келҗəнəв: «Зарһин өдр ирхлə, күн болһн ямаран чигн тус уга келсн үгиннь төлə тооцаһан өгх. ³⁷ Юңгад гихлə эврəннь келсн үгəрн цеврдҗ һархч, эс гиҗ эврəннь келсн үгəрн зарһд орхич.» ³⁸ Тиигхлə зəрм дегтр бичдг улс болн фарисеймуд келв: «Багш, мадн Танас темдг үзүлхитн күлəҗəнəвидн.» ³⁹ Иисус хəрү өгв: «Хар саната, иткл уга болн хуульчлгдсн, темдг хəəҗəх үйнр, таднд Иона əəлдəчəр өгсн темдгəс даву темдг өггдшго. ⁴⁰ Ион тул гидг ик заһсна дотр һурвн өдр болн һурвн сө бəəсн əдлəр, Күмни Көвүн бас һазрин зүркнд һурвн өдр болн һурвн сө бəəх. ⁴¹ Ниневитянахн эн үйнртə зарһд орад цааҗла харһулгдх. Юңгад гихлə тедн Иона келсн үгəр килнцəн тəвүлсмн. Зуг энд ода Бəəснь Ионас деер болн ик. ⁴² Өмн үзгəс ирсн хатн бас эн үйнртə зарһд орад тедниг гемшəх. Юңгад гихлə эн хатн хол һазрас Соломона цецн үг соңсхар ирҗ. Зуг энд Бəəсн Соломонас күчтə болн деер. ⁴³ Тегəд хар сəкүсн күүнəс һархларн, хагсу, усн уга һазрмудар йовад төвкнүн бəəдл хəəнə, болв олҗ чадхш. ⁴⁴ Тиигхлə келнə: «Би һарсн эврəннь герүрн хəрү орнав.» Эврəннь гертəн ирхлəнь гернь сул, сəврдчксн болн хурачксн бəəҗ. ⁴⁵ Тиигхлə тер хар сəкүсн йовад, бийəсн уурта догшн долан хар сəкүсд дахулад ирнə. Тер күүнə җирһл урдкаснь улм зовлңгта болн му болна. Тиим юмн эн хар саната үйнрлə болх.» ⁴⁶ Иисус əмтнлə күүндҗəсн бəəҗ. Эн цагла Терүнə экнь болн дүүнрнь герин өөр зогсҗасмн. Эдн Терүнлə күүндх саната бəəсмн. ⁴⁷ Нег күн Иисусд келв: «Тана эктн болн дүүнртн һаза зогсҗана.Танта күүндхəр седҗəнə.» ⁴⁸ Иисус келҗəсн күүнд хəрү өгв: «Кен Мини эк? Мини дүүнр кемб?» ⁴⁹ Дарунь сурһульчнр тал һарарн зааһад келв: «Эн Мини экм болн мини дүүнрм.» ⁵⁰ Юңгад гихлə кен Мини Теңгрин Эцкин таалнь болн келсн үгинь күцəснь, тер Нанд ахнр-дүүнрм болн эгчм болн экм болх.