¹ Тер өдр Иисус гертəсн һарад теңгсин көвəд суула. ² Терүнə өөр йир дала күн цуглрв, тегəд Тер оңһцд орад суув, əмтн көвə деер зогсад үлдв. ³ Иисус олн цецн келврмүдəр ирсн əмт сурһдг билə: ⁴ « Тəрəч тəрəһəн тəрхəр йовҗ. Цацсн тəрəнə экин зəрмнь хаалһин өөр унҗ. Шовуд терүгинь чоңкад идчкв. ⁵ Кесгнь чолута һазрт унҗ, тенд һазрнь баһ билə. Буудя шулун урһмлын бүчр һарһна, яһад гихлə һазрнь гүн биш билə. ⁶ Нарн һархла, эн хумхарад хагсҗ одв, яһад гихлə урһмлын уңг уга билə. ⁷ Дəкəд нег тəрəнə экн көгл заагт унв. Зуг көгл өсəд, өндр болад, тəрəнə экин уңгиг бүтəһəд дарв. ⁸ Зəрмнь сəн һазрт унад темс өгдг болв. Негнь зун холван, негнь җирн холван, негнь һучн холван ик урһц өгнə. ⁹ Соңсхин төлə чикн бəəхлə – соңстха.» ¹⁰ Сурһульчнр Иисусур өөрдəд, Терүнəс сурцхав: “Яһад эднд цецн келврмүдəр келнəт?» ¹¹ Тер эднд келв: «Яһад гихлə Бурхна Теңгрин орн-нутгин нууц тадн медх зөвтəт, эдн медх зөв уга. ¹² Тегəд меддг күүнд деернь немгдх. Эс медснəс бəəснь авгдх. ¹³ Цецн келврмүд эднд келҗ өгнəв, яһад гихлə эдн хəлəв чигн үзхш, соңсв чигн – соңсхш болн медхш, тегəд үлгүрлəд теднд келҗəнəв. ¹⁴ Əəлдəч Исайин эднə тускар келснь күцҗəнə: «Чикəрн соңсв чигн – медхшит, нүдəрн хəлəв чигн – үзхшит.» ¹⁵ Яһад гихлə эн əмтнə зүркн модьрун болҗ, нүдəн аньчкад, чикəрн əрə соңсна. Тегəд нүдəрн үзшго, чикəрн соңсшго, зүркəрн медшго. Тегəд бийəн Нанар эдгəхəр суршго. ¹⁶ Тадн хөвтə бəəҗт, яһад гихлə нүднтн үзнə, чикнтн соңсна. ¹⁷ Тегəд таднд лавта үн келҗəнəв: олн əəлдəчнр болн Бурхна закаһар бəəдг əмтн тадн үзсиг – үзх дурн күрв чигн – үзсн уга, тадна соңссиг – тедн соңссн уга. ¹⁸ Тадн болхла тəрəчин тускар цецн келврин чинринь соңстн. ¹⁹ Кен болвчн Бурхна Теңгрин орн-нутгин тускар үг соңсв чигн эс медхлə, хар санатл ирəд, зүркнд тəрсиг хулхална. Тиигхлə хаалһин өөр тəрсн тəрəн иим чинртə болна. ²⁰ Чолута ормд тəрə тəрснь иим күүнлə əдл, тер күн үг соңсн, дарунь байртаһар медсəн авна. ²¹ Болв тиим əмтн медсəн, соңссан төртəн авхш, һол төр гиҗ тоолхш: кемр һашудлһн болн көөлһн эклхлə, келсн, соңссн үг тер дарунь иткл уга болна. ²² Буг өвснд тəрсн экн, үг соңссн кү зааҗана, зуг цагин килмҗ болн худл зөөр тер үгиг баһрулад, тегəд тер үг тус уга болна. ²³ Сəн һазрт тəрсн, соңссн үгиг чикəр медсн болн зүркндəн орулсн күн. Тиим улс дала темс авч ирнə, теднəс негнь — зун холван, наадкнь - җирн холван, талдань- һучн холван ик урһц өгнə.» ²⁴ Иисус эднд талдан цецн келвр келх болв: « Бурхна Теңгрин орн-нутг күүнлə əдл, эн эврəннь тəрəнд сəн эк тəрҗ. ²⁵ Əмтн унтсн цагт дəəсн ирəд, урһҗасн буудян заагт буг өвс тəрəд йовҗ одв. ²⁶ Көк урһмл болн темсн һархла, теднə заагт буг өвсн урһснь медгдв. ²⁷ Герин эзн тал зарцнрнь ирəд келв: « Эзн! Та сəн эк эврəннь тəрəнд тəрлəт, буг өвсн альдас? ²⁸ Эзн теднд хəрү өгв: «Энүг дəəсн кев» Зарцнр энүнд келв: «Зөвшəл өгхлə, мадн йовад терүг татад һарһхмн?» ²⁹ Болв эн келв: «Уга, буг өвсиг татхларн, тадн буудята хамднь тач һарһхт. ³⁰ Эн чигн тер чигн тəрə хуратл хамдан урһг. Тəрə хуралһна цагт би тəрə хадачд келхүв: «Түрүлəд буг өвсиг цуглулад, бооһад, һалд шататн, буудяг хадад, мини буудя хадһлдг герт орултн.» ³¹ Дəкəд нег цецн келвр Иисус теднд келҗ өгв: « Бурхна Теңгрин орн-нутг горчисин экнлə əдл, энүг күн эврəннь тəрəнд тəрв. ³² Эн экн наадк цуг экнəс хамгин бичкн, болв урһад ирхлəрн өндр, ик модн болна, терүнə хамтхаснд теңгрин шовуд бултна.» ³³ Талдан цецн келвриг Иисус теднд келҗ өгв: « Бурхна Теңгрин орн-нутг һуйрин экнлə əдл, күүкд күн тер экиг авад, һурвн кемҗəн һуйрта негдүлəд, һуйр исхинь күлəв.» ³⁴ Иисус цецн келврмүдəр əмтнлə күүндв, келврмүд угаһар теднлə күүндсн уга. ³⁵ Урднь əəлдəч келсн бəəҗ: «Цецн келврмудəр эднлə күүнднəв. Делкə үүдəгдсн цагас авн бəəсн нууцинь цəəлһҗ өгнəв.» ³⁶ Иисус əмт тəвчкəд, герт орв. Сурһульчнр Терүн тал өөрдəд келцхəв: «Буг өвснə тускар цəəлһəд өгтн». ³⁷ Эн теднд келв: «Сəн эк тəрснь – Күмни Көвүн. ³⁸ Тегш һазр – эн орчлң. Сəн экн – Бурхна Теңгрин орн-нутгт бəəдг көвүд, буг өвсн – хар саната көвүд. ³⁹ Буг өвс тəрсн дəəсн – эн эрлг. Тəрə хуралһн - эн цагин насни чилгч .Тəрə хадачнр – Бурхна элчнр. ⁴⁰ Тегəд буг өвс цуглулад, һалд хайна, тиим юмн - эн цагин насни чилгчд болх. ⁴¹ Күмни Көвүн Эврəннь элчнрəн илгəх. Эдн Терүнə нутгас цуг җилвинь, му йовдл һарһдгинь цуглулад һалта бешт хайх. ⁴² Терүнд уульлһн болн шүдəн хəврлһн болх. ⁴³ Деед Эзнд иткдг əмтн Бурхна Теңгрин Эцкиннь орн-нутгт, нарн кевтə гилвкəд, солңһтрх! Соңсхин төлə чикн бəəхлə - соңстн. ⁴⁴ Бурхна Теңгрин орн-нутг тəрəнə һазрт бултулсн ик үнтə зөөрлə əдл, тер зөөриг күн һазрт булв. Эн күн үнтə зөөрт ик гидгəр байрлад, бийднь бəəсəн цугтнь хулдад, тер тəрəг хулдҗ авна. ⁴⁵ Дəкəд Бурхна Теңгрин орн-нутг кувц кевтəһəр сəн сувсиг хəəнə. ⁴⁶ Нег ик үнтə сувсиг олҗ авад, эн цуг бəəсн юман хулдад, терүг хулдҗ авв. ⁴⁷ Дəкəд Бурхна Теңгрин орн-нутг заһсна гөлмлə əдл, гөлмиг теңгст шивəд, олн зүсн заһс бəрҗ авв. ⁴⁸ Гөлм заһсар дүүрəд ирхлə, терүг көвə деер һарһв. Бəрҗ авсн заһсан сəəнинь мууһас йилһəд, шил савд цуглулв, му заһсиг бийəсн цааран хайчкв. ⁴⁹ Эн цагин насни чилгчəр тиим юмн болх: Бурхна элчнр һарад, хар саната улсиг Бурхнд иткдг əмтнəс салһх. ⁵⁰ тамин бешин һалд хар саната улсиг хайх, тендəс уульлһн болн шүдəрн хəвлрһн соңсгдх.» ⁵¹ Иисус теднəс сурв: «Юн болхинь тадн медвт?» Эдн Терүнд келв: «Э-э, Деед Эзн». ⁵² Тер эднд келв: «Бурхна Теңгрин орн-нутгин тускар сурһҗах, дегтр бичдг күн эзəн дураҗ эврəннь гертəн хадһлснас шин болн хуучан һарһна.» ⁵³ Иисус келсн цецн келврəн төгсəһəд тендəс һарв. ⁵⁴ Эн Эврəннь төрсн балһсндан ирв, синагогд тедниг сурһв, əмтн алң болад келцхəлə: «Альдас Энүнд тиим цецн ухан болн күчн? ⁵⁵ Эн модн урчин көвүн биший? Терүнə экин нернь Мария биший? Иаков, Иосий, Симон болн Иуда терүнə дүүнр биший? ⁵⁶ Терүнə эгчнр мадна заагт эс бəəнү? Тиим юмн Терүнд альдас ирв? ⁵⁷ Терүнд итксн уга.» Тегəд Иисус теднд келв: «Əəлдəч кезə чигн əрүн нертə бəəнə, зуг эврəннь төрсн балһсндан болн эврəннь гертəн əрүн нерəн геенə.» ⁵⁸ Тедн эс итксн учрар Иисус тенд олн өврмҗтə йовдлмуд үзүлсн уга.