¹ Тер цагт Ирод хаанд Иисусин тускар зəңг ирв. ² Эврəннь зарцнртан эн келв: «Эн уснд кирслдг Иоанн .Үкснə хөөн əмдрв, тегəд эн өврмҗтə йовдлмуд үзүлҗəнə.» ³ Филиппин ахин гергнə төлə Иродиадас көлтə, Ирод Иоанниг бəрҗ авад, күлəд түүрмд суулһв. ⁴ Яһад гихлə Иоанн келдг бəəҗ: «Үүнлə бəəх чи зөв угач.» ⁵ Эн Иоанниг алхар седв, болв нутгин əмтнəс əəдг билə, яһад гихлə Иоанниг əмтн əəлдəч гиҗ тоолдг бəəсмн. ⁶ Иродин һарсн өдрлə Иродиадин күүкн ирсн гиичнрин өмн биилəд, Ирод хаанд йир икəр таасгдҗ. ⁷ Тегəд Ирод күүкнд цуг сурсинь өгнəв гиҗ андһарлв. ⁸ Эн экиннь зааҗ өгсəр келв: «Уснд кирслдг Иоанна толһаг тəвүр деер авч ир.» ⁹ Андһар өгсндəн болн ширəн өөр суусн гиичнрин өмн Ирод хан гейүрв. ¹⁰ Эн түүрмд бəəх Иоанна толһа чавчад, күүкнд авч иртн гиҗ закв. ¹¹ Иоанна толһаг тəвүрт авч ирəд, күүкнд өгв, тернь экдəн күргв. ¹² Иоанна сурһульчнр ирəд, цогцинь авад оршав. Дарунь йовад Иисусд келцхəв. ¹³ Иисус энүг соңсад, һанцхарн тендəс көдə һазрт оңһцар усчад йовҗ одв. Əмтн Иисус тенд бəəсинь соңсад, балһснас йовһар Терүг дахв. ¹⁴ Иисус һарад олн əмт үзв, эднд санань зовад, гемтəһинь эдгəв. ¹⁵ Асхн болад ирхлə, Терүнүр сурһульчнр ирəд келцхəв: «Мадн бəəх һазрт əмтə юмн уга, ора цаг болҗ одв. Мадниг дахҗ ирсн улсиг хəрүлчктн, селəдəр йовад, бийдəн хот хулдҗ автха». ¹⁶ Иисус хəрү өгв: «Эднд йовх керг уга. Тадн хот өгтн.» ¹⁷ Эдн Терүнд келнə: «Маднд тавн өдмг болн хойр заһсн бəəнə». ¹⁸ Иисус келв: «Нанд терүгəн авч иртн». ¹⁹ Дахад ирсн əмтиг ноһан деер суулһв. Эн тавн өдмг болн хойр заһс бəрəд, теңгр тал хəлəһəд əдслв. Иисус өдмг авад, хуваһад сурһульчнртан өгəд бəəв, сурһульчнрнь — əмтнд. ²⁰ Цуг əмтн өгсн хотынь эдлəд цадцхав. Үлдсн хотнь арвн хойр зембльд багтв. ²¹ Хот эдлснь тавн миңһн күн билə, күүкд күн болн бичкдүд эн тоод орсн уга. ²² Иисус сурһульчнртан закв: «Шулун оңһцд орад, талдан көвəд күртн.» Бийнь ирсн улсиг тəвчкəд ирх болв. ²³ Үлдсн улсиг тəвчкəд, тер асхн уул деер һарад һанцхарн зальврхар үлдлə. ²⁴ Оңһц теңгсин дунд күрв, дольгалсн усн оңһц цокв, яһад гихлə зөрүд салькн өмнəснь үлəв. ²⁵ Дөрвдгч сөөһин харулд Иисус теңгсин усна деегүр тедн тал йовҗ. ²⁶ Сурһульчнр Энүг теңгсəр йовҗ йовхинь үзҗ. «Ки үзгдлһн!» - гиһəд əəлдəд хəəкрцхəв. ²⁷ Иисус теднд келв: «Сергтн! Энтн Бив! Бичə əəтн!» ²⁸ Петр Терүнд хəрү өгв: «Деед Эзн! Кемр Та болхла, би Танур усар ирхүв, нанд заквр өгтн!» ²⁹ Иисус келв: «Йов!» Пётр оңһцасн һарад, усар йовад, Иисус тал өөрдҗ йовла седв. ³⁰ Болв догшн салькнас əəһəд уснд чивн гив. Пётр хəəкрв: «Деед Эзн! Намаг харсад авртн!» ³¹ Иисус шулуһар һаран татад, нөкд болад келв: «Баһ итклтə! Чи яһад маһдлад бəəвч?» ³² Эдн оңһцд орхла, салькн зогсҗ одв. ³³ Оңһцд бəəсн əмтн Терүнүр өөрдəд сөгдн келв: «Та йоста Бурхна Көвүн!» ³⁴ Эдн теңгс һатлад Геннисаретск һазрт ирцхəв. ³⁵ Тер һазрин əмтн Терүг таняд, төгəлңдəн Терүнə тускар зəңглəд, цуг гемтə улсиг көтлҗ ирв. ³⁶ Эдн Терүнə хувцнднь һаран күргх зөв сурцхав. Һаран күргҗ чадснь — эдгцхəв.