¹ Түүнə хөөн Иисусур Иерусалимин дегтр бичдг улс болн фарисеймуд ирəд сурна: ² «Юңгад Чини сурһульчнр медəтнрин дасхвр эс күцəҗəхмб? Эдн өдмг идхлəрн һаран уһахш.» ³ Иисус эднд иим хəрү өгв: «Юңгад тадн эврəннь дасхврин төлə Бурхна зака эвдҗəхмбт? ⁴ Бурхн зака өгсмн: «Эцкəн болн экəн күндл» болн «Эврəннь эцкдəн болн экдəн догшн үгмүд келсн күн – үктхə.» ⁵ Тадн болхла иигҗ келнəт: «Кемр күн эцкдəн эс гиҗ экдəн келхлə: чи нанас авхар седсн юмн – эн Бурхнд тəвсн бəрц болҗана, ⁶ тер күн эцкəн эс гиҗ экəн күндллго бəəҗ чадҗана.» ⁷ Хойр чирəтə улс! Тадна тускар сəəнəр Исайя əəлдəч келсмн: ⁸ «Эн əмтн Нанур амарн болн үгмүдəрн өөрдҗəнə, зуг эднə зүркд Нанас хол. ⁹ Зуг эдн Намаг амарн тевчсн төлəд хоосн үлдх, юңгад гихлə эдн əмтнə сурһсн дасхврар болн авъясмудар бəəцхəнə.» ¹⁰ Иисус əмт дуудад келв: «Соңстн болн тодлҗ автн! ¹¹ Ямаран болв чигн күүг терүнə дотраснь һарчахнь бузрдҗана, зуг дотрнь орснь — бузрдашго.» ¹² Тиигхлə Терүнə сурһульчнр өөрдҗ ирəд Иисуст келв: «Фарисеймуд эн үгмүд соңсад икəр уурлцхав.» ¹³ Иисус сурһульчнртан хəрү өгв: «Ямаран чигн урһмл, Мини эцк эс тəрсн болхла уңгтаһнь таслад авад хайгдх. ¹⁴ Тегəд тедниг үлдəтн. Тер сохр көтлəчнр сохр улсиг дахулҗ йовна. Кемр сохр сохран көтлхлə, хамдан нүкнд унх.» ¹⁵ Пётр Терүнд келв: «Эн цецн келвр маднд цəəлһтн.» ¹⁶ Иисус келв: «Тадн энүг ода күртл медҗ чадҗахшийт? ¹⁷ Күүнə амар орсн юмн, геснд орад цааран һардгнь тадн ода күртл меддговт? ¹⁸ Зуг амнас һарсн – зүркнəс һарчана. Эн кү бузрдҗана. ¹⁹ Юңгад гихлə күүнə зүркнəс хар му ухан, аллһн, аля келһн, авальдан өгсн үгəн эвдлһн, хулха, худл, худлар герчллһн болн му келлһн. ²⁰ Эн цуг кү бузрдҗана, һаран уһалго хот идсн – кү бузрдҗахмн уга.» ²¹ Тегəд тендəс Иисус һарад, Тиран болн Сидона һазрмудар йовҗ одв. ²² Тер һазрмудас хананеянк күүкд күн һарад, Терүнд хəəкрəд келв: «Деед Эзн! Давидын Көвүн, хəəрлтн намаг! Мини күүк эрлг ик гидгəр зоваҗана.» ²³ Болв Иисус энүнд нег чигн үг келсн уга. Сурһульчнрнь Терүнүр өөрдəд сурв: «Көөчк энүг, юңгад гихлə эн мана ардас хəəкрəд йовна.» ²⁴ Иисус келв: «Би Израилин герин үкҗəх хөөдүр илгəгдлəв.» ²⁵ Күүкд күн Иисур өөрдəд, өмннь мөргəд келв: «Деед Эзн! Нөкд нанд болхнтн!» ²⁶ Зуг Иисус хəрү өгв: «Бичкдүдəс өдмг авад нохаст хайсн сəн биш.» ²⁷ Эн келв: «Э, Деед Эзн, болв эзнə ширə деерəс унсн өдмгин үлдл нохас иднə.» ²⁸ Тиигхлə Иисус келв: «Күүкд күн, чини иткл ик! Тегəд чамд чини санаһар болтха!» Энүнə күүкнь дарунь эдгҗ одв. ²⁹ Иисус тер һазр үлдəһəд, Галилеин теңгсүр ирəд, уул деер давшад һарад суув. ³⁰ Терүнүр дала əмтн ирв. Эдн дунд доһлң, сохр, келн уга келкə, эрмдгтə дала улс билə. Эдниг Иисусин көлд кевтүлв, Иисус цуг эдниг эдгəв. ³¹ Тегəд əмтн келкə улсиг келҗəснь үзəд, сохрнь үзҗəснь, доһлңгинь йовҗаснь үзəд икəр алң болад, Израилин Бурхиг туурулад бəəсмн. ³² Иисус эврəннь сурһульчнран дуудад эднд келв: «Мини өөр һурвн хонгтан бəəсн əмтнд иддг хот уга болснднь санам зовҗана. Эн əмтн йовх хаалһдан муурлго, чинəһəн алдлго йовхин төлə Би эдниг хоосар тəвшгов.» ³³ Сурһульчнрнь Терүнд келнə: «Иим дала əмт цадхиин төлə эн көдəд мадн альдас тедү өдмг авхмби?» ³⁴ Иисус эднəс сурна: «Кедү өдмг таднд бəəнə?» Сурһульнрнь келнə: «Долан болн невчкн заһсн бəəнə.» ³⁵ Тиигхлə Иисус һазр деер суутн гиҗ əмтнд закв. ³⁶ Иисус долан өдмг болн заһсд авад, Бурхнд ханлт өргəд, хуваһад Эврəннь сурһульчнртан өгəд бəəв, сурһульчнрнь – əмтнд. ³⁷ Цуһар идəд цадҗ. Үлдсн өдмгəр долан зембль дүүрв. ³⁸ Идəд цадснь дөрвн миңһн күн бəəсмн, күүкд улс болн бичкдүд эн тоод орсн уга . ³⁹ Əмтиг тəвчкəд, Иисус оңһцд орад, Магдалы гидг һазрур ирҗ.