¹ Фарисеймуд болн садукеймуд Терүн тал өөрдҗ ирв. Тедн Иисусиг җилвтүлəд, теңгрəс темдгүд үзүлтхə гиҗ сурв. ² Теднд Тер ииҗ хəрү өгв: «Асхн болхла, тадн келнəт: теңгрин бəəдл сəн болх, юңгад гихлə теңгр улан, ³ өрүн болхла: эндр чиг-боран болх, юңгад гихлə теңгр бүркг.» Хойр чирəтə улс! Теңгрин бəəдл ийлһҗ чаднат, зуг цаг шинҗлҗ чадҗахшийт? ⁴ Хуульчлгдсн болн иткл уга үйнр теңгрəс темгдүд хəəнə. Таднд Иоанна əəлдəчин темдгүдəс талдан темгдүд өггдшго.» ⁵ Терүнə сурһульчнр теңгсин көвə һатлад һархларн, өдмг авхан мартсн бəəҗ . ⁶ Иисус эднд келв: «Фарисеймудын болн садукеймудын искəдг экнəс саглтн.» ⁷ Тедн хоорндан ухалад келцхəв: «Өдмг эс авснд маднд тиигҗ келҗəхмб?» ⁸ Иисус терүгинь медəд иигҗ келв: «Баһ итклтə улс, тадн өдмг эс авсндан һундҗахмт? ⁹ Ода чигн тадн юм медсн угавт? Тавн өдмгəр тавн миңһн кү цадхсна тускар тадн мартчквт? Кедү зембль өдмг цуглулҗ авлат? ¹⁰ Болн долан өдмгəр дөрвн миңһн кү цадхсинь бас мартчквт? Дəкн кедү зембль өдмг цуглулҗ авлат? ¹¹ Юңгад тадн эс медҗ чадҗахшит? Би өдмгин тускар келҗəхшв, садукеймудын болн фарисеймудын искəсн экнəс бийəн саглҗ йовтн гиҗ келҗəнəв.» ¹² Иисус өдмгин экнə тускар биш, фарисеймудын болн садукеймудын дасхҗах сурһуляс бийəн саглтн гиҗ теднд келҗəхнь медҗ авцхав. ¹³ Филиппа Кесарин нутгт ирəд, Иисус Эврəннь сурһульчнрас сурв: «Əмтн Намаг Күмни Көвүг кен гиҗ тоолҗана?» ¹⁴ Тедн иим хəрү өгв:«Зəрмнь уснд кирслдг Иоанн гиҗ тоолҗана, талдань Илия гицхəнə, наадкснь Иеремия эс гиҗ əəлдəчнрин негнь гиҗ тоолҗана.» ¹⁵ Тер сурв: «Тадн бийстн Намаг кен гиҗ тоолҗанат?» ¹⁶ Симон Пётр келв: «Та — Христос, Əмд Бурхна Көвүн!» ¹⁷ Тиигхлə Иисус терүнд иим хəрү өгв: «Иоанна көвүн Симон, чи буйн кишгтəч, юңгад гихлə чамд энүг күн биш, Мини Теңгрин Эцк секв. ¹⁸ Тегəд Би чамд келҗəнəв: «Чи – Пётр! Эн Чолун деер Би Эврəннь Чонҗ тосхнав, үклин-тамин чидл Мини Чонҗиг диилҗ чадшго! ¹⁹ Би чамд Теңгрин орн-нутгин түлкүрнь өгхв. Һазр деер чи боосн юмиг теңгр деер боогдх, һазр деер чи тəəлсн юмиг теңгр деер тəəлгдх?» ²⁰ «Намаг Христос - бичə күүнд келтн»- тииҗ Эврəннь сурһульчнртан закв. ²¹ Тер цагас авн Иисус Эврəннь сурһульчнртан Иерусалим тал йовхин тускар эклəд келəд бəəв. Тенд медəтнрəс, Бурхна ах əрүн болн дегтр бичдг улсас икəр зовхан медүлв. Терүнə əмнь таслхинь, болв һурвдгч өдртнь Иисус əмдрхин тускар медүлəд келсмн. ²² Пётр Иисусиг хооран дуудад келв: «Бийəн Деед Эзн хəəрлтн! Танла тиим юмн бичə болтха!» ²³ Иисус Пётр тал эргəд келв: «Эрлг! Нанас цааран йов. Чи Намаг җилвтүлхəр седҗəнəч, юңгад гихлə чи Бурхна тускар ухалҗахшич, күүнə ухаһар ухалҗанач!» ²⁴ Түүнə хөөн Иисус Эврəннь сурһульчнртан келв: «Кен Мини келсн үгəр бəəхəр седəд, Намаг дахад йовхар бəəхлə, эврəннь кирсəн авад Намаг дахтн. ²⁵ Юңгад гихлə эврəннь əмəн хадһлхар бəəсн күн - терүгəн геех, зуг кен Мини төлə эврəннь əмəн геехəр бəəхлə - тер əмəн геешго. ²⁶ Кемр ямаран чигн күн цуг делкə эзлҗ авад, зуг бийиннь əмəн геехлə ямаран олзта тер болхмб? ²⁷ Юңгад гихлə Күмни Көвүн Эврəннь Эцкин туурмҗд болн Эврəннь элчнртəһəн ирсн цагт, күн болһнд бийиннь кесн кергəрнь өггдх. ²⁸ Үнəр келҗəнəв: ода энд зогсҗасн тадн дундас зəрмнь əмд бəəһəд, Күмни Көвүг Эврəннь Теңгрин Бурхна орн-нутгт йовсинь үзх.»