¹ Тер өдрмүдт уснд кирслдг Иоанн ирв. Эн Иудеин һазрт байрта зəңг келдг бəəҗ. ² Иоанн келв: «Килнцəн суртн, юңгад гихлə Бурхна Теңгрин орн-нутг өөрдҗ одв.» ³ Иоанна тускар Исайя əəлдəч келдг бəəҗ: «Деед Эзнд хаалһинь белдтн гиж, хаалһинь һоодан кетн гиҗ көдə һазрт хəəкрдг дун!» ⁴ Темəнə ноосар кесн хувц, арсар кесн бүс Иоанн өмсдг бəəҗ. Иддг хотнь царцахас болн зерлг бал бəəҗ. ⁵ Тер цагла Иерусалимин цуг Иудеин болн Иордана өөр бəəсн əмтн эврəннь килнцəн сурад, ⁶ Иордана уснд булхад Иоаннар бийəн кирслүлв. ⁷ Фарисеймуд, садукеймуд бас бийəн килнцəсн цеврүлхəр ирҗ. Иоанн тедниг үзчкəд келв: «Та хорта моһан тохмс! Бурхна ирх уурас зулад гүүх уха кен таднд заав? ⁸ Эврəннь бəəдл - җирһлин килнцəн хаяд, Бурхна заасн хаалһар йовтн. ⁹ «Мана эцкм Авраам!» - гиһəд Бурхна зарһас зулҗ чадхувидн гиҗ бичə сантн юңгад гихлə Бурхн эн чолудас чигн үрдүд кеҗ чадх. ¹⁰ Модна уңгин өөр сүк кевтнə, сəн темс өгдго модыг чавчад һалд хайна. ¹¹ Килнцəн цеврүлхин төлə би тадниг уснд кирслнəв, зуг мини ардас йовсн нанас күчтə. Би Терүнə башмгинь авч йовх зөв угав.Тер тадниг Əрүн Сəкүсəр болн һалар цеврлх. ¹² Терүнə күрз һартнь бəəнə. Тер эврəннь хадһлдг орман цеврлəд, буудяһан хураһад, өвсинь унтрдго һалд шатах.» ¹³ Тер цагт Галилеяс Иорданур Иоанн тал Иисус бийəн кирслхəр ирсмн. ¹⁴ Иоанн Иисусиг зогсаһад келв: «Юңгад Та нанур ирсмт? Та намаг кирсүлх зөвтəт!» ¹⁵ Зуг Иисус хəрү өгв: «Ода энүнд зөв өг, юңгад гихлə тиигҗ мадн цуг Бурхна үн күцəх зөвтəвидн.» ¹⁶ Иисус дарунь уснас һарв. Генткн теңгр зааград, Иисус деер көглҗрһн мет Бурхна Сəкүсн бууҗ ирв. Терүг Иоанн үзв. ¹⁷ Генткн теңгрəс ду һарв: « Энтн Мини Хəəртə Көвүн! Терүнд Мини дурта таал.»