¹ Өр цəəҗ йовсн цагла Иисусиг үклин һарт бəрүлхин төлə Бурхна ах əрүн улс болн олн медəтнр хург кеҗ . ² Тедн Иисусиг бооһад, Понтий Пилат гидг толһачд күргв. ³ Терүг бəрүлҗ өгсн Иуда Иисусиг үкллə харһулхинь медəд бийəн гемшəв. Эн Һучн цаһан мөңгн деншг Бурхна ах əрүн улст болн медəтнрт өгəд келв: ⁴ «Би килнц уга цус бəрүлҗ бийəн бузрдчкв.» Тедн терүнд хəрү өгв: «Маднд юн болв? Эврəн хəлə.» ⁵ Эн цаһан мөңгн деншгүд сүмд хаяд бийəн дүүҗлҗ. ⁶ Цаһан мөңгн деншгүдиг Бурхна ах əрүн улс цуглулад келв: «Сүмд бəəсн Бурхна зөөр тəвдг ормд эн деншүдиг тəвҗ болшго, юңгад гихлə эн -цусна үнн.» ⁷ Эдн хоорндан селвцəд, делкəн һазр төгəлəд йовдг улсиг оршахин төлə эн мөңгəр шаврар кедг урчин һазр хулдҗ авна. ⁸ Тегəд тер һазр ода күртл «Цуста һазр» гиҗ нерəдгднə. ⁹ Иеремия гидг əəлдəчин келснь күцҗ: « Авсн һучн цаһан мөңгн деншг- эн Израилин көвүдин Терүнд өгсн унн, ¹⁰ тегəд тер мөңг шаврар кедг урчин һазрин төлə өгч гиҗ нанд Деед Эзн келлə.» ¹¹ Иисус толһачин өмн зогсчахла тер Терүнəс сурв: «Чи Иудеин Хан болҗахмч? Иисус энүнд хəрү өгв: «Чи эврəн тиигҗ келвч.» ¹² Бурхна ах əрүн улс болн медəтнр Терүг бурушаҗахла, Тер эднд хəрү өгсн уга. ¹³ Тиигхлə Пилат Терүнд келнə: «Кедү күн Чамаг гемшəхин төлə герчлҗəхинь Чи соңсҗанач?» ¹⁴ Иисус нег чигн гемшəлһнд хəрү өгсн уга, тегəд толһач йир икəр алң болҗ. ¹⁵ Паасхин сəн өдрлə толһач бəəсн авъясар əмтнə дурар нег кү түүрмəс сулдхдг бəəҗ. ¹⁶ Тер цагт Варрава түүрмд суусн бəəҗ. Эн деермчиг дала əмтн меддг билə. ¹⁷ Тедн цуглрхла, Пилат теднəс сурв: «Тадн кениг нанар сулдхар бəəнəт: «Варравиг аль Христос гиҗ нерəддг Иисусиг?» ¹⁸ Тедн үлү үзəд, Терүг бəрүлснь эн медлə. ¹⁹ Пилат зарһд суусн кемлə терүнə гергн Пилатд ялчан тəвəд келүлҗ: « Тер үнн-чик седклтə күүнд бичə му ке , юңгад гихлə би эндр зүүдндəн Терүнə көлтə дала зовлң үзүв.» ²⁰ Бурхна ах əрүн улс медəтнр олн əмтиг Иисусиг алтха гиһəд, Варравиг болхла сулдхин төлə суртн гиҗ тедниг күчəр иткүлв. ²¹ Тиигхлə толһач теднəс сурв: « Эн хойрас тана дурар би кениг сулдхмб? Эдн келцхəв: «Варравиг!» ²² Пилат теднд келв: «Христос гиҗ нерəддг Иисусла би ю кехмб? Цуһар хəəкрв: «Кирст хадтн!» ²³ Толһач сурв: «Ямаран му юм Эн кесмб? Болв эдн улм икəр хəəкрлдв: «Кирст хадтн!» ²⁴ Цүүгəн улм икдəд, юн болв чигн нөкд болшгоһинь Пилат үзəд, эн ус авад, һаран уһачкад, цуг əмтнə нүднд келв: «Эн үнн-чик седклтə күүнə цусн асхртха гиҗ би заксн угав, тегəд нан деер килнц уга. Эврəн медтн.» ²⁵ Цуг əмтн хəрү өгв: «Терүнə цусн мадн деер болв мана күүкд деер!» ²⁶ Тиигхлə Пилат Варравиг сулдхад, болв Иисусиг гөвдəд, кирст хадтн гиҗ закв. ²⁷ Толһачин дəəчнр Иисусиг преторийд орулчкв. Иисусин өөр цуг цергин дəəчнр цуглрв. ²⁸ Терүнə хувцинь тəəлəд, деернь хаана улан өңгтə хувц өмскв. ²⁹ Толһа деернь хатханчгар гүрсн титм өмскəд, барун һартнь бура өгв.Терүнə өмн тедн өвдлгəд, эдн Терүгəр наад бəрəд, инəлдəд келв: «Иудеин Хан! Байрл!» ³⁰ Эдн Терүнүр нульмлдад, бура авад толһаһарнь цокцхав. ³¹ Эдн Терүгəр наад бəрснə хөөн, улан өңгтə хаана хувцинь тəəлəд, көдрг деернь өмскəд, кирст хадулхар йовулв. ³² Һарч йовад эдн Симон гидг нертə күүнлə харһв. Эн Кириянəс билə. Эдн энүг Иисусин кирс күчəр авч йовулв. ³³ Тедн «Маңнан орм» нертə Голгоф гидг һазрур ирхлə, ³⁴ Терүнд цөснлə негдүлсн уксусиг күчəр уулһхар седҗ. Иисус амсчкад, энүг уухар седсн уга. ³⁵ Иисусиг кирст хадад, эдн җирв хаяд, Терүнə хувц хоорндан хуваһад, ³⁶ Терүг манад суула. ³⁷ Иисусин толһа деер тедн эврəннь дурар гемшəҗəх цас наалдулҗ. Эн «Иудеин Хан» ³⁸ Терүнлə хамдан хойр деермч күн бас кирст хадгдв: негнь - барун талас, хойрдгчнь - зүн талас. ³⁹ Эн цагла хаҗуһарнь йовҗ йовсн улс толһаһарн Терүн тал зааһад, му келəд, хəəкрлдəд бəəв. ⁴⁰ «Чи сүмиг хамхлад һурвн хонгин туршарт тосхв»- гиҗ келлəч. Кемр Чи Бурхна Көвүн болхла, кирстəс бууһад бийəн авр. ⁴¹ Бурхна ах əрүн улс, дегтр бичдг улс, медəтнр болн фарисеймуд наад бəрəд, инəлдəд келцхəв: ⁴² «Талдан улс аврдг, болв эврə бийəн аврч чаддго. Кемр Тер Израилин хан болхла, кирстəс ода бууһад ирхлə, тегəд бидн Терүнд иткхвидн.» ⁴³ «Би – Бурхна Көвүн» Иисус гиҗ келдг билəлм. Иисус Бурхнд йир икəр нəəлдг билə, тегəд Бурхнд дурн бəəхлə, Терүг ирəд авртха» гиҗ тедн келцхəҗ. ⁴⁴ Терүнлə хамдан кирст хадгдсн деермчнр Терүг бас тиигҗ гемшəсмн. ⁴⁵ Зурһан часас авн йисн час күртл цуг һазр деер харңһу болв. ⁴⁶ Йисн час болҗ йовхла, Иисус чаңһур хəəкрв: «Эли! Эли! Лама савахвани!» Тернь - эн: «Бурхн мини! Бурхн мини! Яһад Та Намаг үлдəвт?» ⁴⁷ Тедн зогсҗасн улсин зəрмнь энүг соңсчкад келцхəв: «Тер Илияг дуудҗана.» ⁴⁸ Теднəс негнь дарунь гүүһəд, кенчриг уксусар норһад, бура деер бооһад, Иисусиг уутха гиҗ өгв. ⁴⁹ Наадкснь келцхəв: «Илия ирҗ Терүг аврхий? Күлəҗəтн, хəлəхм.» ⁵⁰ Иисус хəрү чаңһур хəəкрхлə, əмнь һарч одв. ⁵¹ Эн цагла сүмин көшг деерəс авн дора күртл тасрҗ одв, һазр чичрəд- чолуд хамхрв. ⁵² Оршалһна яршгуд секгдв, олн өңгрсн əрүн улс əмдрв. ⁵³ Терүнə əмдрлһнə хөөн оршалһна яршгудас һарсн улс əрүн балһснд орад, дала əмтнд үзгдв. ⁵⁴ Һазрин чичрлһ болн цуг болсн юм үзсн зун цергин ахлач, терүнлə хамдан Иисусиг харҗасн улс йир икəр əəлдəд келцхəв: «Эн йоста Бурхна Көвүн бəəҗ!» ⁵⁵ Иисусин ардас Галилеяс ирсн, Терүнд церглсн күүкд улс тенд бас бəəһəд цугнь үзсмн. ⁵⁶ Мария Магдалина, Мария, Иаковин болн Иосин эк, Зеведеин көвүдин эк тедн дунд бас билə. ⁵⁷ Иисусин сурһуль дассн Иосиф нертə байн күн Аримафеяс асхн цагла ирҗ. ⁵⁸ Эн Пилатур, ирəд цогц өгтн гиҗ сурҗ, Пилат цогц өгтн гиҗ закв. ⁵⁹ Иосиф цогц авад, цевр, некмр эдəр ораһад, ⁶⁰ Эврəннь уулын көндəд чавчсн шин оршалһна яршгт тəвв. Оршалһна яршг бəəсн уулын көндəн үүдиг ик чолуһар тулчкад, Иосиф йовҗ одв. ⁶¹ Мария Магдалина болн талдан Мария оршалһна яршгин өмн суусмн. ⁶² Пятницин хөөн дарук өдрлə Бурхна ах əрүн улс болн фарисеймуд Пилатын өөр цуглрад келҗ: ⁶³ «Зерг! Əмд бəəсн цагтан Тер худлчин келсн үг мана сананд орв: «Һурв хонад – əмдрхв.» ⁶⁴ Тегəд һурвдгч өдр иртл, оршалһна яршгиг харултха гиҗ зак, юңгад гихлə Терүнə сурһульчнр сөөһəр ирəд, Терүг бичə хулхалтха болн əмтнд тер үклəс əмдрв гиҗ бичə келтхə гиһəд. Тегəд сүл худл түрүңк худлас му болх.» ⁶⁵ Пилат эднд келв: « Таднд харулчнр бəəнə. Яһҗ медсəрн йовад харултн.» ⁶⁶ Эдн йовад, оршалһна яршгин өөр харулчнр зогсаһад, чолунд тамһ тəвв.