¹ Иисус дасхҗах сурһулян төгсəһəд, Эврəннь сурһульчнртан келв: ² «Хойр өдр давҗ одхла, Паасх болх, Күмни Көвүн кирст хадлһнд бəрүлҗ өггдх.» ³ Эн цагла Бурхна əрүн ах əмтн, Бурхна дегтр бичдг əмтн болн олн əмтнə медəтнр Каифа гидг нертə Бурхна əрүн ахин хашад цуглрцхав. ⁴ Селвлцəд, эдн Иисусиг мек һарһад алхар шиидцхəв. ⁵ Эдн келцхəв: «Сəн өдрлə кехмн биш, юңгад гихлə эс гиҗ əмтн дурго болх.» ⁶ Иисус Вифаньд бəəсн цагт, хальдвр гемтə Симона герт күүкд күн алебастрас кесн буһшд эрднь тоста Терүнүр өөрдв. ⁷ Хот ууҗасн цагла, тер Иисусин толһаг эн авч ирсн тосарн түркв . ⁸ Энүг үзəд, Терүнə сурһульчнр уурлад келцхəв: «Яһад тоолвр угаһар мөңг һарһҗахмб? ⁹ Эн үнтə тосиг хулдҗ болх билə, һууль һууҗҗах əмтнд мөңгинь өгхмн билəвидн.» ¹⁰ Болв Иисус келсинь медəд теднд келв: «Яһад эн гергиг эмəлһəд бəəнəт эн Нанд ик сəн керг кев, ¹¹ яһад гихлə һууль һуудг əмтн кезə чигн таднла бəəх, болв Би – оньдинд бəəшгов. ¹² Эн тос Мини цогц деер асхад, Намаг оршалһнд белдҗəнə. ¹³ Таднд үнəр келҗəнəв: «Альд болв чигн эн Байрта Зəңг келгдхлə, цуг делкəд эн гергиг мартшго, ю кесинь — бас мартшго.» ¹⁴ Тиигхлə арвн хойр сурһульчнрин негнь Иуда Искариот гидг нертə Бурхна ах əмтн тал йовад сурв: ¹⁵ «Би Энүг бəрəд таднд өгхлə, нанд ю өгнт?» Эдн һучн цаһан мөңг өгх болв. ¹⁶ Түүнə хөөн эн Терүг бəрүлхəр эвтə цаг хəəдг болв. ¹⁷ Эс исксн һуйрин байрин түрүн өдрт Иисус тал сурһульчнр ирəд сурцхав: «Мадн альд Паасх Танд белдхмб?» ¹⁸ Эн келв: «Балһс орад таньдг күүг олҗ авад, терүнд медүлтн: «Багш келҗəнə - Мини цагм өөрдҗ йөвна. Би сурһульчнртаһан чини герт Паасх кенəв.» ¹⁹ Сурһульчнр Иисусин келснь күцəһəд, Паасх белдв. ²⁰ Асхн ирхлə, Иисус арвн хойр сурһульчнртаһан хотан эдлцхəв. ²¹ Тедн хот эдлҗəсн цагт Иисус келв: « Таднд үнəр келҗəнəв, таднас негнтн Намаг бəрүлҗ өгх.» ²² Тедн йир икəр һундв, күн болһн Терүнəс сурв: « Багш! Би биший?» ²³ Тер келв: «Нанла һарарн ааһд шүүслсн, тер Намаг бəрəд өгх» ²⁴ Болв Күмни Көвүн Бурхна үгд бичгдсн хаалһар йовҗ йовна. Зуг Күмни Көвүг бəрүлҗ өгсн күүнд зовлң ирх, тер күн төрлго бəəсн болхла, сəн болх билə.» ²⁵ Бəрүлҗ өгчəх Иуда Иисусас сурв: «Багш! Би биший?» Иисус терүнд келв: «Чи келвч.» ²⁶ Хот эдлҗəсн цагла, Иисус өдмг авад, əдслəд, хуһлад, сурһульчнртан өгəд келв: «Авад идтн. Эн мини цогц.» ²⁷ Ааһ авад, ханлтан өргəд, теднд өгəд келв: «Эн ааһас цуһар уутн, ²⁸ яһад гихлə эн Мини шин бооцан цусн, олн улсин килнц тəвүлхин төлə асхрҗах.» ²⁹ Таднд келҗəнəв: «Уста үзмин темсəс тер өдр күртл уухшв, шин чаһр Мини Теңгрин Эцкин орн-нутгт таднла уухв.» ³⁰ Эдн дууһан дуулчкад, Элеонск уул деер һарцхав. ³¹ Тиигхлə Иисус теднд келв: «Эн сө тадн цуһар Нанас көлтə цөкрхт, яһад гихлə бичəтə: Хөөчиг алхла – хөд тарҗ одх. ³² Намаг əмдрсн хөөн таниг Галилейд күлəнəв.» ³³ Пётр Терүнд келв: «Кемр Танас көлтə цуһар цөкрхлə, би төрүц цөкршгов.» ³⁴ Иисус энүнд келв: «Үнəр чамд келҗəнəв, эн сө эр така дуулхин өмн чи һурв дəкҗ Нанас цөкрхч.» ³⁵ Пётр Энүнд келҗəнə: «Кемр нанд Танла хамдан үкх учр харһвчн, би Танас хооран цухршгов.» Цуг сурһульчнр бас тиигҗ келцхəв. ³⁶ Терүнə хөөн Иисус теднлə нег һазрт ирв, терүг Гефсимания гиҗ нерəднə, сурһульчнртан келв: «Энд бəəҗəтн, Би йовад тенд зальврнав.» ³⁷ Эн Пётриг болн хойр Зеведеин көвүг авад дахулв, Иисусин зовлң болн һашудлһн эклв. ³⁸ Тиигхлə Эн теднд келв: «Мини седкл үкм дүңгə зовҗана! Мини өөр серглң бəəтн!» ³⁹ Невчкн цааран йовчкад, Тер чирəһəрн һазрт унад, мөргəд келв: «Эцк Мини! Арһ бəəхлə, эн ааһ мини хəврһəр йовтха! Болв Миниһəр биш, Танаһар болтха!» ⁴⁰ Сурһульчнр тал өөрдəд, Иисус тедн унтсиг үзəд, Пётрт келв: «Тадн нег часин дунд Нанла серглң бəəҗ чадҗахшийт?» ⁴¹ Җилвтлһнд орлго бəəхин төлə серглң бəəтн болн зальвртн. Сүмсн сергмҗтə, цогц чинə алдна. ⁴² Иисус цааран һарад, мөргəд келв: « Эцк мини! Арһ бəəхлə, эн ааһ мини хəврһəр йовтха, тер ааһас Намаг бичə уулһ, зуг Тана таал күцтхə!» ⁴³ Иисус ирəд тедниг унтсинь үзв, яһад гихлə теднə, нүднə зувкнь күндрҗ оч. ⁴⁴ Тедниг үлдəчкəд, Иисус дəкəд теднəс невчк цааран һарад, һурвдад мөргв, келсн үгəн дəкəд давтв. ⁴⁵ Тиигхлə Иисус Эврəннь сурһульчнртан ирəд келв: «Тадн ода чигн унтад бəəнт? Амрчант? Цаг ирв, Күмни Көвүн килнцтə əмтнə һарт бəрүлəд өггдх. ⁴⁶ Бостн, йовцхай! Намаг зарһд орулҗ өгсн күн өөрдəд ирв.» ⁴⁷ Иисус келə бəəтл, Иуда ирв, эн арвн хойр сурһульчнрас негнь билə, терүнлə дала əмтн Бурхна əрүн ах күүнəс болн медəтнрəс ирв. Эдн үлдтə болн җидтə билə. ⁴⁸ Терүнə урвач теднд докъя өгəд келв: « Мини үмссн - Иисус, Терүг автн.» ⁴⁹ Эн шулун Иисусур өөрдəд келв: «Багш, байрл! Тиигəд Терүг үмсв» ⁵⁰ Иисус энүнд келв: «Үр, яахар ирвч?» Тиигхлə, тедн өөрдəд, Иисусиг бəрцхəв. ⁵¹ Негнь Иисуста бəəсн əмтнəс һаран өмн татад, үлдəн һарһҗ авад, Бурхна əрүн ах күүнə мухлаг цокхла, үлднь терүнə чикинь тəəрв. ⁵² Тиигхлə Иисус келв: «Үлдəн ормднь орк, яһад гихлə үлд һартан авсн əмтн, үлдəсн үкх. ⁵³ Аль юн гиҗ санҗанач? Намаг Эврəннь Эцкəсн арвн хойр легионас үлү Бурхна зарцнриг илгə гиҗ сурхла илгəхий? ⁵⁴ Тиигхлə яһҗ Əрүн Бичгт бичснь күцəгдх?» ⁵⁵ Əмтнд Иисус келв: «Тадн үлд болн җид авсн Намаг бəрхəр ирвт, Намаг деермч гиҗ санҗанат? Өдр болһн Би таднла сүмд сууһад, тадниг сурһдг билəв, Намаг тадн көндəсн угат. ⁵⁶ Тиим юмн билə. Урдаснь медҗ əəлдəч бичснь ода болҗана.» Тиигхлə цуг сурһульчнр энүг үлдəчкəд гүүһəд йовҗ одцхав. ⁵⁷ Иисусиг бəрҗ авсн əмтн Каиафа гидг нертə Бурхна əрүн ах күүнд күргв, терүнə герт Бурхна дегтр меддг əмтн болн медəтнр цуглрцхав. ⁵⁸ Пётр холас Терүнə ардас Бурхна ах əрүн күүнə хаша күртл йовв. Дотрнь орад, эн зарцнрта сууһад, юуһар чилхинь үзхəр седв. ⁵⁹ Бурхна ах əрүн əмтн, отгин һардачнр болн цуг синедрион Иисусин тускар гемшəлһнə герчнр Терүнд үклин таавр һарһхар седлə, болв тиим юм олҗ чадсн уга. ⁶⁰ Худл келсн əмтн олн болв чигн, тедн юм олҗ чадсн уга. Сүүлднь хойр худлч герчлв: ⁶¹ «Эн келлə: «Би Бурхна сүмиг хамхлҗ чадхув, болн һурвн өдрин туршарт терүг босхҗ чадхув.» ⁶² Бурхна ах əрүн күн босн Иисусд келв: «Яһад юм эс келнəч? Эдн Чамаг гемшəҗəнə». ⁶³ Иисус тагчг билə. Бурхна ах əрүн күн энүнд келв: « Əмд Бурхар Чамаг икəр эрҗəнəв! Кел, Чи Христос – Бурхна Көвүн» - маднд кел. ⁶⁴ Иисус энүнд келв: «Чи келвч. Болв таднд келҗəнəв эн цагас эклəд Күмни Көвүг барун тал Бурхнас сууснь болн нааран теңгрин үүлн деер ирҗəхиг тадн үзхт.» ⁶⁵ Тиигхлə Бурхна ах əрүн күн эврəннь хувцан шуучад келв: «Бурхиг му келҗəнə! Таднд яһҗ медгднə? Ода тадн Терүнəс Бурхиг му келсинь соңслат! ⁶⁶ Таднд яһҗ медгднə?» Тедн келцхəв: «Эн үкх зөвтə!» ⁶⁷ Тиигхлə зəрмнь чирəднь нульмцхав, цокцхав, халхарнь ташцхав. ⁶⁸ Болн келцхəв: «Христос, кен чамаг цокснь кел?» ⁶⁹ Петр хашад суула. Терүнүр зарц күүкд улсас негнь өөрдҗ келв: «Чи бас Галилеин Иисуста билəч?» ⁷⁰ Болв Пётр тенд бəəсн улсин өөр келсинь гөрдəд келв: «Юуна тускар келҗəхичин медҗəхшв.» ⁷¹ Өргн үүднə ца һархлань, терүг дəкəд нег зарц күүкд күн үзв. Эн тенд бəəсн улст келв: «Назаретин Иисуста эн билə.» ⁷² Эн күүг медхшив гиһəд андһар өгч, Петр дəкəд гөрдв. ⁷³ Невчкн цаг давҗ одхла, əмтн ирцхəв, тенд зогссн Пётрт келцхəв: «Чини келн чамаг медүлҗəнə, чи теднəс негнь.» ⁷⁴ Тиигхлə эн андһаран өгəд, эн күүг медхшив гиҗ келсн үгəн батлв. Дарунь эр така хəəкрв. ⁷⁵ Тиигхлə Иисусин келсн үг Пётрин сананднь орв: «Эр така хəəкрхин өмн, һурвдад Нанас гөрдхч.» Тегəд эн һарад һашун нульмсан асхрулад уульв.