¹ Бурхна Теңгрин орн-нутг арвн күүкдлə əдл. Эдн эврəннь шаман авад, күргəн тосхар һарцхав. ² Арвн күүкдəс тавнь цецн билə, тавнь тоолвр уга билə. ³ Тоолвр уга күүкд эврəннь шаман авад, тос авсн уга бəəҗ. ⁴ Цецн күүкд шамта хамдан савдан тос авцхаҗ. ⁵ Күргн уданар ирлго бəəҗ, тегəд күүкд нөөрмлəд унтҗ оч. ⁶ Сөөннь өрəллə хəəкрлһн соңсгдв: « Күргн аашна! Өмнəснь һарцхатн!» ⁷ Тиигхлə цуһар күүкд босад эврəннь шаман ясцхав. ⁸ Тоолвр уга күүкд келцхəв : «Тоснасн маднд өгтн, яһад гихлə, мадна шам унтрҗана!» ⁹ Цецн күүкд келцхəв : «Танд чигн, маднд чигн дуту бичə болтха гиһəд йовад бийдəн тос хулдҗ автн.» ¹⁰ Тоолвр уга күүкд хулд кехəр йовцхав, тер цагт күргн ирв, цецн күүкд белн билə, эдн хамдан хүрмин нəəрт орцхав, үүдн хаагдв. ¹¹ Терүнə хөөн үлдсн күүкд келцхəв « Зерг! Зерг! Маднд сек!» ¹² Эн теднд хəрү өгв : «Үнинь таднд келҗəнəв! Би тадниг медҗəхшүв!» ¹³ Тегəд белн болтн, яһад гихлə Күмни Көвүн ямаран өдрлə, часла ирхинь тадн медҗ чадҗахшит. ¹⁴ Яһад гихлə Тер күүнə һазрур йовҗах күн кевтə, эврəннь мухлаһан дуудад, теднд герт бəəсəн даалһх. ¹⁵ Негнднь тавн талант өгв, хойрдгчднь- хойр талант өгв, дарукднь - негиг. Күн болһнд терүнə чидлəрнь өгч. Дарунь хаалһд ач һарад йовҗ одв. ¹⁶ Тавн талант авснь — мөңгəн көдлмштəн орулв, деерəснь дəкəд тавн талант немəд авч. ¹⁷ Тиим кевəр хойр талант авснь дəкəд тавн талант авчх. ¹⁸ Нег талант авснь терүгəн һазрт булв, эзнəннь цаһан мөңг бултулчкв. ¹⁹ Дала цаг давҗ одсн хөөн тер мухласин эзн теднəс тооца некҗəнə. ²⁰ Тавн талант авснь өөрдəд талдан тавн талант авч ирəд келв : «Эзн! Чи нанд тавн талант өглəч. Би тер мөңгəр дəкəд тавн талантар олз келəв.» ²¹ Терүнə эзн энүнд келв : « Сəн цаһан седклтə болн үнн чикəр бəəдг мухла! Чи үнн чикəр бичкн кергт орлцад күцəвүч, тегəд кесг улс толһалх чамд зөв өгнəв. Эврəннь эзнтəһəн байрл!» ²² Хойр талант авснь өөрдəд келв: «Эзн! Чи нанд хойр талант өглəч. Би тер мөңгəр дəкəд хойр талантар олз келəв.» ²³ Эзнь терүнд келв : «Сəн, цаһан саната болн үнн чикəр бəəдг мухла! Чи үнн чикəр бичкн кергт орлцад күцəвүч, тегəд чи дала əмтнə толһач болхч. Эврəннь эзнтəһəн байрл!» ²⁴ Нег талант авснь өөрдəд келв: «Эзн! Чамаг догшн күн гиҗ би медлəв. Тəрə хуранач, зуг терүг тəрсн угач, цацсн уга болвчн - хуранач. ²⁵ Би əəһəд тер нег талантан һазрт бултулчклав. Эн чини - чамд.» ²⁶ Терүнə эзн энүнд хəрү өгв: «Хар саната болн залху мухла! Эс тəрсн һазрт би урһц ахулнав, эс цацсн һазрас тəрə хуранав, чи терүгинь медлəч. ²⁷ Тиигхлə чи мини цаһан мөңг сольдг күүнд өгх зөвтə билəч, би ирҗ олзан авх билəв. ²⁸ Энүнəс талантинь авад, талдан арвн талантта күүнд өгтн. ²⁹ Яһад гихлə бəəснднь өггдх болн немгдх, угаһаснь бəəсинь күчəр авгдх . ³⁰ Тус уга мухлаг һазак харңһуд һарһҗ хайтн! Терүнд уульлһн болн шүд хəврлһн болх.» Энүнə хөөн Иисус зарлв: «Соңсхин төлə чикн бəəхлə -соңстн!» ³¹ Күмни Көвүн цуг əрүн зарцнртаһан Теңгрин туурмҗд ширəлхҗ суухла, ³² Терүнə өмн цуг келн- əмтн цуглрх. Ямаран кевəр хөөч эврəннь хөөдəн ямадас салһна, тиигҗ əмтиг йилһх. ³³ Хөөдиг Бийəсн барун хаҗуд тəвх, ямадыг - зүн хаҗуд. ³⁴ Тиигхлə Хан Бийəснь барун хаҗуд бəəснднь келх: « Мини Эцкəс əдс авсн ирцхəтн, экнəс таднд белдсн Бурхна Теңгрин орн-нутгин зөөр эдлтн. ³⁵ Яһад гихлə Би өлсүв - тадн хот Нанд өглəт.Ундассн цагт – тадн Нанд ус өглəт, һазр эргəд ирхлəм – тадн Намаг орулҗ авлат. ³⁶ Нүцкн билəв – тадн хувц Нанд өгвт. Гемтə билəв – тадн Нанур золһҗ ирлəт. Түүрмд билəв - тадн Нан тал ирлəт.» ³⁷ Тиигхлə Бурхна закаһар бəəдг əмтн Терүнд келв : «Деед Эзн! Кезə мадн өлссн Таниг үзəд, хот өглəвидн? Ундасад йовсн Танд – ус өглəвидн? ³⁸ Кезə мадн Таниг Һазр эргəд ирхлəтн орулҗ авлавидн? Нүцкн бəəсн цагт хувцллавидн? ³⁹ Кезə мадн Таниг түүрмд эс гиҗ гемтə бəəсн цагт — Танур ирсмб?» ⁴⁰ Хан теднд хəрү өгх : «Үнəр келҗəнəв ! Тадн ахнр дундас нег ахдм оньган өглəт. Нанд дөңгəн күрглəт» - гиҗ Би тоолдув. ⁴¹ Зүн хаҗуд бəəснд Хан келх: «Харалгдсн, Нанас цааран йовтн, эрлгт болн терүнə нөкднрт белдчксн тамин һалд одтн, ⁴² яһад гихлə: «Би өлсүв – тадн хот Нанд өгсн угат. Ундассн цагт — тадн Нанд ус өгсн угат. ⁴³ Һазр эргəд ирхлəм - тадн Намаг орулҗ авсн угат. Нүцкн билəв – хувц өгсн угат. Түүрмд болн гемтə бəəсн цагт – тадн Нанур золһҗ ирсн угат.» ⁴⁴ Тиигхлə зүн хаҗуд бəəсн улс Терүнд келх: «Деед Эзн! Кезə мадн өлссн, ундасҗ йовсн, һазр эргəд ирсн, нүцкн, гемтə, түүрмд бəəсн Танд нөкд эс болувидн?» ⁴⁵ Тегəд Эн теднд хəрү өгх : «Үнəр таднд келҗəнəв: тадн нег бичкнд дөңгəн күргсн угат, тиигхлə Нанд чигн нөкд болсн угат. ⁴⁶ Тегəд эдн мөңк зовлңгд тусх, Бурхна закаһар бəəдг улс мөңк җирһлд орх.»