¹ Иисусиг Иерусалимин сүмəс һарч йовхлань, Терүнд Сурһульчнрнь Иисуст сүмин бəəшңгүд үзүлхəр өөрдцхəв. ² Иисус теднд келв: «Эн юмсудиг үзҗ бəəнт? Үнəр таднд келҗəнəв: цуг эн хамхрх, чолун деер чолун үлдшго.» ³ Елеона уул деер Иисусиг суутл сурһульчнрнь Терүнүр өөрдəд сурв: «Таниг хəрү ирҗ йовхла, нарта орчлңгин болн цагин чилгчиннь темдг ямаран болхмб? ⁴ Иисус теднд иигҗ хəрү өгв: «Болһатн. Таднд кен чигн худл келəд, бий талан татад төөрүлхəр седх. ⁵ Юңгад гихлə кесгнь Мини нерəр ирəд : «Би Христосв» – гиҗ келəд олн əмтиг меклх. ⁶ Бичə əəтн, энд-тенд дəн болҗахинь таднд соңсгдх. Тиим юмн учрх зөвтə. Зуг тернь чигн чилгч биш. ⁷ Юңгад гихлə келн-əмтн нег-негиннь өмнəс буцлтх болн орн-нутгуд хоорндан буцлтх, харһнлһн, хальдврта гем тарлһн болн энд-тенд һазрин чичрлһн болх. ⁸ Цуг эн күүкд күүнə цаһан төр болҗах зовлңгин эклцлə əдл. ⁹ Тер цагла тадниг бəрҗ авад, зоваһад алх. Нанас көлтə таднд цуг келн-əмтн дурго болх. ¹⁰ Тиигхлə кесгнь итклəсн цухрад, нег-негндəн дурго болад, нег-негəн бəрҗ өгх. ¹¹ Олн худлч əəлдəчнр ирəд, кесг улсиг итклəсинь цухрулад төөрүлəд меклх. ¹² Əмтн улм икəр зака эвдəд, теднə килнцсинь икдəд, Бурхнд болн нег-негндəн дурлҗасн улсин дурнь баһрх. ¹³ Сүл күртл дала зовлң тессн күн – авргдх. ¹⁴ Цуг делкəн келн əмтнд герчлхин төлə Бурхна Теңгрин орн-нутгин Байрта Зəңг тархагдх. Тегəд сүл чилгчнь ирх. ¹⁵ Əəлдəч Даниилин келсəр – умшҗасн əмтн меддтхə – əрүн ормд цань уга җигшүртə юм үзхлəрн, ¹⁶ тиигхлə Иудейд бəəснь уул тал гүүтхə. ¹⁷ Герин ора деер бəəснь, бууҗ гертəсəн юм бичə автха. ¹⁸ Кеер бəəснь хувцан авхар хəрү гер талан бичə эргтхə. ¹⁹ Тер өдрмүдт саата болн көкүл күүкд улс ик зовлңгта болх. ²⁰ Бурхна Суббот өдрлə эс гиҗ үвлəр тиим юмн бичə болтха гиҗ зальврҗатн. ²¹ Юңгад гихлə тер цагт дегд һашута ик уйдлта юмн болх. Тиим юмн нарта орчлңгин эклцəс авн ода күртл үзгдсн уга билə. Цааранднь чигн тиим юмн үзгдшго. ²² Кемр тер өдрмүдиг Бурхн эс ахрдулсн болхла, нег чигн күн авргдшго билə. Зуг шүүҗ авсн улсин төлə Бурхн тер өдрмүд ахрдулх. ²³ Тиигхлə таднд: Христос эн бəəнə эс гиҗ тенд бəəнə - гиснднь бичə итктн. ²⁴ Юңгад гихлə худлч «Христосмуд» болн худлч əəлдəчнр ирх цаг болх. Тедн Бурхнд иткдг, шүүҗ авсн улсиг меклхəр ик өвəрцс болн темгдүд үзүлх. ²⁵ Би таднд эртəснь келҗəнəв. ²⁶ Тегəд тедн келхлə: «Тер эн көдəд бəəнə» - гихлəнь бичə һартн, Эн нуувч хорасд бəəнə -гихлəнь бичə итктн . ²⁷ Юңгад гихлə һал цəкллһн зүн үзгəсн барун үзг тал герлтсн мет Күмни Көвүнə ирлһн болх. ²⁸ Күш кевтсн һазрт һəрд шовуд цуглрна. ²⁹ Тер һашута уйдлта өдрмүдин хөөн нарн харңһурдх, сар герл өгдгəн уурх, теңгрин оддуд унх, теңгрин чидл нəəлх. ³⁰ Тиигхлə теңгр деер Күмни Көвүнə ончта темдг үзгдх. Цуг Делкəн келн-əмтн уульцхах. Тедн Күмни Көвүг алдр туурмҗтаһар болн чидлтəһəр хəрү эргəд ирҗ йовхинь үзх. ³¹ Күмни Көвүн Эврəннь элчнрəн чаңһ бүрə татулад йовулх. Теднь Терүнə шүүҗ авсн улснь дөрвн үзгəс, дөрвн салькнас, теңгрин захас зах күртл цуглулх. ³² Үлгүрлəд келхлə инҗрин мод авхмн: терүнə бурас җөөлрəд бəəхлə, зун өөрдҗ ирснь тадн меднəт. ³³ Терүнлə əдл тадн цуг энүг үзəд медтн. Күмни Көвүнə ирлһн өөрхн, үүднə өөр бəəхинь медəд автн. ³⁴ Үнəр Би таднд келҗəнəв: « Эн үйнр чилəд уга бəəтл, цуг эн юмн ирх. ³⁵ Теңгр һазр хойр уга болх, уурх, зуг Мини келсн үгмүд мөңкинд сольгдшго. ³⁶ Күмни Көвүн ямаран часла, ямаран өдр ирхин тускар нег чигн күн медхш, Бурхна элчнр чигн медхш. Һанцхн Мини Эцкм меднə. ³⁷ Зуг Ноойин өдрмүдлə болсн юмн Күмни Көвүнə ирлһнлə болх. ³⁸ Усна аюлын өдрмүдин өмн əмтн хотан эдлəд, ууһад, гер авад, хəрд һарад бəəсмн. Тиигəд Ной кермдəн ортл, һазр деер əмтн юм медлго, ухаллго бəəсмн ³⁹ Усна аюлд əмтн чивтлəн, теднə уханд тиим юмн болх гиҗ сансн уга бəəҗ. Күмни Көвүнə ирлһнлə тиим бас болх. ⁴⁰ Хойр күн тəрəнə һазрт бəəхлə, негнь - авгдх, наадкнь — үлдəгдх. ⁴¹ Хойр күүкд күн һуйр теермҗəтл, негнь - авгдх, наадкннь — үлдəгдх. ⁴² Бийəн саг-сергг бəртн. Эзн кезə хулхач ирхинь тер болн тадн медхшлмт. ⁴³ Болв медҗ автн. Кемр герин эзн хулхач кезə ирхинь медсн болхла, сөннь дуусн унтлго, саг-сергг бəəһəд, гериннь уулан малтулшго билəт. ⁴⁴ Тер төлəд тадн белн болтн. Юңгад гихлə Күмни Көвүн тадниг эс күлəҗəсн цагла ирх. ⁴⁵ Ямаран толһачиг тадн ухата болн итклтə гиҗ санҗанат? Терүг эзнь ялчнртан цаглань хотынь өгтхə гиҗ тəвсмн. ⁴⁶ Эзнь өгсн даалһврнь сəəнəр күцəдг толһалч кишгтə болх. ⁴⁷ Үнəр таднд келҗəнəв: тиим толһачиг эзн цуг эврəннь əдл-ахудан һардачар тəвх. ⁴⁸ Кемр толһач ухан уга болад, эврəннь зүркндəн келхлə: « Мини эзн кесгтəн иршго – гиһəд, ⁴⁹ əркнч улсла, əрк ууһад, үүрмүдəн цокад бəəхлə, ⁵⁰ тер толһач эзəн эс күлəҗəсн өдрлə болн часла ирх гиҗ сансн уга. ⁵¹ Терүг эзнь догшар цааҗлад хойр чирəтə улс туссн һазрт хайх. Тер һазрт əмтн ик зовлңгла харһх. Тенд оркрад, ууляд, шүдəн хəврх.