¹ Тегәд Иисус әмтиг болн Эврәннь сурһульчнран экләд дасхҗаһад иигҗ келв: ² «Дегтр бичдг улс болн фарисеймуд Моисеин орм эзлҗ Бурхна Зака һардҗана.» ³ Цуг теднә келсинь соңстн, соңсад зааснь кетн. Болв тедн кесн кергүдинь, кеҗәх юмнь дураҗ бичә кетн, юңгад гихлә тедн амарн келвчн, бийсинь келсәр, заасар бәәхш. ⁴ Тедн йир күнд аца әмтнә нурһнд үүрүлнә, зуг әмтнд тедн дөңгән күргхин төлә хурһан чигн көндәхш. ⁵ Тедн әмтнд бийән үзүлхәр юм кенә. Хормаһан утдулад сәәхрүлнә, Бурхна закас болн бичәтә зальврлһста кенчрмүд маңнадан, толһа деерән болн һартан зүүнә. ⁶ Нәр болсн цагт ачта ормд кевтхдән дурта, синагогмудт болхла деегшән һарад сууцхана. ⁷ Хургт ирсн цагт, тедниг әмтн «Багш! Багш!» гиҗ дуудхла икәр байрлна. ⁸ Тадн болхла багш гиҗ бичә бийән нерәдтн, юңгад гихлә таднд һанцхн багш Христос бәәнә, тадн цуһар хоорндан ахнр-дүүнр болҗанат. ⁹ Тадн һазр деер Эцк гиҗ бичә кү дуудтн, юңгад гихлә тана һанцхн Эцк Теңгр деер бәәнә. ¹⁰ Тадн Багш гиҗ бийән бичә нерәдтн, юңгад гихлә тана һанцхн Багш Христос болҗана. ¹¹ Тадн дунд ик болснь зарц болх. ¹² Юңгад гихлә бийән деегшлсн күн дорацулгдх. Зуг бийән дорацулсн күн деегшлдх. ¹³ Хойр чирәтә дегтр бичдг улс болн фарисеймуд, ик гидг зовлң таднд ирх, юңгад гихлә Бурхна Теңгрин орн-нутг әмтнәс хааҗанат. Тадн бийстн орҗахшт, болв орхар седҗәх улсиг орулҗахшт. ¹⁴ Хойр чирәтә дегтр бичдг улсиг болн фарисеймуд, ик гидг зовлңгта болхт! Юңгад гихлә тадн белвсн гергчудин герт бийдән теднәс ик ачлвр авхин төлә худлар удан мөргнәт. Тегәд тадн түүнәс ик цааҗла харһхт. ¹⁵ Хойр чирәтә дегтр бичдг улс болн фарисеймуд, ик зовлңгта болхит! Юңгад гихлә негхн күүг бийән дуралһхар седәд, эврәһәрн бәәлһхәр седәд, теңгс һатлад, һазр эргәд гүүнәт. Болв тер күүнд эврәннь уха-санаһан орулчкад, бийәсн хойр дам му дор мөңк һалын көвү кенәт. ¹⁶ Сохр көтләчнр, таднд бас ик зовлң ирх! Юңгад гихлә тадн келнәт: «Сүмәр андһар тәвсн күүнд юмн болшго. Кемр күн сүмин алтар андһар тәвсн болхла, тер күн килнцтә болх. ¹⁷ Ухан уга болн сохр улс! Алтыг әрүлсн сүм эс гиҗ алтн деер? ¹⁸ Дәкн тадн келнәт: «Кемр бәрцәр андһар тәвсн күүнд юмн болшго. Зуг бәрц деер бәәсн юмар андһар тәвсн күн килнцтә болх.» ¹⁹ Уха уга болн сохр улс! Бәрц деер бәәсн юмиг әрүлсн бәрц эс гиҗ деернь бәәсн юмнь деер? ²⁰ Тегәд бәрцәр андһарлсн күн бәрцәр чигн болн дееринь бәәсн юмар андрлһна. ²¹ Сүмәр андһар тәвсн күн сүмәр чигн болн тенд бәәдг Бурхар андһарлҗана. ²² Теңгрәр андһар тәвҗәсн күн Бурхна ширәһәр болн деер суусн Бурхар андһарлҗана. ²³ Хойр чирәтә дегтр бичдг улс болн фарисеймуд, тадн басл ик гидг зовлңгта болхит! Юңгад гихлә тадн бадрашкас, зорһдас, зирәс арвдгч хувинь Бурхнд нерәдәд өгнәт. Болв Бурхна һол закаг: хәәрлт, үнн чик бәәдл - җирһл, итклиг үлдәҗәнәт. Энүг чигн болн терүг чигн күцәх кергтәһинь медҗ автн. ²⁴ Сохр көтләчнр бөкүниг уусн ундасн бәрҗ хайдг, болв ик темәг зальгҗахан үзтн. ²⁵ Хойр чирәтә дегтр бичдг улс болн фарисеймуд! Тадн басл гидг ик зовлңгта болхт! Юңгад гихлә тадн ааһиг һазаһаснь цеврлнәт, зуг тана ааһин дотрнь эс тессн ховдг болн хармч седкләр олсн юмар дүүрснь тадн ухалҗахшт, керглҗәхшт. ²⁶ Сохр фарисеймуд! Ааһин дотркинь цеврәр бәр, тегәд һазакнь цеврлгдх. ²⁷ Хойр чирәтә дегтр бичдг улс болн фарисеймуд, басл ик гидг зовлңгта болхит! Тадн сәәхн ширдчксн үкәрлә әдл болҗ йовнат, болв дотрнь болхла үксн күүнә ясмудар болн җигшүртә юмсудар дүүрң болҗанат. ²⁸ Тадн әмтнә нүднд һазак бәәдл – кевәрн цаһан саната, үнн седклтә, әмтнд дурта улс болҗ үзгднәт, болв тана дотрк седкл болн зүркн килнцәр болн хар санаһар, хойр чирәтә кергүдәр дүүрң болҗана. ²⁹ Хойр чирәтә дегтр бичдг улс болн фарисеймуд, йир ик зовлңгта болхит! Юңгад гихлә тадн әәлдәчнрт үкәрмүд тосхнат, Бурхнд иткдг улсин бумблвс сәәхрүлнәт. Тегәд келнәт: ³⁰ «Кемр бидн өвкнрин бәәсн цагла әмд йовсн болхла, бидн әәлдәчнрин цус асхруллһнд орлцшго биләвидн.» ³¹ Тадн эврән бийстн герчлҗәнәт: бидн әәлдәчнр алсн улсин үрдүд болҗанавидн. ³² Эврәннь өвкнрин кессн кергүдиг цааранднь күцәтн. ³³ Тадн хойр көлтә хорта моһас! Яһҗ тадн мөңк һалас зулҗ гүүхмт! ³⁴ Таднур әәлдәчнриг, цецн ухата болн дегтр бичдг улсиг Би илгәҗәнәв. Тедниг тадн зәрмнь моднд хадад әмнь таслхт, синагогмудт цокад, балһснас балһснур көөхт. ³⁵ Тадн деер Бурхнд иткдг улсин цусн! Бурхнд иткдг Авелин цуснас экләд, сүмин болн бәрцин хоорнд әмнь таслсн Варахин көвүн Захария күртл, тадн деер ирх. ³⁶ Үнәр таднд келҗәнәв: цуг эн Бурхнд иткдг улсин цусна төлә эн үйнр цааҗлгдх. ³⁷ Иерусалим, Иерусалим әәлдәчнрин әм таслдг, чамур илгәсн улсиг чолуһар цокҗ көөдг! Кедү дәкҗ чини үрдүдиг Би, шовун мет, җивр доран цуглулхар седләв. Зуг чини үрдүд цуглрхар седсн уга. ³⁸ Эн учрар тана гермүд хоосн үлдх. ³⁹ Тегәд Би таднд келҗәнәв: «Тадн ода Намаг үзшгот!»- гиҗ тадниг эс келтл ода: «Деед Эзнә Нерн деерәс Ирснь әдстә!»