¹ Бурхна Суббот өдр давсн билә. Долан хонгин өр цәәҗ йовхла, Мария Магдалина болн талдан Мария хадын көндәд бәәсн оршалһна һазр хәләхәр ирцхәв. ² Генткн һазрин ик чичрлһн болв, яһад гихлә Теңгрәс Деед Эзн элч бууҗ ирв. Эн өөрдҗ ирәд оршалһна һазрас чолуг цааранднь түлкҗ, оркад деернь суув. ³ Терүнә өңг-дүрснь һал цәкллһнлә әдл, хувцнь болхла цаснла әдл цаһан. ⁴ Энүнәс әәсн харулчнр чичлрдәд, әмән геесн әмтнә бәәдл һарв. ⁵ Болв Буурхна элч күүкд улсур хәләһәд келв: «Бичә әәтн. Тадн кирст хадгдсн Иисусиг хәәҗәхитн би меднәв. ⁶ Иисус энд уга. Эврәннь келсәр Иисус әмдрҗ одла. Деед Эзн кевтсн орминь өөрдәд хәләтн. ⁷ Шулуһар йовад, Иисус әмдрәд, тедниг Галилейд сурһульчнртан күләҗәхин тускар, сурһульчнртнь келтн. Мини келсәр тенд Терүг тадн үзхт.» ^8-9 Тедн әәв чигн, болв ик гидг байртаһар оршалһна ормас һарад, Терүнә сурһульчнрт келхәр шулуһар гүүцхәв. Тедн гүүҗ йовхла, Иисус тедниг үзәд келв: «Байрлтн!» Күүкд улс Иисусур өөрдәд, Терүнә көлинь атхад авчкад, өмннь сөгдцхәв. ¹⁰ Тиигхлә Иисус эднд келв: «Бичә әәтн. Галилеюр йовад мини ахнрт келтн. Тедн Намаг тенд үзх.» ¹¹ Тедн йовҗ йовтл, зәрм харулчнр балһснур ирәд, Бурхна ах әрүн улст цуг болсн юмин тускар келчксн бәәҗ. ^12-13 Бурхна ах әрүн улс медәтнрлә селвцәд, харулчнрт дала мөңг өгәд келҗ: «Мадн унтҗ одсн цагла Терүнә сурһульчнр ирәд Иисусиг хулхалад авад йовҗ оч гиһәд келтн. ¹⁴ Кемр эн болсн йовдл ахлачд күрхлә, бидн терүнд келәд иткүлхүвидн болн тадниг заслһнас харсҗ авхувидн.» ¹⁵ Эдн мөңг авчкад, юн гиҗ зааснь күцәв. Энүнә туск келвр Иудейнрин дунд тархагдад, өдгә цагт чигн әмтн дунд келгднә. ¹⁶ Арвн негн сурһульчнрнь Иисус заасн Галилеин уул деер һарцхав. ¹⁷ Уул деер һарад, Иисусиг үзәд, Терүнд сөгдцхәв. Зәрмнь итклго алмацв. ¹⁸ Иисус өөрдәд теднд келв: « Цуг теңгр деер болн һазр деер бәәсн йосн Нанд өггдв. ¹⁹ Тиигәд йовтн, цуг келн-улсиг дасхтн. Теңгрин Эцкин, Күмни Көвүнә болн Әрүн Сәкүснә төлә уснд кирслтн. ²⁰ Цуг Мини келсн зааврмудыг цугтнь дасхад күцәтхә гиҗ әмтиг сурһтн. Би таднла хамдан цуг өдрмүд чилтл, мөңкинд, орчлңгин чилгч иртл бәәхнь медтн, оньдин итктн болн тодлтн автн. Аминь — эн тоот күцәтхә!