¹ Иерусалим тал өөрдәд, Елеонск уулын өөр бәәсн Виффагийд ирхлә, Иисус хойр сурһульчан илгәһәд теднд келв: ² «Тана өмн бәәсн селәнүр одтн. Тадн дарунь тенд баахн ээлҗһиг уята экиннь өөр зогсчахиг олхт. Сулдхад тедниг Нанур авч иртн. ³ Кемр кен чигн таднд ю болв чигн келхлә, Деед Эзнд тедн кергтә гиҗ хәрү өгтн. Тегәд дарунь тедниг тәвх.» ⁴ Әәлдәчин келсн үгәр эн йовдл болсмн. Әәлдәч болхла иигҗ келсмн. ⁵ « Сиона күүкнд келтн: «Чини номһн Хан чамтал баахн ээлҗгн деер болн терүнә ярм зүүсн эк деер суусн аашна.» ⁶ Сурһульчнр йовад, Иисусин келсн заавриг күцәв. ⁷ Тедн баахн ээлҗһиг эктәһинь көтләд авч ирәд, деернь эврәннь хувцан делгв, Иисус деернь суув. ⁸ Иисусин йовсн хаалһарнь кесг әмтн өмсҗ йовсн хувцан делгцхәв, талдан улс модын бүчрмүд таслад, хаалһарнь делгәд йовцхав. ⁹ Иисусин өмн йовсн болн Иисуста хамдан йовсн әмтн хәәкрцхәв: «Давидин Көвүнд – Туурмҗ! Деед Эзнә төлә йовсн әдстә болтха! Теңгрт бәәсн Туурмҗд- магтал!» ¹⁰ Тегәд Иисус деегшән Иерусалимд ирхлә, цуг балһсна әмтн үүмлдәд бәәҗ сурцхав: «Эн кемб?» ¹¹ Әмтн келв: «Энтн Иисус Галилеин Назаретын Әәлдәч!» ¹² Иисус Бурхна сүмд орад, тендәс хулд кеҗәсн болн хулдҗах улсиг көөв. Тер мөңг сольдг улсин ширәс болн көглҗрһ хулдҗасн әмтнә сандлмудыг көлврүлв. ¹³ Иисус теднд келв: «Иигҗ бичәтә: Мини гер зальврлһна гер гиҗ нерәдгх, зуг тадн болхла энүг деермчин кевтр кеҗт.» ¹⁴ Бурхна сүмд Терүн тал доһлң болн сохр әмтн өөрдхлә, Иисус тедниг эдгәв. ¹⁵ Иисусин кесг кесн өвәрцс болн бичкдүд Бурхна сүмд –« Давидин Көвүнд магтал!» - гиһәд хәәкрҗәсинь соңссн Бурхна ах әрүн , дегтр бичдг улс ийр икәр уурлцхав. ¹⁶ Терүнд келв: «Тедн ю келҗәхнь Чи соңсҗанч?» Иисус иим хәрү өгв: «Э-э! Тадн төрүц умшсн угавт; Бичкдүдин болн нилх күүкдин дууһар Чи Бийдән магтал өргҗәнәч!» ¹⁷ Әмтиг үлдәчкәд, Иисус балһснас һарчкад, Вифаньд ирәд хонв. ¹⁸ Өрүнднь Иисус хәрү балһснур йовҗ йовхла геснь өлсҗ. ¹⁹ Хаалһин өөр инҗрин мод үзчкәд, Иисус энүнүр өөрдәд хәләһәд, хамтхаснас үлү юм олҗ чадсн уга. Тегәд Тер моднд келв:«Дәкҗ эн моднд темсн бичә урһтха.» Инҗр модн дарунь хагсҗ одв. ²⁰ Сурһульчнрнь энүг үзчкәд, алң болад келв: « Яһад инҗр модн дарунь хагсҗ одв.» ²¹ Иисус келв: « Үнәр келҗәнәв: кемр тадн маһдл угаһар иткхлә, Мини инҗрин моднла кесн юмнас үлү юм кеҗ чадхит. Кемр тадн эн уулд келхлә:«Босад теңгсин уснд ун – тадна келсәр болх. ²² Тадн Бурхнд итклтәһәр зальврхла, ю сурнат — сурсан авхт.» ²³ Тегәд Иисус өөдән сүмд орад сурһҗасн цагт, Терүнүр Бурхна ах әрүн улс болн медәтнр өөрдәд сурв: « Чи ямаран йосар энүг кеҗәнәч? Кен Чамд тиим йос өгсмн?» ²⁴ Иисус теднд хәрү өгв: «Танас Би бас сурвр сурхар бәәнәв. Кемр тадн келхлә Би бас таднд ямаран йосар энүг кеҗәхән келнәв. ²⁵ Иоанна кирслһн альдас ирсмб? Теңгрәс эс гиҗ әмтнәс. Тедн хоорндан ухалад күүндцхәв: кемр бидн теңгрәс гиҗ келхлә, Тер маднд келх: юңгад тадн терүнд итксн угат? ²⁶ Әмтнәс гиһәд келхлә, олн улсас әәҗәнәвидн, юңгад гихлә тедн Иоанниг әәлдәч гиҗ тоолҗана. Тедн Иисуст хәрү өгв: медҗәхшвидн.» ²⁷ Тегәд Тер эднд келв: «Би бас таднд ямаран йосар кеҗәхән келшгов.» ²⁸ Тадн ю гиҗ санҗанат? Нег күн хойр көвүтә бәәҗ. Ууһн көвүнүрн өөрдәд келв: «Көвүн мини. Эндр мини уста үзм тәрсн һазрт көдл.» ²⁹ Зуг тернь хәрү өгв: би йовшгов. Болв терүнә хөөн гемән сурад йовв. ³⁰ Отхн көвүнүрн эцкнь ирәд, бас тиигҗ келхлә отхнь иигҗ хәрү өгв: эцк мини, ода йовнав — гиҗ келәд йовсн уга. ³¹ Кен эн хойрас эцкин даалһвр күцәв? -гиҗ сурхла, Терүнд келцхәҗ: «Ууһн көвүнь.» Үнәр келҗәнәв, мөңг цуглулдг улс болн килнцтә буру йовдл һарһдг күүкд улс таднас түрүләд, му уха санаһасн, килнцәсн цеврлгдәд Теңгрин Бурхна орн-нутгт орх. ³² Юңгад гихлә Иоанн Бурхна чик хаалһар ирв чигн тадн итксн угат. Мөңг цуглулдг улс болн килнцтә буру йовдл һарһдг күүкд улс терүнд итксмн. Тер юмиг үзв чигн, соңсв чигн тадн уха-санаһан сольсн угат, килнцәсн цеврлгдсн угат. Тадн Терүнд итксн угат. ³³ Талдан цецн келвр соңстн. Нег дала һазрта байн күн бәәҗ. Тер эврәннь һазртан уста үзм тәрҗ. Терүг хашалад, уста үзм шахдг нүк малтад, деернь харулчнр бәәдг гер тосхҗ. Эн эзн уста үзм тәрсн һазран тәрәчнрт өгәд, бийнь йовҗ одв. ³⁴ Темс цуглулх цаг ирхлә, тер эврәннь ялчнран уста үзмин тәрәчнр тал темсән авхар илгәв. ³⁵ Зуг тәрәчнр терүнә ялчнриг бәрҗ авад: негинь - цокад,хойрдгчнь — әминь таслад, һурвдгчинь чолуһар цоксмн. ³⁶ Тиигхлә эзн хойрдад ялчнран тәвнә. Зуг хойрдад тәвсн ялчнрин тонь түрүңкәсн үлү бәәҗ. Тәрәчнр тедниг бас тиигҗ тосна. ³⁷ Сүүлднь, тер эврәннь көвүһән илгәһәд келв: «Мини көвүнәс ичх, эмәх.» ³⁸ Уста үзмин тәрәчнр көвүһнь үзчкәд келв: «Тер өнчән авх көвүнь. Терүнә әминь таслад, өнчинь эзлҗ авхмн.» ³⁹ Тәрәчнр көвүһинь бәрҗ авад, уста үзмин һазрин цань һарһад, әминь таслчкв. ⁴⁰ . Тегәд уста үзмин һазрин эзн ирхләрн тер тәрәчнриг яахмб?» ⁴¹ Терүнд келҗ: «Эн хар саната, му догшн йовдл һарһсн тәрәчнриг догшн, һашута цааҗла харһулх. Эн уста үзмин һазран цаглань темс хураҗ авад, эзндән өгдг тәрәчнрт өгх.» ⁴² Иисус теднд келв: «Тадн Бурхна бичгт төрүц умшсн угавт: тосхачнрин һолсн чолун герин өнцгин һол чолун болв гиҗ Эн Бурхнас ирсн өвәрц мана нүднд үзүлгдҗәнә?» ⁴³ Тиим учрар таднд келҗәнәв: « Теңгрин Бурхна орн-нутг таднас булаһад, талдан келн әмтнд өггдх, тедн цаглань темс авч ирх. ⁴⁴ Эн чолун деер унсн күн цокгдх, күүнә толһа деер эн чолун унхла, дарад алчкх – гиҗ Би таднд келҗәнәв.» ⁴⁵ Бурхна ах әрүн улс болн фарисеймуд Иисусин келсн цецн келврмүд соңсчкад, Иисус теднә тускар келҗәсинь дотран медәд авсмн. ⁴⁶ Тегәд тедн Иисусиг бәрҗ авхар седҗ, зуг олн әмтнәс әәҗ. Юңгад гихлә әмтн Иисусиг әәлдәч гиҗ тоолдг бәәсмн.