¹ Бурхна Теңгрин орн-нутг герин эзн залута əдл, тер өрүн эрт гертəсн һарад, уста үзм тəрсн һазрт көдлх əмт нəəмəдлхəр йовҗ одв. ² Эн нəəмəдлсн көдмлшнчрт нег динарий өдрин дуусн көдлхлə өгх болҗ күүндҗ. ³ Йисн часин алднд эн гертəсн һарад, талдан улсиг үзв, тедн көдлмш угаһар базрт зогсҗасмн. ⁴ Эзн залу эднд келв: «Тадн бас мини уста үзм тəрсн һазрт одад көдлтн, таднд өггдх юмиг - өгнəв.» Тедн йовцхав. ⁵ Эн дəкəд үдин алднд һарад, үзсн əмтиг уста үзм тəрдг һазртан орулад көдлүлв. ⁶ Аш сүүлднь тавн часла эн талдан улсиг олҗ авв, тедн юм келго зогсҗахла, теднд келв: «Яһад тадн бүкл өдр көдллго энд зогсҗахмт?» ⁷ Тедн хəрү өгв: «Мадниг күн нəəмəдлсн уга.» Тиигхлə эн теднд келв: «Тадн бас мини уста үзм тəрсн һазрур одтн, тадн олзта болхт». ⁸ Асхн ирхлə, уста үзмин һазрин эзн эврəннь залачд келв: « Көдлмшчнриг дуудад, җалвинь цугтаднь өгтн, сүл ирснднь - түрүлəд өгтн, дарунь-үдин алднд ирснднь өгтн, өрүн ирснднь - сүүлднь өгтн.» ⁹ Тавн часин алднд көдлмшт ирснь - нег динарий авцхав. ¹⁰ Түрүлəд ирснь җалван икəр авх гиҗ сансн билə, зуг эдн бас нег динарий авцхала. ¹¹ Җалван авад, эдн герин эзнд һундлан келцхəв: ¹² «Көдлмшин сүүлд ирсн əмтн нег час көдллə, чи мадниг теднлə дүңцүлүч, мадн болхла, күнд халунд бүкл өдр көдлүвидн.» ¹³ Теднəс негнднь эн хəрү өгв : «Нəəҗ! Би чамаг һундасн угав. Өдрт нег динарий авх - чи ма хойрин бооцан биший? ¹⁴ Эврəннь җалван авад йов. Сүүлднь ирснд өгсн җалв, чамд өгсн җалвла əдл. ¹⁵ Эврəннь мөңгəн дурарн күүнд өгх нанд зөв угай? Мини цаһан седклд үлү үзҗəнч? ¹⁶ Сүл ирснь -түрүңкнь болх, түрүңкнь - сүүлңкнь болх, яһад гихлə дуудсн əмтн олн, зуг шүүҗ авснь - баһ». ¹⁷ Иисус Иерусалимүр күрх хаалһар йовҗ йовад, арвн хойр сурһульчнран хооран дуудад келв: ¹⁸ «Мадн өөдəн Иерусалимүр һарчанавидн. Тенд Күмни Көвүг Бурхна ах əрүн улст болн Бурхна дегтр бичдг əмтнд бəрүлҗ өгəд, зарһд орулад, Терүг цааҗла харһулх. ¹⁹ Бурхнд иткдго əмтн Терүг дорацулх, цокх, шилврəр шавдх, кирст хадх, һурвдгч өдрт Тер əмдрх.» ²⁰ Терүнə хөөн Зеведеин көвүдин эк көвүдтəһəн Иисусур өөрдв. Эн сөгдəд, юм сурхар седҗ. ²¹ Иисус терүнəс сурв: «Танд юн кергтə?» Эн Терүнд келв: « Бурхна Теңгрин орн-нутгт мини нег көвүм Танас барун хаҗуд суутха, хойрдгчнь зүн хаҗуд суутха» ²² Иисус хəрү өгв: « Ю сурҗахан медҗəхшт. Мини уусн ааһас ууҗ чадхийт? Мини эдлх зовлңгиг тадн тесҗ чадхийт?» Тедн Терүнд келцхəв: «Чадхувидн.» ²³ Тиигхлə Иисус теднд келв: «Мини ааһас уухт болн Мини йовсн хаалһар Намаг дахад йовхит. Кен Нанас зүн, болн барун хаҗуд суухинь Нанд меддг зөв уга, зуг эн Мини Эцкин зөв» ²⁴ Үлдсн арвн күн Терүг соңсад, эн ах дү хойрт уурнь күрв. ²⁵ Иисус тедниг дуудад келв: «Нойдуд, толһачнр, болн теднəс ик йостань олн əмтиг нойрхна, тадн меднəт. ²⁶ Тадна дунд тиим юмн болх зөв уга. Кемр тадн дунд негнтн ик йоста болхар бəəхлə, зарц болг. ²⁷ Кемр тадн дунд негнтн түрүнк болхар бəəхлə ,таднд мухла болг. ²⁸ Күмни Көвүн əмт зархар ирсн уга, бийнь зарц болхар, əмтнə килнц тəвүлхин болн аврхин төлə Эврəннь əмəн өгхəр ирсмн. ²⁹ Иерихонас эдн һархла, Иисусин ард олн əмтн йовла. ³⁰ Хаалһин өөр хойр сохр күн суула. Хаҗуһарнь Иисус давҗ одхла, эдн эклəд хəəкрв: «Деед Эзн! Давида Көвүн! Мадниг хəəрлтн!» ³¹ Əмтн күчəр ду һардгинь уурулхар седв, болв эдн улм чаңһар хəəкрцхəв: «Мадниг хəəрлтн! Деед Эзн! Давида Көвүн!» ³² Иисус зогсад, тедниг дуудад сурв: «Нанас таднд юн кергтə?» ³³ Эдн Терүнд хəрү өгв: «Деед Эзн! Мадна нүднд хара орултн!» ³⁴ Иисусин санань зовад, теднə нүднд һаран күргв. Теднə нүднь секгдв, тегəд хоюрн Иисусин ардас дахад йовцхав.