¹ Иисус келҗəсн үгəн төгсəһəд, Галилеяс һарад, Иордана талдан үзгт бəəсн Иудеин нутгт ирв. ² Терүнə ардас олн əмтн дахҗ йовла, тенд Иисус тедниг эдгəв. ³ Терүнүр фарисеймуд өөрдəд, җилвтүлхəр седəд келцхəв: « Ямаран болвчн учрар залу күн гергнəсн салҗ чадхий? » ⁴ Иисус эднд келв : « Тадн умшсн угавт? Түрүлəд экнəс авн Үүдəч тедниг залу күн болн күүкд күн болтха гиҗ үүдəснь?» ⁵ Дəкн Иисус келв: «Тегəд күн эк-эцкəн үлдəһəд , эврəннь гергтəһəн ниилх зөвтə. Эдн хойр нег бий цогц болх. ⁶ Эдн хойр цогц биш, нег цогц болх. Тегəд Бурхн эдниг ниилүлсн хөөн, күн бичə салһтха.» ⁷ Эдн Иисусас сурв : « Яһад Моисей залу күн гергнəсн салхларн, саллһна цаас авх зөв өгнə?» ⁸ Тер эднд келв : «Моисей таднд гергтəһəн салх зөв өгв, яһад гихлə тадна зүркн хату болсн төлəд. Экнəс тиим биш билə. ⁹ Болв Би таднд келҗəнəв : кемр гергн залудан өгсн үгəн бəрв чигн, болв залунь терүнлə салад талдан салҗ одсн герг авхла, тер эвдəч болҗана.» ¹⁰ Терүнə сурһульчнр Иисусд келцхəв : «Кемр тиим дашката юмн болхла, гер авлһн керго болх.» ¹¹ Тер иигҗ теднд келв: «Зəрм əмтн эн үгин чинринь медхш, зуг кесгтнь эн үгин чинр медгднə.» ¹² Ясата залус тедн тиим бəəдлтə төрцхəнə. Зəрм залу күүг əмтн ясгдсн кү кедг бəəҗ. Бурхна Теңгрин орн-нутг цергллһн -залу күүнə эврə шиидвр. Кен күн энүнə чинрнь медəд, орулҗ авхла, тер күүнд медгтхə. ¹³ Бичкдүдиг Терүнүр көтлəд ирв, Иисус бичкдүдт һаран күргҗ мөргв. Сурһульчнр бичкдүдиг Иисусур орулдго бəəсмн. ¹⁴ Болв Иисус келв : «Бичкдүдиг Нанур тəвтн, тедниг Нанур ирхд бичə харш болтн, Бурхна Теңгрин Хаана орн-нутг- теднə» ¹⁵ Иисус һаран теднд күргəд һарад йовҗ одв. ¹⁶ Нег күн Иисусур өөрдəд келв: «Цаһан седклтə Багш! Мөңкинд бəəхин төлə ямаран сəн керг кехмб?» ¹⁷ Иисус хəрү өгв: «Яһад чи Намаг цаһан саната гиҗ нерəднəч? Һанцхн Бурхн цаһан саната, наадкснь тиим биш. Кемр мөңк җирһл авхар бəəхлə, Бурхна закас күцə.» ¹⁸ Тер сурв : « Ямаран?» Иисус хəрү өгв : «Нег негндəн өгсн үг залу гергн хойр бичə эвдтхə; Күүнə əм бичə тасл; Хулха бичə ке; Күүнə тускар худлар бичə герчл; ¹⁹ Эк-эцкəн күндлҗ тевч; Өөрəн бəəсн күүнд бийтəһəн əдл дурта бол»-гиҗ Иисус келв. ²⁰ Тер күн Иисусд келв: «Тана келсиг би бичкнəсн авн күцəдүв. Дəкəд нанд юн дуту болҗана?» ²¹ Иисус хəрү өгв: «Кемр цуг закасиг күцəдг болад йоста сəн күн болхар бəəхлə, йовад бəəсн өлг-эдəн хулдад, мөңгинь угатьнрт өгчк. Тиигхлə Теңгрт зөөртə болхч, тегəд ирəд Намаг дах». ²² Тер күн тиим үг соңсчкад, һундад йовҗ одв, яһад гихлə эн йир байн күн бəəҗ. ²³ Иисус сурһульчнртан келв: «Лавта үн таднд келҗəнəв: байн күүнд Бурхна Тенгрин орн-нутгт орхд күнд». ²⁴ Дəкəд таднд келҗəнəв : « Байн күн БурхнаТенгрин орн-нутгт ортл темəн амрар зүүнə сүвəр орҗ чадх.» ²⁵ Энүг соңсчкад , Терүнə сурһульчнр йир икəр алң болад келцхəв: « Тиигхлə кен əмəн аврҗ чадх ?» ²⁶ Иисус терүнүр хəлəчкəд келв: « Əмтн энүг кеҗ чадшго, зуг Бурхн ю болвчн күцəҗ чадна.» ²⁷ Тиигхлə Пётр Терүнд келв: «Мадн бəəсəн үлдəһəд, Таниг дахад йовлавидн. маднд юн болх?» ²⁸ Иисус теднд хəрү өгв: «Үнəр таднд келҗəнəв, Күмни Көвүн эврəннь туурмҗин ширəд суусн цагт, тадн Намаг дахсн сурһульчнр арвн хойр хаана ширə деер сууһад, Израилин арвн хойр үйд зарһ кехт.» ²⁹ Кен герəн, ахнр-дүүнрəн, эк-эцкəн, гергəн, үрдүдəн, төрсн һазран Мини төлə үлдəхлə, тиим күн зун холван өнчəн авх, мөңк җирһл эдлх. ³⁰ Түрүңкнь болснь сүүлнкнь болх. Сүүлнкнь - түрүңкнь болх.