¹ Тер цагла сурһульчнр Иисусур өөрдəд сурҗ: « Теңгрин Бурхна орн-нутгт кен хамгин ик болҗахмб? ² Иисус бичкн көвү дуудҗ авад, теднə дунд зогсачкад келв: ³ « Үнəр таднд келҗəнəв: кемр тадн бийəн эс сольхла, бичкдүдлə əдл эс болхла, тадн Теңгрин Бурхна орн-нутгт орҗ чадшгот. ⁴ Бийəн номһрулсн, бичкдүдлə əдл болҗ чадсн күн, Теңгрин Бурхнла орн-нутгт хамгин ик болхмн. ⁵ Мини Нернə төлə тиим бичкниг бийдəн орулҗ авхла, тиим күн Намаг орулҗ авчана. ⁶ Нанд итксн тиим нег бичкниг җилвтүлəд, итклинь эвдсн күүнд əмд бəəхин ормд теермин чолу күзүнднь бооһад, теңгсин гүүнд чивснь тер күүнд деер болх бəəсмн. ⁷ Орчлңгд бəəсн əмтиг җилвс зована. Юңгад гихлə җилвс ирх зөвтə. Болв җилв авч ирсн күн ик зовлңла харһх. ⁸ Кемр чини һар эс гиҗ көл чамаг җилвтүлəд, иткличн эвдхлə, тəəрəд бийəсн цааран хайчк. Хойр һартаһан, хойр көлтəһəн мөңк һалд тусхин ормд, өрəсн һар көлтəһəн мөңк җирһлд орсн деер. ⁹ Кемр чини нүдн чамаг җилвтүлəд, иткличин эвдхлə, терүгəн бийəсн таслад авад хайчк. Хойр нүдтəһəн мөңк һалд тусхин ормд, өрəсн нүдтəһəн мөңк җирһлд орсн деер. ¹⁰ Медтн, саглтн, тер хамгин бичкдүдин негнд чигн бичə дурго болтн.Би таднд келҗəнəв: «Теднə Бурхна элчнр Мини Теңгрин Эцкин чирə оньдин үзнə.» ¹¹ Килнцдəн даргдад, үкчəх улсиг олхар болн аврхар Күмни Көвүн ирсмн. ¹² Тадн юн гиҗ тоолҗанат? Кемр нег күн зун хөөдтə болад, теднəс негнь төөрəд геедрхлə, тер йирн йисн хөөһəн уул заагт үлдəчкəд, геедрсн нег хөөһəн хəəһəд эс йовхий? ¹³ Үнəр Би таднд келҗəнəв: « Кемр тер күн геедрсн нег хөөһəн олҗ авхла, йирн йисн хөөндəн тиигҗ байрлл уга, олҗ авсн нег хөөндəн үлүһəр байрлх.» ¹⁴ Тегəд тана Теңгрин Эцктн Эврəннь хамгин бичкнин негнь геешгоһар болн үкүлшгоһар седҗəнə. ¹⁵ Кемр ахчн чини өмнəс килнц һарһхла, əмтнд медүллго чирəһəрн үзлцəд буруһинь кел. Кемр чини үг тер соңсхла, чи ахан олҗ авхч. ¹⁶ Кемр эс соңсхла, негн эс гиҗ хойр кү дахулҗ одад кел. Тер улс чини келснд герч болх ¹⁷ Кемр чини ах тедниг эс соңсхла чонҗд кел. Кемр чонҗиг эс соңсхла, тер Бурхнд иткдго болн алв цуглулдг күүнлə əдл болв гиҗ тоол. ¹⁸ Үнəр таднд келҗəнəв: һазр деер тадн боосн юмн теңгр деер боогдх. Болн һазр деер тадн тəəлсн юмн теңгр деер тəəлгдх. ¹⁹ Үнəр Би таднд келҗəнəв: кемр хойр күн һазр деер нег-негнлəһəн ниицəд Бурхнас ямаран чигн кергин тускар сурхла, Мини Теңгрин Эцк сурситн таднд өгх. ²⁰ Юңгад гихлə хойр эс гиҗ һурвн күн Мини Нернə төлə цуглрхла, Би теднə дунднь бəəнəв. ²¹ Тиигхлə Пётр Иисус тал өөрдəд сурв: « Деед Эзн! Кемр ахм нанд гем кеһəд бəəхлə, кедү дəкҗ буруһинь тəвхм? Дола дəкчий?» ²² Иисус терүнд келв: «Долан дəкҗ» - гиҗ келҗахшв. Доланас икəр, зуг долан дəкҗ долан холваһас үлүһəр. ²³ Теңгрин Бурхна орн-нутг иим бəəдлтə: нег хан эврəннь мухласасн тооца некхəр седв. ²⁴ Хан тооцаһан некҗəсн цагла терүнүр арвн миңһн арслң мөңг өртə мухлаг авч ирв. ²⁵ Эн мухлад мөңгн уга болхла, эзн терүг гергтəһинь, күүкдтəһинь, гер- малтаһинь хулдад, өрəн авхар шиидв. ²⁶ Тиигхлə мухла көлднь унад, мөргəд сурв: « Эзн! Невчкн зуур күлəтн. Би цугтаһинь өгхв.» ²⁷ Тегəд эзнь мухлаһан хəəрлəд, өринь тəвəд йовулчкв. ²⁸ Мухла энүнəс һарад, зун арслң өртə нəəҗлəрн харһад, өрəн некəд, бахлурнь базһад келв: «Өрим ас!» ²⁹ Тиигхлə нəəҗнь көлднь унад ээрəд сурв: «Күлəҗə, удл уга би чамд цугинь өгчкнəв.» ³⁰ Болв мухла нəəҗəн хəəрлл уга, өринь өгтлинь түүрмд суулһна. ³¹ Терүнə нəəҗнрнь юн болснь үзəд дотран зовад, эврəннь эзндəн цугинь келцхəв. ³² Эзн мухлаһан дуудад терүнд келв: «Хар саната мухла! Чи намаг ээрəд сурхла, би чамаг хəəрлəд өричн тəвчклəв. ³³ Би чамаг хəəрлүв. Чи юңгад бас тиигҗ нəəҗəн хəəрлсн угач?» ³⁴ Эзнь уурлад, терүг цуг өрəн өгтл зовадг улсин һарт өгчкв. ³⁵ Тиим кевəр Мини Теңгрин Эцкм нег-негнəннь болн ахиннь буруһинь эврəннь зүркнəс эс тəвхлə, тана буруһитн Теңгрин Эцк бас тəвшго.»