¹ Ecurok Yesu di roko, abongoro ehiji n’ajor di bore honyong, ² d’amaji neyanerek ohothing donyong othulo laye arakang. Atehuna no Yesu eruhon nara abaya owon dosong, ajyo d’othulo lodiha lo, “Okolo, oitho hindang, “Ahohini eyatha hahoi.”

³ Thiya, ajyori ohoityenak h’oyalu homok dihwandek hosong, “Othulo lo locama karik lomoryo aning nadwa.” ⁴ Yesu agilu ainyong igiglo isong, ajyo, “Anyo igigilo ithai asang hamonyong hajak ahani hune? ⁵ Ilik dijan, “Ahohini eyatha,” dia dijan, “Odothoi karik odahai’? ⁶ Ithaithak nang de ithai, ara ahani, hijan owon Olonyi l’Othulo h’akolon dihohina eyatha dihap.” Dine ne, ajyo d’othulo laye arobokang lo, “Odothoi thahide, odohu ejothit nahoi, ilo di hang!” ⁷ Adotho otholu laye arakang lo, alo dihang. ⁸ Atehuna n’ohothing ahani ne, abangi, efufurye Ojok. disarahina akolon najak ahani d’ohothing. ⁹ Yesu edihi amaji nya; ajara alo, ahithemi, atehu ohiduduhani l’enyahwa th’ohothing, ilongoi ara Mateo, owoni dimaji h’egyema nanyong. Ajyo donyong, “Othifunu nang.”Mateo adotho th’ahide, athiforo inyong.

¹⁰ Awonan nya no Yesu h’anyari di hang ho Mateo, afuni ohoiduduhak h’enyahwo karik ohothing homok hangaterek thoilulung, awoniari ho Yesu karik ohothifok honyong dinyari. ¹¹ Otehuni Ofarisi homok asuduha dinyari ne, efiye ohothifok ho Yesu, “Anyo onyo ohoityenani lothai h’ohothing hojahitha ahani?

¹² Ethaningu isong Yesu, etharang, “Aang ohothing hoyiji owak opotho l’ayiji n’ahwan; ti, owahi ohothing hodiha opotho l’ayiji n’ahwan.” ¹³ Ifwatha othifeyethek ainyong ojyo amanini negero,”Ehandio n’ayiji awak nang, ikara ehuma n’ecangi,’ Aang nang aindu dilongo ohothing homuno abangi, aindu nang d’ohothing hathuhi acohoro.”

¹⁴ Thiya ohothifok ho Yoanne afuni difiyo Yesu, ajyori, “Anyo, nara ohoi h’Ofarisi idwa ara ohoi inyo tiibai, ahibu ohothifok hohoi aang hoidwa karik aang onye tiibai kwong?

¹⁵ Yesu etharang isong ajyo, “Iwak ithai ohothing hofuni di mutha thaang homunoi ahibu isong h’ohomuthani? Ikara ahani. ti, owon de ofaning lofuni iyarik homuthani adi thosong. Ofuni de idwa, anye tiibai ofaning le. ¹⁶ Aang othulo lorifyo abongo angoroi th’akerbuse angejuk, anyo akerebuse angejuk irunga karik afonik amaji nathulo notho bongo ne. ¹⁷ Aang dang othulo lobuhok abalu ongejeuk ditha olofengo ongoroi. obulahta olofengo lya obalu obuhoro dihap. Kombwo, obalu ongejuk, thobuhohini ditha h’olofengo ongejuk. Disukai ara nayyu obalu ongejuk karik olofengo ongejuk.

¹⁸ Dihide ho Yesu acama ahani, aindu ohoigyemani l’Ojudei donyong, arigongo dihithemi honyong, ajyo, “Aye aitho hindang thenene; iwong ilo ithahi ahas hahoi dihide honyong, isu de.” ¹⁹ Yesu adotho athiforo inyong. Ara ohothifok afwoi diput honyong.

²⁰ Athulo naleng ethathaciana abuhyo ahotho oyingathik tomon larehai aindu tholohurong ho Yesu, athin ohuthuk l’abongo nanyong. ²¹ Inyong na ajyo dithaji honyong, “Ara juk athin nang abongo nanyong, ayyu nang de.”

²² Yesu amijyo tholohurong atehu inyong, ajyo, “Ithakolo, aitho hindang, esarak iye eruhon tholiboro.”Th’omiru hule, ayyu athulo.” ²³ Thiya, Yesu ajinga dihang h’ohoigyemani. Atehuna nayong ohobalak h’oyendok h’athariha, ohothing adotho fodok. ²⁴ inyong ajyo, “Ifwatha dingwai ithai bukulung!” Kaang aitho ne hoye – nadiferi ija!” Thiya isong fodok ahendaitho donyong. ²⁵ Ti, athuhon n’ohothing afwan dingwai, Yesu ajinga ditha h’aitho, endep ahinang nanyong, ara aitho ne adotho dihide. ²⁶ Assayo h’arami hune athurohunu d’oker l’aminji nya fodok.

²⁷ Yesu edehi amaji nya; Aden nanyong ahithemi, ongodok arehai athiforo inyong. “Omiehi ohoi, lolonyi ho Davide,”isong hulo ekor..

²⁸ Ajingara no Yesu dithwa, ongodok arehai hulo afwoi donyong, Yesu efiyo isong, “Iruk ithai hijan ocohi nang hethalihyo ithai?” Isong iruhi, “Aa, Lahong.”

²⁹ Thiya, Yesu athin ahonde hasong ajyo, “Thofuho iring neruhorik ithai!” ³⁰ ahonde hasong anyahak ara habilbo dimaji, Yesu acama dosong ara nako, “Hoinyahini arami hune d’othulo loboling kwong!” ³¹ Ti, afwoi, afurohini assayo ho Yesu d’amasok fodok h’amiji nya.

³² Afwan nya n’ohothing, eyanu ohothing homok do Yesu othulo laang ocama, anyo, owon inyong h’ohoile lomonyong. ³³ Ti, angararik nya n’ohoile lomonyong adi, aculuyo othulo le acama. Afalanga ohothing, ajyori, “Kabong ohoi ithehunerek aning najahitha ahani d’Israele!”

³⁴ Ti, Ofarisei ajyori, “Ohobu l’ohoilehio homonyong isarak Yesu akolon nangaterek ohoilehio homonyong.”

³⁵ Yesu nya alo idodororo abothok karik amisok. Etyenio di Sinagogues, enyanyahak Assayo Hayyu Angjuho h’Ohobye, ethalihyo karik ethayijyo ohothing th’adihathik h’opeceni olwarai. ³⁶ Atehuna nanyong elulung n’ohthing, efut othaji lonyong th’amiehunu n’ohothing, anyo, ehayai karik aang alwahio thosong, ajahithi akero haang ohoyohoni. ³⁷ Ahani ne, ajyo d’ohoifahak, “Olat amana, ti, omuthari ohoingongothok. ³⁸ Omojothik do lomonye h’amana, dosulak ohoigyemak hohothai dingongocyo di amana honyong.