¹ Yesu elongu ohothifok honyong tomon larehai, esarak isong akolon nangaterek ohoilehio homonyori adi karik nethalihyerek opeceni h’adiha. ² Thene ofuretho h’ohoifahak ho Yesu hulo hulohoi: oithaboithe Simone (loilongo inyong dang, ara Petro) karik Andrea olai lonyong, Yakobo lolonyi ho Zebedeo karik Yoanne olai lonyong. ³ Filippo karik Bartolomeo; Tomaso karik Mateo, ohoiduduhani l’adumathik, Yakobo, lolonyi ho Alfeyo; karik Taddeo; ⁴ Simone Ozelot, karik Juda Iskariote, lonya ithanyangak Yesu lo.

⁵ Ohoifahak tomon larehai hulya, honya osulak Yesu, anyahi isong ajyo, “ hoifwatha d’ahap n’ohothing hoikela th’Ojudei karik hoijingara d’abore nabo no Samaria. ⁶ Kombwo, ifwatha d’okero hathuk alitho, di hang ho Israele; ⁷ Kombwo, iring ifwo ithai, ityeniethek ara ithai ijyo, “Aindek Ohobye lothohide!” ⁸ Ithalihyethek ohodihak, inyahunethek ohoyak disu, ithalihyethek ohodihak h’attalulu h’amuhunyong, karik ongaterethek ohoilehio homonyong. Efothu ithai kwong aduma, isarahina dang kwong aduma. ⁹ Hoidahathik h’ayel, ebindang abong karik anaporong dirohitha hothai. ¹⁰ Hoidaha h’olofengo l’ohomojok ara ilo iye d’amiji nabo; heyaru abongo naboling nothosude, ahamuha dia othelek. Ohoigyemak thoisarahini aning nawak isong. ¹¹ Ara eindu iye di bore dia dimiji, ottahithe othulo loyyo ara iye isuka honyong lwai iye anyahara. ¹² Ara ejinga iye dihang, imandaye inyong. ¹³ Ara oyyu ahang ne oindu de elik donyong. Ti, ara aang hoyyu, onyaha de elik dohoi. ¹⁴ Iring d’ohothing naang ifothu ithai dia aang ithairye arami hathai, ara ithai hefwo adi th’ahang dia abore nya, ibabahuna atuur adi tho hamuha hothai. ¹⁵ Anyahi nang dothai, d’ofaning lakanyo n’arami, oindu de Ojok imiehina ohothoing ho Sodomo karik ho Gomorrah thoh’ohothing h’abore dia amiji nya.

¹⁶ “Ithaningyethek, nang lasulak ithai iring akero ditha elulung n’owoho. Ohongotho iring amunuok, ara ithai ilamuha iring aworohocio. ¹⁷ Omijethek tuhudik, owoni mwai ohothing hoindafaitho ithai, eyarai ithai dithawejyo, afodohye ithai di Sinagogues. ¹⁸ Ofuni de ithai indafaitho karik ethawejye dihithemi ohoidefak h’ahap karik h’ohobusi h’ohothing thonang, dinyahina assayo hadiri dosong karik d’ohothing hoikela th’Ojudei. ¹⁹ Ara heyanu iye dithaewjyo, hoithathacianio ahwan ditehan ainyong de ifwo ithai icama. ²⁰ aca arami hefwo ithai icama hune, ofuni de isarahina ithai orii le. ²¹ Isarak de olai olai thottohori; ara omonye esarak olonyi thottohori. Odothoi de okalifinok d’omonye karik ahathingie, esarahini isong thottohori. ²² Omani ithai de ohothing bukulung th’ofure tholohindang. Ti, logoterek ithai lwai dicuhit, ithalwahunu de. ²³ Ara ithalodohye ithai d’abore na, ingerotho d’abore naboling; aca anyahi nang ithai diridiri, aang ithai de ifwo athan’abottok ho Israele, kabong Olonyi l’Othulo athuk ainduna.

²⁴ “Aang oitho leyeyena lokalu ohoityenani lonyong. Aang ongaca lobolo thoh’oindefani longyong. ²⁵ Inyong na, ira ohoiyeyenani efongon awonan ara ohoityenani lonyong, ongaca, ara ohoindefani lonyong. Ara lahong l’ahang lelongoi ara Beelzebul, ilongoi de dang ohothing h’ahang ne th’ofuretho thohomonyong okalak! ²⁶ “Inyong na, hoibangatha othulo. Aning nemuho thenene, ofuni de ibuthohina; karik aning nedima, ofuni de ithalyehina. Aning naang otehi, ofuni de isarahina thotehi. ²⁷ Arami hanyahi nang ithai ditha h’omudwe hune, owak inyoryo ithai anyahina th’afaning, karik aning nethairu ithai hamaring, owak ilolongok ithai thohide h’efithe n’athwa. ²⁸ Hoibang ohothing hoithayeyo ahwan, ti, aangi ocohini ethayeyo ohoile; kombwo obangatha Ojok, locohi etharohojyo ahwan karik ohoile ditha h’ahimang. ²⁹ Aca enyahwo tiibai, ocohini ithai enyangunerek ohokumok h’ohuju arehai, ti, aang ohokumokthi juk aboithe lodou dihap kwong eruhohina no Lemonye. ³⁰ Iring dohoi, juk ohofir hothohu hohoi hulya, athuhi ehera bukulung. ³¹ Inyong na, hoibangatha; okalu ayiji nahoi aboithe n’ohokumok olwarai. ³² Othulo lonyahi dihithemi h’ohothing hijan inyong hindang, anyahi nang de dang ahani dihithemi ha Lalamonye dihide. ³³ Ti, ara orisa nang lobo dihithemi h’ohothing, arisa nang de inyong dihithemi ha Lalamonye lothodihide.

³⁴ Hoijaratha aindu nang diyanu elik dihap. Ikara. Aaindu nang diyanu odemi loromyerek. ³⁵ Aindu nang dithacuhonini olonyirok h’omonye. ahanerok h’ahathingie, afuretho h’olonyirok h’ahamurak,

³⁶ omerok hohoi homonyori bebe, isong de ohothing h’ahang nathai. ³⁷ “Ohothing homuno omonye dia ahathingi okalak nang, aang ocohi dosong diwonan ara ohothifok hundang; ohothing homuno olonyi dia angering okalak nang, aang ocohi dosong diwonan ara ohothifok hundang. ³⁸ Ohothing haang odohoro akruce nasong athiforoi nang, aang osiruni awonnan ara ohothifok hundang. ³⁹ Ohothing hothemyo arimahina esu nasong, ithalithohini de inyong; ti, ohothing hoithalithok esu nasong thonang, orimahini de esu nasong.

⁴⁰ “Othulo loifothu ithai tuhudik, ifothu nang tuhudik; loifothu nang tuhudik, ifothu le lonya osulu nang lo tuhudik. ⁴¹ Othulo loifothu ohocoroni th’ofure, lothol’ohocoroni, ifothu de esorio n’ohocoroni; loifothu othulo lobis, th’ofure tholo’othulo lobis, ifothu de dang esorio n’othulo lobis. ⁴² Loisarak do lobo thohottik hulo ahari hamathai helik, th’ofure tholo’ohothifoni, diri ajyo nang dothai, aang de kwong ithalithok esorio nanyong.”