¹ Aindu nya iwonan, athuhon no Yesu anyanyahina ohothifok honyong tomon larehai hulo esarithi, edyaharu amaji nya, alo dityenio dibothok hosong. ² Ethaninguna no Yoanne Batista, dimaji h’efitha, asang hehandyo Kristo, asulak ohothifok honyong donyong. ³ “Inyahina ohoi,” ajyo isong hulo donyong, “Inyong iye lya lojyori loindu de lo, dia ithifeyo ohoi loboling?”

⁴ Yesu etharangyo, ajyo dosong, “Ifwatha dinyahina Yoanne ainyong ethairu ithai karik ainyong etehu ithai. ⁵ atehuni ongodok, adahai opalak gwo, hodiha adihathik hengari, alibori, ethaningu othuhok, enyahunai ohoyak d’esu karik enyanyahahini Assayo Angejuho d’ohoicyanak. ⁶ Othulo laang iboso thonang, thomunoi”

⁷ Omiru hafwarik ohothifok ho Yoanne adi, acama Yesu d’elulungi h’ohothing thonyong: “Afwan nyana nathai ditere, ainyong inya iwak ithai atehuna? Amiyang ewothol newahatho ahomwa? ⁸ Ti, ainyong nya ifwo ithai ingengelyo? Othulo lotodo abongoitho hajon? Ohothing hoiyofo ahani, amanyai d’ahangithek h’ohobusi. ⁹ Inyahina nang ainyong ifwo ithai itihyo diya? Ohocoroni? Aa do, ti, etehu ithai okalak ohocoroni. ¹⁰ Aca inyong lya lonya egerohini amanini, ‘Ottiha, nang lasulak ohifak hindang dihithemi hohoi, lolo ihuhumyo oyihoi lohoi dihithemi hohoi.’ ¹¹ Anyahi nang dothai diri hijan th’ohothing hoisu angorwo awang lobolo hto Yoanne Batista. Ti, lotti ditha Ohobye lothohide, obolo tho Yoanne. ¹² Hara th’omiru hoityenerek Yoanne Batista ocame lonyong lwai hongorna, ethathacianie Ohobye lothohide th’eribo, karik dang athemyo ohoiribok endefuna inyong na. ¹³ Hara th’omiru ho Yoanne, ithabuho ohocorok karik oyano acama arami h’Ohobye; ¹⁴ karik ara iwak ithai eruhon arami hasong, hajyo Yoanne inyong Elija, lonya athuhi acorohina ainduna nanyong. ¹⁵ Ithaningie hathi, ara iwon ithai h’eyoha! ¹⁶ “Thene, d’ainyong de ngona etharijyo nang ohothing h’ofaning lo? Ojahithi okalifinok howoni dimaji h’enyanga karik ethanyangio: ilolongo elulung nabo, elulung nabo, omurut dihide, ¹⁷ hijara, ‘Ehutha ohoi afakile dothai, ithai aang hoisur; ohoi ikor, ithai aang hoithangeryo ehiyo.’

¹⁸ Aca oindu nya Yoanne, ikara dinyo angiryang karik dimatha obalu. Ara ohothing bukulung ajyori, “Owon h’ohoilehio homnyori ditha honyong.” ¹⁹ Ajara nya Olonyi l’Othulo aindu, anyo, amatha: ara isong hulo ajyori, “Idorotho othulo lo; onyo karik amatha bebe, awon ara omotte l’ohoiduduhak h’enyahwo karik omotte l’ohoholak. Ara olofiyoro h’Ojok ethaithahini, ti, ara hobis, th’asang thahafuk.”

²⁰ Ahani ne, ohothing honya th’abottok hehandyerek Yesu asang hafalangai huna, kabong hoiloyithoi adi th’eyatha hasong, aburunai; thiya Yesu eringyo isong, ²¹ Etharinyak nya Yesu dosong, “Aang de bai omonyong dohoi, Koransin karik Betsaida, doisukaitha hothai homonyong hulya.” Ara nya ehandye asang hamonyong ahani di Tyre karik di Sidone, cuna ohothing hothiya athuk aburunu: iyofoi alyenyi karik afurai ahinwarang dihosi. ²² Oindu de ilahan do Tyre karik Sidone thothai, d’ofaning lofunerek ikanyerek arami hothohide. ²³ Iring tholohoi, Kapernaum, ijyo iye odohohini iye de dihide diri? Ara nya ehandye asang hune hahittwak di Sidone, iring nehandyerek dohoi, ira arami hua irahan lwai hongorna? ²⁴ Ti, ajyo nang dothai, ilak de iwonan dihap ho Sodomo thonoi, d’ofaning lokanyerek arami.

²⁵ D’orii le ajyo Yesu, “Amojyo nang iye, Monye, Ohobu l’ahide karik l’ahap, anyo idimaitho iye asang hune th’ohothing hoilofioro karik hotehi abisan, ara iye inyahi d’ohothing hokabong iyeyena, iring okalifinok. ²⁶ Aa do, Monye, aca omu nya dihithemi hohoi. ²⁷ Athuk Lalamonye esarahina nang asang bukulung. Aang lotek Olonyi arahari Omonye; aang lotek Omonye arahari Olonyi karik arahari ohothing honyimu inyong dithalyehina inyong dosong. ²⁸ “Ithai bukulung ohothing hoithathaciana adohoitho asang hawuk, ifuna donang. Esarak nang de ithai ayiri. ²⁹ Iduhuna adi aning nedingo ithai, ara ithai iyeyena thonang, arayo, ayyu nang karik ilik nang othaji; irimak ithai de ayiri n’ohoilehio hothai. ³⁰ Aca ilik ethathaciana nesarak nang de dothai karik iyelehe de awuhan nesarak nang de dothai.”