¹ D’orii nya le, alo Yesu d’Odomonika, abongoro thal’ amandak h’ohima. Oleng nya ahure ohothifok honyong, akweye ewa h’ohima, anye. ² Ti, atehuna n’Ofarisei arami hune, ajyori do Yesu, “Idoro, ihandyo ohothifok hohoi asang haang obis dihandyo d’ofaning l’Ojok.”

³ Yesu ajyo dosong, “Bai ithai hehena ainyong ihandyo Davide karik ohothing hoigyema honyong ahibu isong ahure oleng?” ⁴ Alo dithwa h’Ojok onyo anyari nehumarik naang ocohi donyong karik ohothithing hoigyema honyong anyo dithwa h’Ojok. ⁵ Kabong ithai ihena oyihothik h’abisan, hojyo d’ofaning l’Ojok etharohojyo ohoigyemak d’ofaning l’Ojok, ti, kaang hoiyauni. ⁶ ti, ajyo nang dothai owon lobo dine loikau athwa n’Ojok. ⁷ Ongida izai igigilo asing ho Ojok diza amaninihio: 'Awang egema za amiehunu do ohozing, ikara esorio no Ojok ti.' Ara itek izai ainyong ojo inyong, awang izai iruk ingocho ohozifok hundang ara namonyo, ha kaang ihandio aning namonyo. ⁸ Nang Olonyi lo Ozulo, awon nang ha akolon dinyahina ohozing aning nehandio isong do ofaning le ezaleji."

⁹ Yesu edyaharu amaji nya, alo di Sinagogue. ¹⁰ Otihatha, owon inya na othlo laye ahinang nayong. Ofarisei efiyo Yesu, ajyori, “Obis re ethalihyo othulo lodiha d’Ofaning l’Ojok?” Owahi arimahina oyihoi lojararik isong eyau Yesu.

¹¹ Yesu ajyo dosong, “Ngai thothai iduhunu, ara apwaharu oker lonyong aboithe ditha agulume d’ofaning l’Ojok, aang hethahoru oker lonyong lya? ¹² Ara thanathai, awang ayiji n’othulo okalu ayiji n’oker!?” Oyyu do ti, ehandyo aning nayyu d’ofaning l’Ojok. ¹³ Thiya Yesu ajyo d’othulo laye ahinang lya, “Odongok ahinang nahoi. Othulo lya adongok ahinang nanyong; ahinang anyahak dimamji honyong, ajahihterek nanya hoyyu ingyong na. ¹⁴ Ofarisei afwo dindak dittahitha oyihoi lottidunerek attohorik inyong.

¹⁵ Atehan no Yesu ainyong owahi Ofarisei ehandyo donyong, edyaharu amaji nanya, alo adi. Athiforo ohothing holwari inyong lo; inyong ethalihyo isong bukulung. ¹⁶ Inyong lo anyahi homok thosong thaang honyahi amaji mawonderek inyong. ¹⁷ Ihandyo ahanya dofuni arami hanya onyahi Ojok thol’ohocoroni Isaia, iwonan ara hadiri: ²² Thiya ohothing homok eyanu do Yesu othulo longodo karik athauho, anyo, owon ditha honyong ohoile lomonyong. Yesu ethalihyo inyong: inyong lo acama karik atehu. ²³ Afalanga elulungir h’ohothing bukulung d’asang hehandyo Yesu hune, ajyori, “Ocohi donyong diwonan ara Olonyi lo Davide?”

²⁴ Ethaninguna n’Ofarisei arami hune, isong etharangyo, “Ongatterek inyong lo ohoilehio homonyori adi, anyo, Beelzebul, ohobu losong isarak inyong akolon.”

²⁵ Atek Yesu ainyong igigilo isong, ajyo dosong, “Amiji nebwayo ahwan nanyong ditha elulungir heriborik nabo, aang omanyai orii hohodo. Karik abore nebwabwa th’oyihethik dia th’ahangithek, eriborik nabo, opwaharai de dihap. ²⁶ Inyong na, ara ongaterek Sitan Sitan, orwang iring ijan ohobye lo Sitan ipwaharu; orwang iring ajaran athuhi inyong ebwabwayo ara elulungir hafwo de ipwaharu kwak adi! ²⁷ Ijyo ithai angaterek nang ohoilehio homonyori anyo esarak nang Beelzebul akolon nanyong dihandyo ahani. Oyyu, ngai isarak ohothifok hothai akolon dingaterek isong adi? Aning nehandyo ohothifok hothai, onyahi hijan ipal ithai! ²⁸ A a, ikara Beelzebul, ti, Ohoile l’Ojok isarak nang akolon dingaterek ohoilehio homonyori adi, nethaithak hijan athuk Ohobye l’Ojok ainduna dothai. ²⁹ “Awang othulo locohi awuryo athwa n’othulo loko, eyaru attitto hanyong adi, ara kabong dodo hothoryo othulo loko lya, arujyo hathi athwa nanyong. ³⁰ “Othulo loida nang, ongica honang diri; laang olwahyo nang disuduhyo, lodi sasahacyo nang. ³¹ Karik nang thonyahi ithai hijan, ocohi dimiehina ohothing d’eyau dia aning namonyong najyo isong, ti, lehandyo aning namonyong d’Ohoile Lodwa, aang de omiehini. ³² Locama aning namonyong d’Olonyi l’Othulo, ocohi dimiehina; ti, locama aning namonyong d’Ohoile Lodwa, aang de omiehini - thenene dia mak. ³³ “Diwonan h’ahayocong nayyu, owak iwon iye h’ohiyani loyyu ahwan nanyong; ara iwon iye h’ohiyani lomonyong, iwon iye de dang h’ahayocong namonyong. Otehi ohiyani th’ahayocong than’edoyo inyong. ³⁴ Ithai amukok n’amunuok – angai icama ithai asang hayyu, ahibu ithai imonyong? Aca ocama ahuthuk asang hefut dithaji. ³⁵ Iyanu othulo loyyu asang hayyu thathah’akoro n’asang hayyu; ara othulo lomonyong, eyanu asang hamonyong thathah’akoro n’asang hamonyori. ³⁶ Ocohi dothai ditehan tuhudik hijan d’Ofaning l’Akanyo, ofuni de iwahan th’ohothing abok abok thonyahi arami hamonyori hacama isong. ³⁷ Ocamitha hothai ofuni ithai de ikanyerek – difuna inyahinerek dia ibis iye dia epal iye.

³⁸ Thiya, ohoityenak homok h’oyalu karik Ofarisei homok acama dihide, “Ohoityenani, “isong ajyori, “iwak ohoi iye atehuna ihandyo asang hafalangai.”

³⁹ “Angai omonyori karik angai aang ohothing howoni ara h’Ojok d’ofaning lo!” Ajyo Yesu th’afalanga, “Ifiyo ithai nang aning nafalangai? A a! Aning aboithe nafalangai nesarahini dothai, inyong aning nafalanga n’ohocoroni Jonah. ⁴⁰ Iring nanya isukarik Jonah ditha h’ohome operok aunihoi karik oharyethik aunihoi, oindu de dang Olonyi l’Othulo isuka dithah’audori n’ahap, operok aunihoi karik oharyethik aunihoi. ⁴¹ D’Ofaning l’Akanyo, ofuni de ohothing ho Niniveh iwetha ajyori epal ithai, anyo, eloitho isong adi th’eyatha hasong, ethaningye ettittoyo no Jonah; karik nang anyahi ithai hijan dini, owon aning nabo nakalu Jonah. ⁴² D’Ofaning l’Akanyo, oindu de Ahabu no Sheba iwetha thahide ajyo epal ithai, anyo, alo inyong na thomiji honyong dithaningyo etyenio n’olofioro n’Ohobu Solomone; karik nang anyahi ithai hijan dini, owon aning nabo nakalu Hobu Solomone! ⁴³ Ara ohoile lomonyong lalo adi th’othulo, olo d’amiji nayoho dithifeyo amaji nayiryarik. Ara aang orimak nabo, ⁴⁴ ojyo d’ahwan nanyong, ‘Anyaha nang de dihang honang.’ Thiya, anyaha, arimak athwa nanyong aang othulo thiya karik ara nafiya karik ehuhuma tuhudik.. ⁴⁵ Thiya, alo dindak diyanu ohoilehio cofa hokalak inyong thamonyori, afuni iska diya. Thiya, ajara asang fodok athuho, etharohoja othulo lya fodok okalak nanya thoculwe. Asang de hune hafuni ifuhon d’ohothing omonyorok h’ofaning lahanana.”

⁴⁶ Hocama Yesu h’ohothing ahani, edwong ahathingi h’olarok. Awethi dingwai, owahi acama honyong. ⁴⁷ Loboling th’ohothing ajyo donyong, “Idoro, nehathingi karik holoilai howetha dindak, owahi acama hohoi.”

⁴⁸ Yesu etharangyo, “Ngai nanahathingi? Hongai halalalai? ⁴⁹ Thiya anithok ahinang nayong d’ohothifok honyong, ajyo, “Idorotho! Nanahathingi karik olarok hundang hulo! ⁵⁰ Loihandyo aning nawak Lalamonye lothohide, inyong lalalai, nanahani karik nanahathingi.”