¹ Ofaning le, edehi Yesu ahang, alo dipogo h’ajor; awoni diya dityenio. ² Esarak nya elulung nahittok n’ohothing nasuduha diker honyong, inyong aden ditha h’aroko, awoni diya, ahibu ohothing owetha difohor h’ajor. ³ Ocama nya inyong lo th’etharijitha, dinyahinerek asang olwarai. “Owon nya othulo lolo diyeyo ohinyomo h’ohima. ⁴ Ayeyo nanyong ohinyomo dimana, adowuni homok diyihoi, ara ahwen afuni, alutharai isong adi. ⁵ Homok adowuni dihide h’ahap nalwari omorik diya ahibu aboro omuthari. Ara ohinyomo kwak amuda, anyo, aangi aboro hafwo adihap bebe. ⁶ Ti, ainduna nya n’oholong, amudai ohima hottik hobulu; karik kabong ohade hojinga dihap tuhudik, abocori ayohoji kwak. ⁷ Homok ohinyomo adwuni ditha h’ehwa habolori, aromye amat habulu hune. ⁸ Ti, homok ohinyomo adowuni d’aboro hayyu, ara ohima angidari ara hoyyu; arimak homok ebetheha h’ohima, hulo esihe athomone inde, homok esihe athomone aunihoi. ⁹ Yesu engohi ocame lonyong, “Ithaningyethek, do ti, ara iwon ithai h’eyoha.”

¹⁰ Thiya ohothifok afuni do Yesu efiye inyong, “Anyo icama iye d’ohothing th’etharijitha?”

¹¹ Yesu etharangyo, “Atehan n’arami hedima h’Ohobye lothohide, athuhi esarahina dothai, ti ikara dosong. ¹² Aca, othulo lowon haning nabo, donyong de isarahini nabo, dowon haning nakalak nawon donyong; ti, othulo laang aning nabo thonyong, juk tiibai nawon honyong ne, iduhuni de adi thonyong. ¹³ Arami hesarak nang acama dosong th’etharijitha, anyo, omijyo isong hulo, ti, aang otehuni, karik ethayirgye, ti, aang ithaninguni karik aang otehi tuhudik.

¹⁴ Inyong na, acorio no Isaya, ocohi dosong thurubuk: ‘Ithayirye, ethayirye de ohothing hulya, ti, aang otehi tuhudik; omijyo isong, omijye, ti, aang otehuni, ¹⁶ Iring dothai, angai de berien ileng ithai! Otehuni ahonde hathai, eyoha hathai ithaninguni. ¹⁷ Anyahi nang ithai tuhudik, ohocorok karik ohothing h’Ojok holwari, awahi atehuna ainyong itehu ithai, ti, aang ocohi isong atehuna; karik awahi ethaninguna, ti, aang ocohi isong ethaninguna. ¹⁸ Ithanignyethek, hoi, ainyong ojyo etharije n’ohoyeni l‘ohinyomo. ¹⁹ Ohothing hoithairu ocame l’Ohobye, ti, aang otehi tuhudik, isong hojahitha ohinyomo hodowuni dihiji h’oyihoi. Ara Omonyoroni Lo aindu ilutharu ohinyomo adi. ²⁰ Ohinyomo hodohi d’amaji nakek ara omorik, awetha dimaji h’ohothing hoifothu ocame th’amuno, ara hethaningyo. ²¹ Ti, aang odiyoroi ara nawudo dihap ditha hosong; awang homanyai omiru holwa. Inyong na, ara ethagyemio dia ethathaciana naindu th’arami thoh’ocame tholo ithaningu isong, abocori attaluho. ²² Ohinyomo hadou ditha ehwa owetha d’ohothing hoithaningyo ocame, ti, ehaya n’amanya nothohop karik amuno n’enyahwo akoryo ocame; iring ohiyani, aang ithadoyo ahayo. ²³ Ara ohinyomo hodohi d’ahap nayyu awetha d’ohothing hoithaningu karik atehi tuhudik ocame: idoye ahayo, homok hosong olwarai iring esihe athomone inde karik homok esihe othomone aunihoi.”

²⁴ Yesu anyahi isong aryamara naboling: “Ojahitha Ohobye lothohide ahana. Ayehi othulo ohinyomo hoyyu di mana honyong. ²⁵ D’oharie nya lobo, aindu omerohothononi ahibu ohothing athuk ajothoro, ayehi ohanger h’athanyan ditha ohima, alo adi. ²⁶ Abolori n’ohima, ewa hasong aleyori, athanyan dang ethalyehi ahwandek. ²⁷ Ohoigyemak h’ohoromoni, ajyori donyong, “Lahong, ohinyomo nya hoyyu iyehi iye dimana hohoi; thongai oindu amiyang n’athanyan ne?’

²⁸ ‘Omerohothononi nya lobo ihandyo arami hune,’ inyong etharangyo. ‘Iwak iye ohoi thoifwai orucye amiyang nya adi?’ isong efiyo inyong.

²⁹ “A a,” inyong etharang, ‘anyo, dirucyo hothai, tek ithai iryafu aruthuna h’ohima. ³⁰ Ohima karik athanyan hune thoboloro tok dingongocio. Aindu nang de inyahina ohoingongothok thorucye amiyang dodo adi, athoryo ara ahosi; edwehini adi. Thiya ithai hathi ingongocyo ohima, ara ithai isarak di koro honang.’”

³¹ Yesu anyahi aryamara nabo dosong: “Ojahitha Ohobye lothohide ahana. Eduhu othulo ohangercong lotti bebe, edulak dimana honyong. ³² Omutha ohongercong lya diri bebe, ti, ara labolo, okalak de oyani bukulung th’abolori. Oindu de iwonan ara ohiyani lofunerek ahwen iduhorik athwahio hasong dithandak honyong. ³³ Yesu anyahi isong ikoti aryamara naboling: “Ojahitha Ohobye lothohide ahana. Owon nya athulo neduhu omundo, eharuhi h’ahifa ethemithi athomone arangwan tok eyafutha ara narijoro see.

³⁴ Ocama nya Yesu th’aryamarihio, dinyahinerek asang halwari d’elulungir h’ohothing; aang nya ira icama dosong kwong aryamarihio. ³⁵ Ihandyo ahanya, dofuni arami h’ohocoroni iwonan ara hadiri: “Acama nang de aryamarihio, ara nang lacama dosong. Anyahi nang de isong asang haang otehi, gee thoyeyo ahap.”

³⁶ Edehina no Yesu elulung n’ohothing, ajinga dithwa, afuni ohothifok honyong ajyori donyong, “Inyahi ohoi ainyong aryamari n’athanyan amiyang dith’amana.”

³⁷ Yesu, etharangyo, “Othulo loyehi ohinyomothi loyyu, inyong Olonyi l’Othulo; ³⁸ Amana inyong ahap; ohinyomothi loyyu, inyong othulo lowon ara l’Ohobye; athanyan isong ohothing howon ara h’Omonyoroni Lo; ³⁹ Omerohothononi loyehi athanyan, inyong Sitan; engongocio inyong ecuhit n’oper; ohoingongothok, isong anjelohio; ⁴⁰ Iring aworye karik aswahahini athanyan, ahani de dang ofuk dicuhit h’oper: ⁴¹ osulak de Olonyi l’Othulo anjelohio disuduhyo adi th’Ohobye osang hoisarak ohothing eyauna karik isong fodok hoisarak ohothing ehandyo asang hamonyori, ⁴² karik amirok isong dith’ahimang, amaji nawon de diya ekoron karik erocio n’ohala. ⁴³ Thiya, owuloi de ohothing h’Ojok iring oholong dith’Ohobye l’Omonye losong. Lowon h’eyoha, thoithairye!

⁴⁴ Ojahitha Ohobye lothohide ahana. Afuk d’othulo loboling dirimahina abara dith’amana karik amuhak ikoti; thiya ne, awahu ethanyangahina asang hanyong fodok thamuno, ara inyong anyaha dinyanguna amana nya. ⁴⁵ Karik dang, ojahitha Ohobye lothohide ahana. Owon othulo lothifeyo onyahuthong lolibo, ako, ⁴⁶ arimahina nanyong aboithe lokalak th’alibori karik th’akolon, alo, alo ithanyangahina asang hanyong fodok, enyangu onyahuthong lya.

⁴⁷ “Karik dang ojahitha Ohobye lothohide ahana. Omirok ohoyapohak abwoi dith’ajor, endefuni opeceni fodok h’ohom. ⁴⁸ Efuthan nabwoi, efihuni difohor; ara isong awoniari dibwayo ohom: ohom hoyyu hulo, esarahini dimuthuhi, ara homonyori acohoroi adi. ⁴⁹ Oindu de ijahitha ahani dicuhit h’oper; ofuni de anjelohio ifwan dindak disuduhyo ohothing homonyori thoh’oyyu, ⁵⁰ karik afuni de imirohina isong dith’ahimang, nafunerek isong ikor, erocye ohala.

⁵¹ “Itek ithai tuhudik asang hune?” Yesu efiyo isong. “Aa,” isong etharangyo.

⁵² Ahani ne, inyong etharangyo, “Onyahi asang huna hathi ahana: ohoityenani l’oyalu, loindu iinduna ara ohothifoni ditha h’Ohobye lothohide, oindu ijahitha lomonye h’ahang loiduhu asang angejuho karik angoro adi tho koro honyong. ⁵³ Athuho no Yesu enyanyahahina isong aryamarihio, edyaharu amaji nya,

⁵⁴ alo d’abore n’ahang nanyong. Etyenio di Sinagogue, ara ohothing hethairu inyong afalanga. “Thongai orimak inyong elofioro najak ahani?” isong efiyo. “Ara asang hafalangai hanyong? ⁵⁵ ikara inyong olonyi l’ohosathani lahyek? Ikara Maria ahathingi nayong? Karik ikara Yakobo, Yosefo, Simone karik Juda olarok honyong? ⁵⁶ Aang ara dini isuka ahanerok hanyong? Dingai orimak asang hune fodok?” ⁵⁷ Ahani ne, edari isong inyong. Yesu ajyo dosong, “Obangi ohocoroni d’amasok bukulung, arahari dibore h’ahang nanyong karik ahang nasong. ⁵⁸ Anyo, aang owoni heruhon; kabong inyong lo dang ihandyo asang hafalangai olwarai diya.