¹ D’omiru hule, ethairu nya Erode, ohoindefani lo Galilea, assayo ho Yesu. ² Ajyo d’ohoigyemak honyong, “Inyong lya Yoanne Batista; ebuhu th’oye.” “Inyong nawon inyong h’akolon nehandyerek asang hafalangai.”

³ Aca endafaitho nya Erode Yoanne karik efithak inyong, th’arami thoho Erodias, afure n’olai. Fillipo. ⁴ Anyahi nya Yoanne Batista Erode hijan, “Aang obis dohoi diruthahina nafure holoilai Fillipo, Erodias!” ⁵ Awak nya Erode attohoro inyong, ti, obang nya Ojudei, anyo, dosong, inyong nya lo ohocoroni.

⁶ D’amuno n’ofaning lothamanarik Erode, esur nangaring h’Erodias dihithemi h’elulung n’ohothing. Amuno nya Erode, eruhok donyong, ⁷ “Epitha nang, esarak nang iye de aning nefiyo iye thonang!” ⁸ Th’alwahio than’ahathingi, efiyo nangaring h’Erodias inyong, “Isarak nang dini, thenene ditafu ahu no Yoanne Batista!” ⁹ Adiha othaji l’ohobu, ti, anyo, athauk inyong eruhohina dihithemi h’ohothing, efahak hijan aning nawak inyong thesarahini donyong. ¹⁰ Ahani ne, abonguni ahu no Yoanne Batista dimaji h’efitha. ¹¹ Eyanai ahu ditafu, ethafothohini dan’anagring h’Erodias; inyong na eyahak ahathingi. ¹² Ohothifok ho Yoanne afuni iyaru ahwan no Yoanne afwoi inuhahina. Thiya, afwoi inyahina Yesu.

¹³ 13 Ethaninguna no Yesu assayo h’aye no Yoanne, edyaharu amaji nya th’aroko, alo th’ahwan d’amaji nanyong hamaring. ¹⁴ Yesu adohu adi tho roko; atehuna nanyong elulung nahittok n’ohothing, amiehunu, ethalihyo hodiha thosong. ¹⁵ Nya th’athari, afuni ohothifok honyong donyong, ajyori, “Aang oholong karik olama amaji ne. Ohothing thoifwa dith’amisok dinyangahina ahwandek anyari.”

¹⁶ “Aang ofwoi,” Yesu etharangyo. “Ithai th’ahwandek, isarahina isong aning nabo dinyo!”

¹⁷ “Asang fodok hewon ohoi hosong hini, elolongitha h’angiryang miyet karik ohom arehai,” isong etharangyo.

¹⁸ “Iyanethek hoi isong donang hini,” Yesu ajyo. ¹⁹ Inyong anyahi ohothing thowoni dihap dihide h’amiyang. Eduhu elolongitha miyet h’angiryang huna karik ohom arehai hulo; amijyo dihide, afurak Ojok ahinwarang; epipinyo elolongitha h’angiryang, esarak d’ohothifok honyong; ara ohothifok esarak isong d’ohothing. ²⁰ Efong ohothing bukulung ara nacohi. Thiya, ohothifok ethafuthak okatino tomon larehai th’afithono than’anyari. ²¹ Arahi nya ohothing, aang hoiherye angorwo karik okalifinok h’akalifinok, 5,000.

²² Thiya Yesu ethacurok ohothifok honyong di roko, thoifwa ahithemi d’oyirik lobo l’ajor, ahibu inyong leru asulak ohothing thoifwa adi. ²³ Athuhon nanyong asulahina ohothing adi, alo dihide h’odonge hamaring di mojyo. Edwongon n’athari, orimak Yesu hamaring; ²⁴ d’orii lya, aroko olamarai dith’ajor, ahibu ahamwoitho n’ahari inyong igugungyo, anyo, owam nya ahomwa nahittok ado inyong. ²⁵ Dihiji h’omiru aunihoi karik inde h’amoithe berien, aindu Yesu d’ohothifok honyong, ahibu inyong oduha th’ahide than’ahari. ²⁶ Atehuna nasong inyong adaha dihide h’ahari, abangi. “Ohoile re!” ajyori isong, karik erwahai th’abangi.

²⁷ Yesu acama dosong kwak. “Ithakolotho,” ajyo inyong. “Nang lya. Hoibangatha!”

²⁸ Thiya Petro elolongo, “Hobu, ara iye lya diri, inyahi nang thoindu dindak dohoi th’ahide than’ahari.”

²⁹ “Iwong!” etharangyo Yesu. Ahani ne, Petro aculuyo adaha ahide n’ahari do Yesu. ³⁰ Ti, eisuna nanyong ahomwa nako, abang, abocyo adiyoro dith’ahari. “Ithalwahu nang, Hobu!” inyong lo ekor.

³¹ D’orii lya, Yesu kwak ewawar, ethahoru endefuna ahinang nanyong, ajyo, “Ya, angai beriena omutha eruhon nahoi! Angai iririhitha iye diruhon?”

³² Ara isong arehai ecurok di roko. Ara ahomwa awetha. ³³ Thiya, ohothifok ditha h’aroko, amojyoi do Yesu.“Diri, iye Olonyi l’Ojok!” isong eliliha.

³⁴ Isong alangitha ajor, afwoi d’ahap no Gennesaret, ³⁵ amaji nateharik Yesu. Ahani ne, asulahini isong d’ohothing hodiha dith’amiji, eyanai isong do Yesu. ³⁶ Isong hulo amojyoi inyong thohorik ohodihak thothino juk eker ti n’abongo nanyong; ara ohodihak hathin, ayiji.