¹ Thiya Ofarisei homok karik ohoityenak h’oyalu afuni tho Yerusalem do Yesu, efiye inyong, ² “Anyo theene bai, naang ohothifok hohoi othifoitho etyenio nefothuni th’ohohonyo hohothai? Aang ofiniai tuhudik dihithemi h’anyari!”

³ Yesu etharangyo, “Anyo aang ithai ithifoitho efahit n’Ojok, ara ithai ithifoitho etyenio nathai hamonye? ⁴ Aca ojyo Ojok, ‘Obanga lemonye karik nehathingi, karik ‘Lofyethak omonye dia ahathingi, awak ithayehini inyong. ⁵ Ti, ityenio ithai hijan ara owon othulo h’aning nacohi inyong alwahyerek omonye karik ahathingi, ti, ajyo, ‘Owon na ara n’Ojok!’ ⁶ aang inyong lo ithahabuyo omonye lonyong. Th’oyihoi tholya aang inyong lo othifoitho efahit n’Ojok, dithifoitherek etyenio nathai hamonye. ⁷ Ithai odwalak! Angai nya obis Isaia dicoryo thoithai! ¹⁰ Thiya Yesu elongo elulung n’ohothing donyong, ajyo dosong, “Ithaningyethek ara ithai itek tuhudik! ¹¹ Ikara aning nalo tholohuthuk h’othulo inyong isarak inyong alibori dimojyo, ti, aning naindu tholohuthuk ithabocyo inyong.”

¹² Thiya ohothifok honyong afuni donyong, ajyori, “Aang iye itek deene hijan odihari arami hecama iye d’Ofarisei?”

¹³ “Ofuni de iruthuna adi, ohiyani lakabong Lalamonye idulak dihide,” Yesu etharangyo. ¹⁴ Hoithathacianio ahwan nahoi thosong! Isong hulo ohoityenak ongodok h’ongodok; ara othulo aboithe longodo ithaicyo ongodoni lobo oyihoi, opwaharu isong arehai fodok dicundom.”

¹⁵ Petro acama omurut dihide, “Inyanyaha d’ohoi ocame lya.”

¹⁶ Yesu ajyo dosong, “kaang ithai ilofioro tuhudik, tholohide hohomok. ¹⁷ Aang ithai itek tuhudik? Aning nalo tholohuthuk h’othulo, dihohye honyong olo, alo inden adi thohwa honyong. ¹⁸ Ti, asang hafuni tholohuthuk, thothaji ofuni; isong hune asang hesarak othulo ebothan dimojyo. ¹⁹ Aca thothaji honyong ofuni igigilitha hamonyong, heyaru inyong dittohyo, aferorik athulo n’othulo karik oyihothik h’eleru homok olwarai. ²⁰ Ti, dinyo kwong afiniya, iring ojyori isong ithai thoihandye – aang ithabocyo othulo.

²¹ Yesu edehi amaji nya alo d’ahap naindek d’abothok, Tyre karik Sidon. ²² Athulo no Kanaanite namanya d’ahap nya, aindu donyong. “Lolonyi ho Davide!” inyong na ekor bebe. “Omiehi nang, Lahong! Owon nanangaring h’ohoile lomonyong; odiha ara namonyong.”

²³ Kabong Yesu hojyo donyong juk ocame aboithe. Ohothifok honyong afuni donyong, amojyoi inyong, “Ongararik inyong na adi! Nadithifoitho ahibu inyong ithathahomyo ohothai!”

²⁴ Thiya Yesu etharangyo, “Osuluni nang nya ti, d’akero halitho h’ohothing ho Israele.”

²⁵ th’arami thohune, aindu athulo ne, apwaharu di hejek honyong. “Olwaha nang, Lahong!” inyong na ajyo.

²⁶ Yesu etharangyo, “Aang obis diduhuna anyari n’akalifinok, amirohini d’ongohe.”

²⁷ “Arami hadiri hune, Lahong;” inyong na etharangyo; “ti, juk ongohe, onye th’anyari nafithoro nadow th’amaji nanyerek holomonye h’ahang.”

²⁸ Yesu etharangyo inyong na, “Iye athulo n’eruhon nabolo! Aning newak iye, ihandye de dohoi.” D’orii le, ayyu angering nanyong.

²⁹ Yesu edehi amaji nya, alo thal’ajor no Galilea. Adohitha adonge, alo iwoni. ³⁰ Elulungir hahittwak h’ohothing, afuni donyong, iyanai hosong: ongurak, ongodok, ohoryethak, othuhok karik ohothing olwarai hodiha, hoithaferik isong indehai dihejek ho Yesu; ara inyong ethayijyo isong. ³¹ Afalanga ohothing, atehuna nasong: othuhok, ocama; ohoryethak, ebuha; ohopalak, adaha ibisai; ongodok atehuni; karik isong ethahuyo Ojok lo Israele.

³² Yesu elongu ohothifok honyong donyong, ajyo, “Odiha nang othaji d’ohothing hulo, anyo, esukai honang operok aunihoi kwong anyari. Aang nang awak asulahina isong adi, kwong ithanyo isong, anyo, tek apwaharai h’ahure diyihoi, difwan dimiji hosong.”

³³ Ohothifok efiyo inyong, “Thongai de orimahini anyari nacohi ethanyerek diterere elulung ne?”

³⁴ “Baya elolongitha h’amuhuyut owoni dothai?” Yesu efiyo. “Cofa,” isong etharangyo. “Karik ohom hottik tiibai.” ³⁵ Yesu anyahi isong thowoni dihap. ³⁶ Thiya, Yesu eduhu amuhuyuthi cofa h’anyari hune karik ohom, afurak Ojok ahinwarang, apinyo, esarak isong d’ohothifok, ara ohothifok esarak isong d’ohothing. ³⁷ Anyo isong fodok anyari ara isong efong. Ara ohothifok ethafuthak akatino cofa h’anyari nafithoro. ³⁸ Ohifalai l’ohothing hanyo nya anyari 4,000, aang angorwo h’okalifinok thiya. ³⁹ Thiya Yesu athurok ohothing adi, ecurok di roko, alo dihap ho Magadan.