¹ Homok Ofarisei h’Osadducihio hofuni do Yesu hulo awahi alohuna Yesu; Isong hulo efiyo inyong thoihandye aning nabo nafalangai dosong, dithaithahina hijan inyong lo th’Ojok. ² Ti, Yesu etharangyo, “Ara oholong lalum, ijyo ithai, ‘Ohoi hoifwo iwonan h’ahap nayyu, anyo, adorya ahide.’ ³ Th’amoithe berien, ithai ijyo, ‘Owak ohuju asan, anyo, odorya ahide ahibu inyong odik ara neriok.’ Ocohi dothai ditehan angai olo ahap ijahitha th’amijyo dihide, ti, aang ocohi dothai dinyahina ethaithitha h’omiru!” ⁴ Angai omonyori karik aang owoni ara h’Ojok, ohothing h’ofaning lo!” Ifiyo ithai nang aning nafalangai? Awang! Aning aboithe nafalangai nesarahini de dothai, inyong aning nafalangai no Jonah. Yesu edyaharu isong. Alo adi.

⁵ Alangitha n’ohothifok d’oyirik lobo l’ajor, akworoi eyaru h’anyari. ⁶ Yesu ajyo dosong, “Omijyethek tuhudik, isukathik olamarai th’omundo h’Ofarisei karik h’Osadducihio.”

⁷ Ohothifok aculuyo enyanyaha arami hune dihji hosong, “Ocama inyong ahani, anyo, kaang ohothai iyanu h’anyari.”

⁸ Otek Yesu ainyong dwo ocama isong, efiyo isong, “Anyo ithafero ithai dihiji hothai awangan n’anyari? Angai berien na omutha eruhon nawon dothai! ⁹ Kabong ithai itek tuhudik? Aang ithai iyu epipinyahina hindang elolongitha h’angiryang miyet d’ohothing 5,000? Baya akatino ithafuthak ithai? ¹⁰ Karik ara elolongitha h’angiryang cofa d’ohothing 4,000. ¹¹ Angai aang ithai itek tuhudik aangan hindang acama arami h’anyari? Isukathik olamarai th’omundo h’Ofarisei karik h’Osadducihio!” ¹² Thiya ohothifok atehi tuhudik hijan aang inyong ocama dosong arami h’omundo hoihuhumyerek anyari, ti, th’etyenio n’ Ofarisei karik n’Osadducihio.

¹³ Yesu alo d’ahap naindek d’abore no Caesarea Filippi, amaji nefiyerek inyong ohothifok honyong, “Ngai ojyori ohothing Olonyi l’Othulo lya?”

¹⁴ “Ojyori homok Yoanne Batista,” isong etharangyo. “Homok ajyori Elija; ara homok ikoti ajyori Jeremia dia lobo th’ohocorok.”

¹⁵ “Ara ithai?” inyong efityo isong, “Ithai ijyo nang, ngai?”

¹⁶ Petro etharangyo, “Iye Kristo, Olonyi l’Ojok lomijyo.”

¹⁷ “Oyyu dohoi, Simone, lolonyi ho Yoanne,” Yesu etharangyo. Aca aangi arami hadiri hune ofuni th’othulo, ti, isarahini dohoi gwo thalala Monye lowon dihide. ¹⁸ Inyong na, anyahi nang dohoi, Petro: iye amorwong; dihide h’asihothe n’amorwong na, aduhok nang de ekklesia hindang, naang de juk oyihethik ho Inferno otelu. ¹⁹ Esarak nang de dohoi ongaitha h’Ohobye lothohide. dara aning nelwo iye dihap, olwoi de dang dihide; nehohi iye dihap, ohohini de dang dihide.” ²⁰ Thiya Yesu efahak ohothifok honyong thaang onyahi dolobo othulo hijan inyong Kristo.

²¹ Th’orii le adihithemi, aculuyo Yesu acama oleyoroi d’ohothifok honyong, “Owak alo nang di Yerusalem di thahthaciana th’ohobolok, ofadirihio hohittwak karik ohoityenak h’oyalu. Ithayeye nang de, ti, diholu h’operok aunihoi, ofuni nang de ithadothuna disu.”

²² Petro eyaru Yesu arakang diringyo inyong. “Ojok thaang ohorik paat, Hobu!” ajyo Petro.

²³ Yesu eloyitho ihurongoi, ajyo do Petro, “Ilo adi thonang, Sitan! Iye ohibose diyihoi honang, anyo, aang ocamitha hohoi donang hulya ofuni th’Ojok, ti, th’elathulo.” ²⁴ Thiya Yesu ajyo d’ohothifok honyong, “Ara owak othulo lobo ainduna honang, thokworo ahwan nanyong, thoiduhu akruce nanyong, athifunu nang. ²⁵ Lowak ethalwahuna esu nanyong, ithalithok de, loithalithok esu nanyong thonang, orimak de esu nanyong. ²⁶ Orimahini de diri ohothing aning nabo, ara orimahini ahap fodok, ti, ethalithohini esu nasong? ²⁷ Aca aindek Olonyi l’Othulo ainduna d’abolori n’Omonye lonyong h’anjelohio honyong; oindu de disoryo ohothing abok abok, ngai thoigyematha thohonyong. ²⁸ Anyahi nang ithai, owoni homok haang de oye, ara kaang Olonyi l”Othulo hoindu ara Ohobu."