Ebwayit 17
1
Diholu h’operok inde, eyaru Yesu honyong: Petro karik olarok, Yakobo karik Yoanne dihu h’odonge lohodo, isong diya hamaring.
2
Amijyo nasong adihide, atehuni isong eloyitho oindu do Yesu: awulo ahomong nanyong iring oholong karik abongoitho hanyong abwori pang pang pang.
3
Thiya, ohothifok aunihoi hulo atehuni Musa karik Elija ocamai ho Yesu.
4
Ahani ne, Petro acama omurut dihide, “Hobu, angai berien na oyyu inyong dohoi diwonan dini! Ara iwak iye, aduhok nang de amorokohio aunihoi dini: aboithe dohoi, aboithe do Musa karik aboithe d’Elija.”
5
Ahibu inyong hocama, aindu adiko nawulo dihide hosong, ara oilongit thath’adiko ajyo, “Olonyi hindang olefeng lo loko, ditha honyong amuno nang ithaningyethek donyong!”
6
Ethaninguna n’ohothifok omurut lya, abangi isong hulo, apwaharai ahomongithek adihap.
7
Yesu aindu dosong, athin isong. “Odothothik th’ahide.” inyong ajyo. “Hoibangatha!”
8
Thiya, isong hulo amijyo dihide. Kaang isong hulo otehu othulo loboling, arahari, ti, Yesu.
9
Ecuruna nasong th’odonge, Yesu anyahi dosong, “ Hoinyahina ethalyehina nethuk ithai attehuna ne, took, Olonyi l’Othulo afuna ethadothuna th’oye.”
10
Thiya, ohothifok efiyo Yesu, “Anyo ojyori ohoityenak h’oyalu hijan, Elija de icak ainduna ahithemi?”
11
“Elija diri laindu ahithemi,” Yesu etharangyo, “karik, orimak de asang fodok athuhi ehuhuma.
12
Ti, anyahi nang ithai, athuk Elijah ainduna berien. Aang ohothing hotek; eduhuni inyong ara othulo thene iring owak isong. Ahani de dang ofuni ihandyo d’Olonyi l’Othulo.”
13
Thiya, ohothifok atehi tuhudik hijan ocama Yesu dosong arami ho Yoanne Batista.
14
Anyahuna nasong d’eluluung n’ohothing, aindu othulo lobo do Yesu, arigongo dihithemi honyong,
15
ajyo, “Lahong, omiehi olonyi hindang! Omwai inyong lo h’ahahe. Ara nerimu, omirok inyong dith’ahimang dia ahari.
16
Eyanu nanag inyong d’ohothifok hohoi dithayijyo, ti, kabong hoithayijuni inyong.
17
Yesu etharangyo, “Angai iwon ithai ara ohothing haang iruhi karik ohothing hoipal! Omiru baya iwak ithai esuka nang hothai? Iyanethek oitho le donang dini.
18
Yesu esarak efahit d’ohoile lomonyong, alo adi thotha hoitho; th’orii le, ayyu oitho.
19
Thiya, ohothifok afuni do Yesu hamaring, efiye inyong, “Anyo aang ohoi ingatterek ohoile lomonyong adi?”
20
Yesu etharangyo, “Anyo omutha nya eruhon nathai.” Anyahi nang dothai hijan, ara iwon tihai heruhon nabolo iring ohinyomothi l’ohiyani lohittok, ocohi dothai dijaran d’adonge ne, “Ilo thene, ilo di! Alo. Ira ithai ihandyo asang bukulung!”
21
22
Afuna n’ohothifok bukulung di Galilea, Yesu ajyo dosong, “Aindehi ethafothohina adi n’Olonyi l’Othulo d’ohothing.
23
hofuni inyong ittohoro; ti, diholu h’operok aunihoi, ofuni de inyong idohuna disu.
24
Afuna no Yesu karik ohothifok honyong di Kapernaum, afuni do Petro ohoiduduhak h’aduma n’Atemplo, efiye Petro, “Oduma ohoityenani lothai aduma n’Atemplo?”
25
“Ahani do ti,” Petro etharangyo. Ajingara no Petro dithwa, ecak Yesu acama omurut dihide, “Simone, ainyong egigilo nahoi? Ngai oduma adumathik h’ohobwore h’ahap na? Ohothing h’amiji dia ohodahak?”
26
“Ohodahak,” Petro etharangyo. “Oyyu hoi do,” Yesu etharangyo, “onyahi hijan, awang ohothing h’amiji oduma.
27
Ti, awang ohothai iwak amoryo ohothing hulya. Inyong na, ilo di jor, ilo omirok ogodo dith’ahari. Ifihu ohome ohoithemoni lendefu iye; dihuthuk honyong, irimak iye de anyahuthong ebindang nacohi aduma hindang n’adumit n’Atemplo karik nathai. Iyaru inyong, ara iye iduma isong adumit nahothai.