¹ D’orii le, afuni ohothifok do Yesu, efiye, “Ngai lobolo bebe d’Ohobye lothohide?”

² Yesu elongu okalifonit lotti, esarak dihithemi hosong. ³ Ajyo dosong, “Diri, diri ajyo nang dothai, ara kabong ithai iloitho iring okalifinok hotti, aang ithai ifwo d’Ohobye lothohide. ⁴ Othulo lobolo bebe d’Ohobye lothohide, inyong othulo lolau ahwan nanyong, aindu ijahitherek okalifonik. ⁵ Othulo loifothu loboling othulo iring oitho lotti ahana lo th’ofure tholo hindang, ifothu nang. ⁶ Loisarak okalifinok hottik hoiruk nang, thoiyau, ocohi kodien dithorihina dimurut honyong omorwong lohittok, amirohini thodyoro dith’ahari.

⁷ Angai de omonyori arami d’ahap hijaran owoni de asang hesarak ohothing ethalithohina eruhon nasong! Ofuni de asang hune ifuhon ti, oindu de imonyori bebe d’othulo loihandyo isong! ⁸ Ara isarak ahinang dia aheju nahoi iye ethalithohina eruhon nahoi, obongu adi, ara iye icohoro! Oyyu dohoi dijingara d’esu kwong ahinang dia aheju, th’awonan h’ahas karik ahejek bukulung, amirohini iye dith’ahimang namanya mak. ⁹ Karik ara isarak iye ahonyek aboithe ethalithohina eruhon nahoi, ikolouthu ara iye icohoro adi! Oyyu dohoi dijingahina desu h’ahonyek aboithe, th’awonan h’ahonde arehai, amirohini iye dith’ahimang namanya mak. ¹⁰ Ottihatha tuhudik, hoilauna lobo th’okalifinok hottik hulya. Anjelohio hosong dihide, anyahi nang dothai, ingengelye Lalamonye dihide. ^{11 1 12} Ainyong igigilo ithai ihandyo othulo, lowon h’akero 100, ara olitho aboithe? Idehi athomne sahal nasahal huna onyo dimukok h’odonge, attaharu aboithe nalitho na. ¹³ Ara larimak inyong, anyahi nang iye, omuno bebe th’aker thanalitho ne, tholohide thahakaang olitho huna. ¹⁴ Ahani de dang ihandyo lethe Monye lothohide; aang owak oboithe thohottik hulya tholithoi.

¹⁵ Ara eyau loilai dohoi, ilo donyong, ara iye inyahi donyong epal nanyong. Ti, ihandyethek ithai honyong hamaring. Ara ithanignyo eruhu arami hahoi, ehandyo iye nayyu dinyahuna inyong dohoi. ¹⁶ Ti, ara aang ithairyo dohoi, ilongu ohothing arehai karik honyong, dofuni ohothing arehai hulya ingengelahina attihanini ainsong arami hawon, iring najararik amanini. ¹⁷ Ara aang owak ethairyo dang dosong, inyahi arami hune bukulung d’ekklesia. Ara aang ithairyo d’ekklesia, isukathik honyong iring othulo laang iruk d’Ojok dia ohoiduduhani l’adumathik h’aduma. ¹⁸ Karik inyong nanyahi nang dothai fodok: aning nelwo ithai dihap, olwaoi de dang dihide; nehorik ithai dihap, iruhohini de dang dihide. ¹⁹ Karik anyahi nang ithai: ara iruk ithai, ithai arehai, dihap aning nemojyo ithai, ihandyo de dothai lala Monye lothohide dothai. ²⁰ Aca ara ofuni arehai dia aunihoi amaji aboithe th’ofure tholohindang, diya awon nang hosong.”

²¹ Thiya, Petro aindu do Yesu, efiyo, “Hobu, ara orasa lalai eyauna donang, omiru baya owak amiehi nang inyong, omiru cofa?”

²² “A a, ikara omiru cofa,” Yesu etharangyo, “ti, omiru athomone cofa enyahitha cofa. ²³ anyo, ahani ojahitha Ohobye lothohide. Owon nya ohobu lowak atehan angai igyema ohoigyemak h’ebarithi hanyong. ²⁴ Oculuyo elonguna aboithe thosong lowon h’ojinehio 1,000,000 (amillion aboithe). ²⁵ Aang ohoigyemani owon h’enyahwo hacohi adumarik ahoros; d’ahani ne, efahak ohobu inyong thoithanyangahini ara ongaca, athulo nanyong, okalifinok karik akalifinok hanyong, karik asang bukulung hanyong, didumarik ahoros nanyong. ²⁶ Ohoigyemani apwaharu th’ahungitho dihithemi h’ohobu, ajyo, “Lahong hindang, ongongok ethilauna tiibai,” inyong lo amojyo, ‘aduma nang iye de asang bukulung!’ ²⁷ Adihari arami hune d’ohobu, aburunu thonyong, amiehi inyong ahoros, edehi inyong thoilo. ²⁸ Thiya, othulo lya alo adi d’ohoigyemani hosong loboling, lowon honyong h’ahoros n’enyahwo tiibai ahani. Endafaitho onde lya, akoryo inyong omurut. ‘Odumak nang enyahwo hundang!’ inyong ajyo.

²⁹ Ohoigyemani honyong lya apwaharu dihap, amojyo inyong, ‘Ongongok ethilauna tiibai,” inyong lo amojyo, ‘Aduma nang iye de!’ ³⁰ Ti, eda; kombwo, esara inyong thoifithahini dithwa, lwai inyong aduma ahoros. Atehuna n’ohoigyemak homok hulo arami hune afuhon, ejyoryai isong hulo bebe, afwo d’ohobu, anyahini inyong asang bukulung hehandyo onde lya d’ohoigyemani hosong. ³¹ Ahani ne, elongu ohobu ohoigyemani lya dithwa. ‘Iye ongaca, laang aca!’ inyong ajyo.

³² ‘Amiehi nang iye enyahwo fodok hundang hawon dohoi, anyo, emojyo iye nang thomiehi iye. ³³ Ira iye imiehina ohoigyemani hohoi lya, iring namiehinerek nang iye. ³⁴ Engere ohobu bebe; asulak ohoigyemani lonyong lya thosarye, alo ifitha dithwa, took aduma ahoros nanyong bukulung.” ³⁵ Yesu engohi ocame, “Ahani de oindu lala Monye ihandyo dothai abok abok, arahari, ara imiehi ithai lethelai th’othaji hothai.”