¹ Aindu iwonan ahana, engohina no Yesu acama arami hune, edyaharu Galilea alo d’ahap no Judea, d’oyirik lobo l’Owor lo Jordano. ² Athifoforoi inyong elulungir hahittwak h’ohothing; Yesu ethalihyo karik ethayijyo isong diya.

³ Homok Ofarisei afuni donyong, athemye alohyo inyong thajaran, “Ohorik oyalu lohothai othulo, thoidehi afure, iring owak inyong?”

⁴ Yesu etharangyo, “Kabong ithai ihera amanini nadwa najyo hijan diculwe ayeyo Ohoyani lobusuha karik nangorwo? ⁵ Karik Ojok ajyo, ‘Th’ahu thone, idehi de othulo omonye karik ahathingi, athuna h’afure; ara de arehai awoni ara aboithe?’ ⁶ Ahani ne, aang isong arahi arehai, ti, aboithe. Awang othulo lethapehyo, do, aning nathuk Ojok enuthahina amaji aboithe.”

⁷ Ofarisei efiyo inyong, “Anyo, hathi, isarak Musa oyalu lohorik othulo thoisarak afure amanini n’apeha, angararik inyong na adi?”

⁸ Yesu etharangyo, “Isarak ithai nya Musa amanini napeha han’ethefure, anyo, oko etyenio ithai.” Ti, ikara nya ahani d’omiru h’ayeyo. ⁹ Anyahi nang ithai, hathi, hijan othulo lopeha h’afure nanyong th’arami thahamok arahari h’eleru, iyau aferi h’afure n’othulo lobo, ara omuthayo athulo naboling.”

¹⁰ Ohothifok honyong ajyori donyong, “Ara ahani hoi, ojahitha dihiji h’onde karik afure, oyyu awangan amuthayo.”

¹¹ Yesu etharangyo, “Awang etyenio ne olo h’ohothing bukulung, arahari ohothing hathuk Ojok esarahina dosong. ¹² Olwari ahosi hesarak ohothing dia ahathing aangan n’amuthayo: homok, anyo, ahani nya oyisuni isong; homok, ohothing isarak isong esuka ahani; karik ara homok aang homuthayo th’arami thoh’Ohobye lothohide. Loiruhu etyenio ne thoihandye ahani.”

¹³ Ohothing homok eyanu okalifinok hakalifino do Yesu, dithahina ahas hanyong dihide hosong, amojyo thosong, ti, ohothifok eringyo ohothing hulya. ¹⁴ Yesu ajyo, “Okalinok karik akalifinok thoifunu donang; hoithawejyethek isong, anyo, Ohobye lothohide losong hojak ahani hulya. ¹⁵ Inyong lo ethahi ahas dihide hosong, alo adi.

¹⁶ Aindu nya othulo lobo do Yesu, ajyo “Ohoityenani,” inyong efiyo, “Ainyong aning nayyu, owak ehandyo nang, dirimahinerek esu namanya mak?”

¹⁷ “Anyo ifiyo iye nang, ainyong nayyu?” etharangyo Yesu. “Owon aboithe ti, loyyu. Othifoithe efahitha, ara iwak iye ajingahina dith’esu.”

¹⁸ “Aisong efahitha?” inyong efiyo. Yesu etharangyo, “Hoittoho, hoiferorik athulo dia othulo lanabo, hoihoholyo, hoimangyo, ¹⁹ obanga lemonye karik nehathingi, omunoi othulo dia athulo naindek dohoi iring nemunorik iye ahwan nahoi.”

²⁰ “Athifoitho nang efahitha hune bukulung,” ottwathi lya etharangyo. “Ara ainyong owak ehandyo nang?”

²¹ Yesu ajyo donyong, “Ara iwak iye abisan, ilo ithanyangak asang hahoi, ara iye isarak enyahwo d’ohoicanak; iwon iye de hebarithi dihide; thiya, iwong, othifunu nang.” ²² Ethaninguna n’ottwathi lya ahani, alo adi ara lejorya, anyo, obara inyong lo bebe.

²³ Yesu ajyo hathi d’ohothifok honyong, “Anyahi nang ithai hathi tuhudik, oko de bebe d’ohothing hosom dijingahina d’Ohobye lothohide. ²⁴ Enyoryo nang ikoti, “Oko de d’othulo lobara ajingara ditha Ohobye l’Ojok th’ajingara n’ababut tholothwa hoiruhet l’ohiyani.

²⁵ Ethaninguna n’ohothifok honyong arami hune, afalangai. “Ara ahani, ngai ocohi ethalwahunu?” isong efiyo.

²⁶ Yesu amijyo dosong gwo, etharangyo isong, “D’othulo, awang arami hune ocohini awonan. Ti, d’Ojok, awang aning naang ocohi awonan.”

²⁷ Thiya, Petro acama, “Ottihatha,” inyong ajyo, “Ethuk ohoi edehi asang bukulung ara ohoi ithiforo iye. Ainyong de hofithoro dohoi?”

²⁸ Yesu ajyo dosong, “Ocohi dothai ditehan tuhudik hijan ara de Olonyo l’Othulo lawoni d’okara lonyong labolori ditha Oper Ongejuk, thiya, ifuni ithai de ohothifok hundang tomon h’arehai hulya iwoni di kani, dindafaitho amukoko tomon larehai ho Israele.” ²⁹ Karik othulo dia athulo nedehi ahangithek, olarok, ahanerok, omonye, ahathingie, okalifinok, akalifinok dia amandak thonang, oindu de ifothuna alif enyahitha olwarai karik ofuni de isarahina donyong esu nanmanya mak. ³⁰ Ti, holwari hofuni de ahithemi, onyahuni de diholu, ara honyahu diholu, afuni ahithemi.