¹ Ojahitha Ohobye lothohide ahana. Owon nya othulo loiwan berien diyanu ohothing digyema dimana honyong. ² Eruhi esarahina isong aduma nacohi, enyahwothi ebindang neyelehe ne aboithe d’ofaning; inyong lo asulak isong di mana honyong. ³ Inyong ataharu ikoti ohoigyemak amiru hosahal, arimak homok owejethe kwong egyema, ⁴ anyahi isong, ‘Ifwatha digyema dimana; aduma nang de ithai ara nayyu.’ ⁵ Isong afwo. Thiya, th’omiru tomon larehai karik omiru aunihoi, ehandyo dang ahani. ⁶ D’orii miyet, alo irimahina ohothing homok owejetho ija. Aang egyema. “Anyo itharohojyo ithai ofaning kwong ehandyo aning nabo?” inyong efiyo isong.

⁷ “Aang othulo lesarak ohoi egyema,” isong ethrangyo. ‘Oyyu, ifwatha dang digyema dimana honang,’ inyong anyahi isong. ⁸ Edwong n’athari, elongu lomonye h’amana ohotihani l’ohogyemak, ‘Ilongu ohoigyemak; oculuye aduma isong th’ohothing thoh’ofuni aholu hulo, ara iye ingohi th’ohothing thoicak afuna.’

⁹ Ohothing hoculuyo egyema d’omiru miyet, esarahinin othulo aboithe anyahuthong adenario aboithe. ¹⁰ Afuna n’ohothing hoicak egyema efothuna aduma nasong ahithemi, ojyori ifothu isong de ngona enyahwo olwarai. ¹¹ Efothuni aduma nasong, aculuye ewiwinya d’ohotihani l’egyema. ¹² Ohothing homajarai digyema aholu, egyemai orii aboithe ti.’ isong hulo ajyori. “ahibu ohothai igyema ofaning taak ditha h’oholong lonok rang rang - ara iye iduma ohoi hosong see.’

¹³ "Ithaningye, omotte,’ lomonye h’egyema etharangyo aboithe thosong, ‘Kaang nang ithai attumyo. Aca eruhu ithai egyema n’ofaning aboithe th’ adenario aboithe. ¹⁴ Thoone ne, ifothuna aduma nathai, ara ithai ifwo dihang. Nang lalo isarahina d’othulo lamajyo nang aholu lo, aduma nanyong, iring nathuk nang esarahinerek nathai. ¹⁵ Dia aang obis donang dihandyo aning iring awak nang? Dia ihain iye, anyo nang lahoryo ara nayyu?’ ¹⁶ Ahani ne, owon de oiholuhani ara ohithemoni, ara ohoithemoni ara oiholuhani.”

¹⁷ Anden no Yesu di Yerusalem, eyaru honyong ohothifok tomon larehai hulo, ofwoi ahibu inyong ocacamaru hosong hama hama. ¹⁸ “Ithaningyethe,” inyong anyahi dosong. “Ohothai hoifwo di Yerusalem, d’amaji nafwarik isarahinerek adi Olonyi l’Othulo do fadirihio hohittwak karik ohoityenak h’oyalu. Ithapalye de inyong ara lottohori ¹⁹ karik, thiya, ethafothohini inyong d’ohothing hoikela th’Ojudei, hofuni de ithafitangyo inyong, afodohye karik abehohini inyong di kruce; ti, diholu h’operok aunihoi, ofuni de ithadothuna inyong disu.”

²⁰ Thiya, athulo no Zebedeo aindu donyong holonyirok arehai; adulai donyong karik efiye donyong alwaha.

²¹ “Ainyong, iwak iye,”Yesu efiyo inyong na. Inyong etharangyo, “Iruhok donang, hijan ofuni de olonyirok hundang hulo arehai iwoni, lobo dinget karik loboling dihothong hohoi, ara iye leindu ara Ohobu.”

²² “Awang iye itek ainyong ifiyo iye, “ Yesu etharangyo olonyirok. “Ocohi de dothai amatha ogludyet l’ethathaciana laindek nang de amatha lya?” “Icohi ohoi,” isong etharangyo.

²³ “Imathu ithai de diri th’ogludyet hindang, “Yesu anyahi isong, “Ti, ikara nang anyimu ngai de isuka dinget dia dihotong. Amasok hune hathuk lala Monye ehuhumahina d’ohothing hawoni isong ara hosong.” ²⁴ Ethaninguna n’ohothifok hulo arami hune, engereji d’ohothifok areahai hulo. Yesu alongu isong bukulung, ajyo. ²⁵ “Itek ithai hijan owoni opaganihio h’akolon dihide hosong karik owoni ohoindefak h’akolon fodok nendafaitherek. ²⁶ Ti, ikara ahani de olo iwonan dihiji hothai. Ara owon lobo dihiji hothai lowak owonan ara lohittok, owak inyong thoiwona ara ohoigyemani lohomok hulo fodok; ²⁷ karik ara owak lobo thothai awonan ahithemi, owak inyong thoiwona ara ongaca lothai bukulung ²⁸ iring Olonyi l’Othulo, laang oindu hijan owak igyemai thonyong; ti, digyema karik disarahina esu nanyong dilwahunerek ohothing holwa.

²⁹ Edyaharu no Yesu h’ohothifok honyong Jeriko, athifunu elulung nahittok n’ohothing. ³⁰ Ethaninguna n’ongodok arehai honya owoni dipogo h’oyiho, hijan Yesu lolo thol’oyihoi le, aculuye elolongo, “Lolonyi ho Davide! Omiehi ohoi, lahong! ³¹ Elulung n’ohothing eringyo isong, anyahini isong thodularu. Ti, isong hulo elolongo omurut dihide, “Lolonyi ho Davide! Omiehi ohoi, lahong!

³² Yesu awetha karik elongo isong. “Ainyong iwak ithai nang thoihandye dothai?” inyong efiyo isong.

³³ “Lahong,” isong etharangyo “Iwak ohoi iye thoisarak ohoi atehuna nahoi.” ³⁴ Amiehi Yesu isong karik athin ahonde hasong; ara ahonde hasong acohi atehuna. Isong athiforo inyong.