¹ Aindehi nya nanyong h’ohothifok honyong di Yerusalem karik Bethphage, d’Adonge n’Olives, asulak Yesu thiya, ² ajyo dosong, “Ifwatha d’amiji nothohithemi nya, irimak ithai de ababut notho miji othora diya, angaring honyong. Ohouna ara ithai iyanu isong donang. ³ Ara ojyo othulo lobo aning nabo th’arami thohune, ijaratha, “Owak ti Ohobu isong,’ osulu de kwak othulo le isong hothai.”

⁴ Ofuhi arami hune, th’ocamitha h’ohocoroni, hojyo, ⁶ Ohothifok afwoi ihandyo ainyong onyahi isong Yesu thoihandye. ⁷ eyanu isong ababut h’angaring, esarahini abongoitho dihide hosong, ara Yesu awoni dihide h’abongoitho. ⁸ Ohothing holwa h’elulungir afecye abongoitho hasong diyihoi, homok ekocyo athandak h’oyandit karik osohot afecye diyihoi. ⁹ Thiya, elulungir h’ohothing, hafwo ahithemi karik aholu no Yesu, elolongoi bebe, “Hosanna do Lolonyi lo Davide! Loindu th’ofure thol’Ohobu thomunoi! Hosanna tholohide h’ahide!”

¹⁰ Ajingara no Yesu ditha ho Yerusalem, akek abore ara ocame lojyo, “Ngai inyong lya?” ohothing efiyo.

¹¹ “Ohocoroni Yesu lya, tho Nazaret di Galilea,” elulung etharangyo.”

¹² Yesu ajinga dith’Atemplo, angaterek ohoinyangak karik ohoithanyangak adi tho Templo. Alafuhyo obeleha hoiloicyerek enyahwo karik hethanyangyerek ayorohoco, ¹³ Ajyo dosong, “Igero dith’amaninihio, hijan ajyo Ojok, ‘Ofuni de ilongo Atemplo hindang ara athwa n’amojo.’ ti, ethuk ithai eduhuna ara amaji nedimarik ohoholak.”

¹⁴ Afuni ongodok karik opalak donyong di Templo; ara inyong ethalihyo isong. ¹⁵ Ti, atehuna no fadirihio hohitwak karik ohoigerok h’oyalu asang hafalangai hehandyo inyong, karik ethaninguna nasong elolongo n’okalifinok dith’Atemplo hijan, “Hosanna d’Olonyi lo Davide!’ engerej.

¹⁶ Isong ajyori donyong, “Ithaningu iye, ainyong ojyori isong? Yesu ajyo dosong,“Aa, ethaningu nang,” Ti, kabong ithai ihenu thath’amanini nadwa? “Ethuk ithai ehuhumuna thohuthuhye h’okalifinok hottik karik hohonaha emamajyo nabis’?”

¹⁷ Yesu edyaharu isong alo adi tho bore, alo di Bethani esuka diya oharie aboithe.

¹⁸ Dinyahara honyong di bore nya thamoithe berien, aleng ahure Yesu. ¹⁹ Atehu inyong ohiyani, longida ahayo dipogo h’oyihoi, alo donyong, ti, aang orimak aning nabo dihide honyong arahari abene.

²⁰ Ahani ne, inyong ajyo d’ohiyani lya, “Aang iye kwong hoithadoyo ahayo!” Ara ohiyani lya aboco ayohoji Atehuni ohothifok arami hune, afalangai. “Angai oboco ohiyani lya ayohoji kwak ahani?” isong efiyo.

²¹ Yesu etharangyo isong, “Anyahi nang ithai, ara iruk ithai, ara ithai aang hoirirhitha, ihandyo ithai de ainyong ehandyo nang d’ohiyani le, ti, ijyo ithai de dang d’odonge lo, “Iye thoiyarai dihide karik dihap dith’ahari nahittok,’ ehandye de. ²² Aning nefiyo ithai ditha hamojo, ahibu ithai iruk, ifothu ithai de.”

²³ Yesu anyaha di Templo; dihide h’etyenio nanyong, ofadirihio hohitwat karik ohobolok afuni donyong, efiye, “Th’akolon thanani ihandyo iye asang hune? Ngai isarak iye akolon ne?”

²⁴ Yesu etharangyo, ajyo dosong, “Efiyo nang ithai efiet aboithe; ara etharangyo ithai nang, anyahi nang de ithai ainyong nawon ara hindang dihandyo asang hune. ²⁵ Thongai oindu akolon no Batisimo no Yoanne Batista? Thohide dia th’ohothing?” Abocori isong hulo aculuyo elafere dihiji hosong. “Ainyong de ijyo ohothai? Ara etharangyo, ‘Th’Ojok,’Ojyo de dohothai, ‘Anyo naang ithai nya iruk Yoanne?’ ²⁶ Ti, ara ejyo th’ohothing, ‘Th’ohothing, ebang, ainyong de ofuni ohothing ihandyo, anyo, otek isong hulo hijan Yoanne Batista ohocoroni.” ²⁷ Ara isong hulo etharangyo Yesu, “Aang ohoi itek.” Ara inyong ajyo dosong, “Aang nang dang ithai anyahi.”Thanani akolon ehandyo nang asang hune.” ²⁸ Thenene, ainyong igigilo ithai? Owon nya othulo lowon h’olonyirok arehai.

²⁹ Alo inyong lo da lahong, ajyo donyong, ‘Lalalonyi, ilo digyema dimana ahanana.’ Aang nang awak aden,’ Inyong lo ajyo. Ti, diholu, eloicyo ahu nanyong, alo.

³⁰ Thiya omonye alo d’olonyi loboling lo, anyahi dang ahani. ‘Aa, lahong,’ inyong etharangyo, ti, kabong olo. Loni th’arehai ehandyo aning nawak omonye?” ³¹ “Olonyi lahong ihandyo aning nawak omonye,” isong etharangyo. Ahani ne Yesu ajyo dosong, “Anyahi nang ithai: ohoiduduhak h’adumathik karik amwahi ofwo de d’Ohobye l’Ojok, ahithemi nathai.” ³² Aca oindu Yoanne Batista dinyahina ithai oyihoi lobis dinderek, ithai aang eruk donyong; ti, ohoiduduhak h’adumathik karik amwahi eruhi donyyong. Karik juk ethehu ithai ahani, kabong ithai iloicyo ahosi hathai, ara ithai iruk inyong.

³³ “Ithaningyethek d’aryamara naboling,” Yesu ajyo. “Owon inya omonye l’ahap loboling, loihuhumyo amana n’ahayo h’obalu, aduhok esisihet n’obalu, ekolok thoilyethe karik aduhok oilyethe lekeyerek. Thiya ebwahi amana d’ohoithanyangak, alo dipoco. ³⁴ Edwongon n’orii loingongocyerek ahayo h’obalu, asulak ongacani honyong d’ohoithanyangak disarahina inyong oyirik lonyong l’engongocio. ³⁵ Ara ohoithanyangak endefuni ongaciani, abahye aboithe, ottohori lobo ara loboling lo amirye th’omorik. ³⁶ Ara othulo lya asulak ongaciani homok, olwarai th’ohoithemok, ara dang ohoithanyangak ehanndye ahani dang dosong. ³⁷ Thiya, dicuhit, asulak othulo lya olonyi lonyong dosong. “Atek nang tuhudik, obangi de isong lalalonyi,” othulo lya ajyo.

³⁸ Ti, atehuna n’ohoithanyangak olonyi l’othulo lya, ajyori th’ahwandek thahasong. ‘Olonyi lya lolomonye h’ahap. Ifuna, hattohoro inyong. deyaru attitto hanyong.’ ³⁹ Isong hulo endefuni inyong. Acohoroi adi thomana, attohori inyong sdi. ⁴⁰ “Thene, ara lomonye h’amana oindu, ainyong de oindu ihandyo d’ohoikiyak dia ohoithanyangak?” Yesu efiyo.

⁴¹ “Aang inyong opwak attohoro ohothing omonyorok hulya!” isong ajyori, “karik, esarak amana d’ohoithanyangak homok, hofuni isarahina inyong oyirik lonyong l’engongocio dimiru.”

⁴² Jesu ajyo dosong, “Kabong ithai ihena ainyong ojyo amanini nadwa?‘ Omorwong lathuk ohoduhok acohoro ara lamonyong, eloitho ara omorwong loyyu bebe, okalak omorik bukulung. Ehandyo Ohobu ahani; Angai berien na olibo dingengela'? ⁴³ “Karik anyahi nang dang dothai,” Yesu afonik. “Iduhuni de Ohobye l’Ojok adi thothai, esarahini d’ohothing hoithadoyo ahayo.” ^{44 1 45} Ethaninguni, atehi ofadirihio hohittwak karik Ofarisei hijan isong ocama aryamarihio ho Yesu, ⁴⁶ inyong na, isong athemyo endafaitho inyong. Ti, obangi elulungir h’ohothing hoiruk hijan Yesu ohocoroni.