¹ Yesu ikoti acama d’ohothing th’aryamarihio, ajyo, ² “Ojahitha Ohobye lothohide ohobu loboling, lonya ehuhumyo amuno n’amutha n’olonyi. “Owon inya ohobu lehuhumyo amuno n’amutha n’olonyi. ³ Asulak ohoigyemak honyong dinyahina ohothing hoilongoi thoifunu di muno, ti, edari afuna. ⁴ Otihyo ahani, aslulak ohogyemak homok dinyahini ohothing hoilongoi thoifunu: ‘Amuno hindang athuho thenene; angotho ohisim karik othagwohi. Athuho asang bukulung. Ifuna d’amuno n’amutha!”’ ⁵ Ti, aang ohothing hoilongoi oyip; ngadi olefeng igigilo egyema nanyong: lo dimana honyong, loni dimaji honyong h’ethanyangio, ⁶ ahibu homok indafaitho, abahye karik attohori ohoigyemak. ⁷ Engere ohobu bebe; asulak ohoremok honyong, attohori ohottohok hulya karik edwehini abore nasong dihap. ⁸ Thiya, elongo ohoigyemak honyong, ajyo dosong, ‘Athuho ehuhumio n’amuno n’amutha hindang, ti, aang ocohi d’ohothing hoilongoi difuna imuno.’ ⁹ ‘Ifwatha thenene diyihothik dilongunu ohothing olwarai iring irimak ithai.’ ¹⁰ Thiya ohoigyemak afwoi diyihothik, esusuduhunai ohothing fodok horimak isong, hoyyu karik homonyong; ethafuthahini athwa nahittok namutha top th’ohothing. ¹¹ Ohobu ajinga dithwa didoryo ohothing hoilongoi, atehu othulo laang iyofo abolongo n’amutha. ¹² ‘Omotte, angai indu iye dine kwong eyofo abongo n’amutha?’ ohobu efiyo inyong. Ti, othulo lya adularu. ¹³ Thiya ohobu anyahi ohoigyemak honyong, ‘Othoratha inyong ahinang karik aheju, ara ithai imirok inyong dindak ditha h’omudwe. Olo de ikor karik erocyo ohala dya,’ ¹⁴ Yesu engohi ocame lonyong, “Elongoi olwarai, anyimuni tiibai.”

¹⁵ Ofarisei ehuhumyo ahwandek dilohuna Yesu th’efietha. ¹⁶ Thiya asulahini ohothifok homok hosong karik ohothing h’elulung no Erode, “Ohoityenani, “ajyori isong, ‘Itek ohoi hijan inyahi iye arami hadiri. Ityenio iye arami hadiri h’ainyong owak Ojok d’ohothing, kwong abangi ainyong igigilo homok, anyo, aang iye ittwo oisukaitha h’othulo lobo.’ ¹⁷ Inyahi ohoi hoi. Ainyong igigilo Iye? Obis dohoi diduma adumetha do Caesare dia awang?”

¹⁸ Otek ti Yesu ainyong namonyong owahi isong ehandyo, ajyo, “Anyo iwak ithai nang athemyo, ithai odwalak! 19 Itaithahina nang anyahuthong ebindang ne!” Thiya Isong hulo eyanu donyong anyahuthong ebindang ne, ¹⁹ Yesu ajyo dosong, “Hangai arijori karik ofure lo? ²⁰ “Ho Caesare,” isong etharangyo. Ahani ne, Yesu etharangyo isong,

²¹ “Oyyu hoi, isarahina do Caesare, asang ho Caesare, ara d’Ojok ithai isarak, asang h’Ojok.” ²² Ethaninguna nasong ahani, afalangai, afwoi adi.

²³ D’ofaning le, afuni Osadducihio homok do Yesu anyahini inyong puhek hijana aang de ohothing hoibuhuni th’oye. ²⁴ “Ohoityenani,” isong ajyori, “Ojyo Musa ara othulo laang okalifinok oye, oruthak olai aharathani, doyisu okalifinok hofuni itehan ara h’ohoyani. ²⁵ Thenene, owoni nya olarok cofa hoisukarik afure n’olai losong, ohoyani. Amutha olai lahong h’aharathani, ti, aye kwong ayisuna okalifonit, edehi aharathani d’olai. ²⁶ Arami hune ikoti afuhi d’olai oitharehe, oithaunihoi karik dicuhit, d’osong cofa. ²⁷ Diholu hosong bukulung, ara athulo nangorwo ne dang aye. ²⁸ Iring na, ofaning lofunerek ohothing de idothorik disu, ara nafure hongai oindu inyong na iwonan, inyong na nathuk isong amuthayo bukulung na.”

²⁹ Yesu etharangyo, ajyo dosong, “Angai beriena ipal ithai! anyo, aang ithai itek Amanini nadwa dia akolon n’Ojok. ³⁰ Aca ara ohoyak hadotho disu, ofuni de ijahitha anjelohio dihide, amaji naang amutha thiya. ³¹ Iring d’ohoyak hofuni de idotho disu: Kabong ithai ihena ainyong onyahi ithai Ojok? Ojyo inyong lo, ³² “Nang Ojok l’Abramo, Ojok lo Isako karik Ojok lo Yakobo.” Inyong lo Ojok l’ohoswok ikara l’ohoyak.” ³³ Ethaninguna n’elulungir ahani, afalangai etyenio nanyong.

³⁴ Ethaninguna n’Ofarisei hijan athuk Yesu ethasingahina Osadducihio, afuni amaji aboithe, ³⁵ ara lobo thosong, ohoityeniani l’oyalu, athemyo endefuna Yesu th’efiiet. ³⁶ “Ohoityenani,” inyong efiyo, “Nani efahit nabolo bebe ditha hoyalu?”

³⁷ Yesu etharangyo, “’Omunoi Ohobu, Ojok lohoi th’othaji tholohoi fodok, th’ohoile tholohoi fodok karik th’ahu thanahoi bukulung.’ ³⁸ Efahit nabolo karik ako bebe inyong na. ³⁹ Efahit etharehe nako bebe, inyong na ahana: ’Omunoi othulo dia athulo naindek dohoi, iring nemunorik iye ahwan nahoi.’ ⁴⁰ Oyano bukulung ho Musa karik h’ohocorok, oduhoi dihide h’efahitha huna arehai.”

⁴¹ Asuduha n’Ofarisei amaji aboithe, Yesu efiyo isong, ⁴² “Ainyong igigilo ithai tho ‘Kristo?’’ Lolonyi hongai inyong?” Isong hulo ajyo donyong, “Lolonyi ho Davide.”

⁴³ Yesu ajyo dosong, “Angai hathi ilongo inyong Davide ditha Ohoile ara Ohobu, ajyo, ⁴⁵ Ara ilongo Davide Kristo‘Hobu,’angai oco Kristo awonan ara olonyi lo Davide?” ⁴⁶ Awang nya othulo locohi esarahina Yesu etharangio nabo; th’ofaning le adi hithemi, aang nya othulo locohi efiyo inyong efietha halwa.