¹ Thiya Yesu acama d’elulungir h’ohothing karik d’ohothifok honyong. ² “Ohoityenak h’oyalu karik Ofarisei, isong ohoinyanyahak h’oyalu lo Musa. ³ Owak iruhu ithai, ithai ithifoitho arami hanyahi isong ithai; hoitmiruna asang hehandyo isong, anyo, aang isong hulo othifoitho asang hetyenio isong. ⁴ Othoryo isong hulo attitto hauk dihurongithek h’ohothing haang ocohi adohoro, isong ti aang hothinok juk ohifalai dingarahina ohothing hodohoitho. ⁵ Ihandyo isong hulo asang hasong fodok, dotehuni isong. Idorotho ekelitha hegiyeuni tha amanini nadwa, isong eyofoithe dihomongithe karik digeleni hosong. ⁶ Idorotho dang, angai ohodori akerebusehio hasong hefificyerek abongoitho dihwandek!’ ⁷ Omunoi amasok halibo d’operok h’amuno karik anyimye okani hathero di Sinagogues. ⁸ Omunoi bebe ara hemandaye th’abangi dimasok h’enyanga, h’ethanyangio karik ara lelongoi “Ohoityenani,” anyo, ithai bukulung h’ahang aboithe nawon “h’Ohoityeniani aboithe.” ⁹ Ithai thaang hoilongoi othulo loboling dihap ara ‘Omonye,’ anyo iwon ithai h’Omonye aboithe dihide. ¹⁰ “Aang dang irahi ilongo ithai ara ‘Lahong’, anyo, lahong lothai loboithe inyong Kristo. ¹¹ Aboithe lobolo bebe dihiji hothai, thoiwona ara ohoigyemani lothai. ¹² Loithaboloryo ahwan, othalauni de; ara loithalau ahwan, ithabolorye de.

¹³ “Omonyong de do ti, dothai, ohoityenak h’oyalu karik Ofarisei! Ithai odwalak! Ehyenok ithat oyihet l’Ohobye lothohide dihithemi h’ohothing; aang ithai ijinga diya karik aang ithai ihorik ohothing homok hothemyo ajingara diya. ^{14 1 15} “Amiehunu ne do de ti, dothai, ohoityenak h’oyalu karik Ofarisei! Ithai odwalak! Idaha ithai ahide n’ahariak hahittwak ara ithai ilangithai amisok bukulung diloithuna othulo aboithe; ara erimak ithai aboithe, ihandyo ithai inyong ara locohi anden di himang operok arehai, iring ithai!

¹⁶ “Angai omonyong dothai, ohoithaithak ongodok! Ityenio ithai, ‘Ara lepitha th’Atemplo, aang epitha nanyong othoryo inyong, ti, ara ipitha lobo th’ayel di Templo, othoryo inyong epitha ne. ¹⁷ Ongodok honanga! Ainyong oko bebe, ayel dia Atemplo nesarak ayel adwaran? ¹⁸ Ityenio ithai dang, “Ara ipitha lobo th’altare, aang epitha hothoryo inyong, ti, ara ipitha lobo th’esorio thonoth’altare, othoryo inyong epitha ne. ¹⁹ Angai ingodo ithai, aang ithai itek! Nani oko thanani, esorio dia altare nesarak esorio adwaran? ²⁰ Inyong nara, ara othulo lepitha th’altari, inyong lepitha thonyong karik thesoritha thahawoni dihide honyong; ²¹ karik ara ipitha othulo th’Atemplo, inyong lepitha thonyong karik th’Ojok lomanya dith’Atemplo; ²² Karik ara ipitha othulo lobo, loipitha th’okara thol’Ojok karik thonyong tholowoni dihide honyong.

²³ “Angai de odiha dothai, ohoityenak h’oyalu karik Ofarisei! Ithai odwalak! Isarak ithai ethatomone n’amiyang nangwo kudarr, asang halibo hedwongoi, asang hamok hangwo kudarr karik asang hamok hayyu bebe, ti, ida ithai athifoitho etyenio nadiri n’oyalu, abisan, amiehina karik eladiri. Owak iyeyena ithai ehandyo ithai asang hune, ara ithai aang hoidehi hamok adi. ²⁴ Ohoithathaithak ongodok! Ipapahyo ithai ohojongathi th’obalu lothai, ara ithai idiloro agodigodi!

²⁵ “Angai de omonyong dothai, ohoityenak h’oyalu karik Ofarisei! Ithai odwalak! Ilalayo ithai oiwohit, oibithi karik attafu tholondak, ahibu tholothwa ithai idehi ifuthi ara asang herimak ithai th’eribo karik hewak ithai dihwandek hathai ti.” ²⁶ “Ofarisei ongodok! Ithai odwalak! Ilalatha oiwohit, oibithi karik attafu tholothwa, dolibori dang tholondak.

²⁷ “Angai de omonyong dothai, ohoityenak h’oyalu karik Ofarisei! Ithai odwalak! Ithai alame abongi, hatehuni tholondak ara aliborok, ti, tholothwa bee hohot karik ahwandek hamuyak. ²⁸ Iring ahani ne dang, tholondak ileyo iye ara loyyu, ti, tholothwa ifut iye thadwala karik theyatha.

²⁹ “Angai beriena de omonyong dothai, ohoityenak h’oyalu karik Ofarisei! Ithai odwalak! Ihuhumyo ithai alame h’ohocorok ara ekikiricyo alame h’ohothing hamanya amanya nayyu; ³⁰ karik ara ithai ijyo, ara nya ira ithai imanya d’orii lonya h’ohohonyo hothai lo, aang ithai ira ihandyo asang hanya ehandyo isong, iring attohoro nasong ohocorok. ³¹ Iring na, eruhok ithai diri hijan attohori ohohonyo hothai ohocorok. ³² Ifwatha ahithemi hathi hoi, dingohina aning nanya aculuyo holethe hohonyi! ³³ Ithai oduring haduring h’amunuok karik amunuok, angai de ikaru ithai amiro dith’ahimang? ³⁴ Karik inyong na, anyahi nang ithai hijan asulak nang de ithai ohocorok, ohothing hoilofioro karik ohoityenak; ifuni ithai de ittohoro homok hosong, homok abihohini dikruce, homok afodohye di Sinangogues karik angaterek th’obore di bore. ³⁵ Diholu h’ehandio ahani ne, oindu de asario nattohoro n’ohothing hokabong ihandyo aning namonyong dihide hothai, th’attohoro n’Abele lokabong ihandyo aning namonyong d’attohoro no lolonyi ho Zakaria lo Berakiah loittohok ithai dihiji Atemplo karik altare. ³⁶ Anyahi nang ithai diri: oindu de asario n’attohoro nabolo ahani ne, ipwaharu dihide h’ohothing h’ofaning lahanana!

³⁷ “Yerusalem, Yerusalem! Iye nettoho ohocorok ara iye imiryo th’omorik ohoifahak hathuk Ojok asulahina dohoi! Operok baya awak nang iye thosuduhu disuhe okalifinok hohoi bukulung, iring nasuduhyerek ahohorong angarok tholohop h’ewa hanyong, ti, aang iye nya iwak! ³⁸ Karik ahani ne, ofuni de idehina, ara Atemplo nahoi esuka ija. ³⁹ Th’ahanana adihithemi, anyahi nang ithai, aang ithai ifunu nang itehuna ikoti, lwai ithai ajyaran, “Loindu th’ofure thol’Ohobu, thomunoi.’”