¹ Yesu edyaharu Atemplo, alo adi. Afuni ohothifok honyong ithayuhina inyong arami h’athwahio h’Atemplo haduhoi. ² Yesu etharangyo, ajyo dosong, “Aang ithai itehu asang hune fodok? Anyahi nang dothai diri, aang de idehini omorwong lobo dihide holobo, aang lobo de laang omiro dihap,”

³ Awoniara nya no Yesu th’ahap di donge h’Olifs, afuni ohothifok honyong honyong donyong ajyori, “Inyahi ohoi, kanu de ofuni asang hune ifuhon karik inyong de oindu ithaithahina ainduna nahoi karik ecuhit n’oper?”

⁴ Yesu etharangyo, ajyo dosong, “Omijyethek tuhudik, tek ithadiraru lobo othulo ithai dipalan. ⁵ Aca ofuni de holwa th’ofure tholo hindang. Ofuni de ijaran, “Ang Kristo,” afuni ithaitharu ohothing d’oyihoi lepal. ⁶ Ifunu ithai de ithaninguna oikoitha h’aremi karik assayo h’aremi olamarai, ti, hoitaluhothik, aang asang hune opwak afuhon, aang onyahi hijan athuk ecuhit n’ahap ainduna. ⁷ Oremorik de amisok ahwandek, ohobyehio aremorik ohobyehio karik owoni de ahure karik arithirithihio d’amasok bukulung. ⁸ Ojahitha asang hune bukulung adihari n’othomone l’oitho, laitho. ⁹ “Thiya, ofuni ithai de indefuna, ethafothohini thosarye karik attohori ithai. Omani ithai de amisok bukulung thonang. ¹⁰ Th’orii le ofuni de holwa edehina eruho nasong, ofuni de ithanyangyo karik angicarik ahwandek. ¹¹ Thiya, ofuni de ohocorok hoikela ileyori karik attumye ohothing holwa. ¹² Esarahunu de n’amonyori mwai nya doindu, ara amuno n’ohothing holwa alo ilihan. ¹³ Ti, lowetha dindak lwai dicuhit, ithalwahunu de. ¹⁴ Karik ofuni de ityenio Assayo Angejuho h’Ohbye dihap bukulung dinyahinerek amisok fodok; thiya, oindu de ecuhit iinduna.

¹⁵ “Itehu ithai de ‘Abangi Namonyong bebe’ nacama ohocoroni Daniele. Oindu de iwetha d’amaji nadwa.” ¹⁶ Thiya, owak ongerori ohothing hotho Judea di dongiok. ¹⁷ Othulo lowon dihide h’efithe n’athwa nanyong, thaang igigiloi ecuruna dihap diinduna iduduhyo attitto hanyong diyaru dithwa. ¹⁸ Othulo lowon dimana, thaang honyahu di hang diyaru abongo n’ahathero. ¹⁹ Angai de oindu imonyori operok hule d’angorwo hemoho karik d’ahathingie hethanahyo! ²⁰ Omojyithik d’Ojok ithai thaang ofunu ingetha th’Ohomio dia d’Ofaning lo Dominika!” ²¹ Aca ethathaciana th’orii le oindu de imonyori okalu ethathaciana nanya nakaang howonderek thoculwe h’ahap, teng ofaning lahanan. ²² Ara kabong nya oprok hule ofuni ithasuhyo, aang nya othulo loira thalwahunu. Ti, th’arami th’arami thoh’ohothing honyimuni, ofuni de ithasuhyo oeprok hule. Arahari ara afuni ithasuhyo omiru hule, inyong de naindu aning nabo aangan iwonan iring inyong. ²³ Thiya, ara indu othulo lobo ijaran dothai, “Omijye, Kristo lo dini!’ Dia, “Otiha, inyong lo lad’ahtwahio hotholothwa, hoiruk inyong. ²⁴ Aca ofuni de ho Kristo karik ohocorok hoikela ileyori; ofuni de ihandyo asang hafalangai hahittwak dithadwalyerek juk ohothing honyimuni h’Ojok, ara ocohi. ²⁵ Otihatha, athuk nang ithai anyahina arami hune kabong omiru ofuni. ²⁶ Inyong na, ara ojyori dohoi, ‘Otiha, Inyong lo diterere!’ hoilo diterere!’ Dia ara ojyori isong, ‘Otiha, inyong lo loditha athwahio hotholothwa huna!’ Hoiruk inyong. ²⁷ Aca oindu de Olonyi l’Othulo iinduna irng ahila nenwahyo edoo fodok, thomoithe thoittorit di lumet h’oholong. ²⁸ Amaji nawonderek ahwan naye, diya osuduha de atharuha.

²⁹ Kwak diholu h’ethathacianitha h’operok hule, oindu de oholong irioriohunu, oyefa aang ofang, ohilyefi apwahaitho thohide karik ara asuduhetha h’akolon hothohide angaterek adi thoyihothik hoigyemarik isong. ³⁰ Thiya, ethamijani l’Olonyi l’Othulo aindu ileyori didoo; ara ohothing hothop fodok afuni ikoron, atehuna nasong Olonyi l’Othulo oindu dihide h’adikolo h’ahide th’akolon karik abolori nahittok. ³¹ Oindu de amo nahittok ikor karik ara aindu isulahina ohothai anjelohio honyong d’okangir h’ahap arangwan, karik ofuni de isuduhyo ohothing honyimuni th’ecuhit n’ahap aboithe danabo.

³² Ohiyani lohittok longida ahayo, thoityenie ithai, etyenio. Ara athandak hanyong haliji, aculuye esaryo abene, etek ithai hijan aindek Ohiribo. ³³ Ahani de dang, ara ithai hetehu asang hune fodok, itek ithai de hijan anyihari omiru; eririye aculuyo eririyo. ³⁴ Hoikwothik hijan ofuni de asang hune ifuhon dihithemi athuhon n’ohothing hulya fodok afuna aye. ³⁵ Ofwoi de ahide karik ahap adi, ti, owetha de ocame hindang. ³⁶ Aang othulo lotek kanu de oindu ofaning dia omiru hule dia anjelohio dia Olonyi, aang otehi omiru, Omonye hamaring otek. ³⁷ Oindu de ainduna n’Olonyi l’Othulo ijahitha ainyong ofuk d’orii lo Noah. ³⁸ Dihithemi h’omiru h’ahari hadilyo hune afuna, anye, amathai karik amuthai ohothing lwai d’orii loicurohinerek Noah di roko; ³⁹ dihide ahani ne, aang ohothing hotek ainyong nalo ifuhon, lwai ahari afuna afiyarai isong fodok adi. Ahani de oindu iwonan, ara Olonyi l’Othulo laindu. ⁴⁰ D’omiru hule ofuni de ohothing arehai igyema di mana: ofuni de iyaru aboithe, edehini aboithe; ⁴¹ Ofuni de angorwo iwonan dihirye, ofuni de iyaru aboithe adi, ara aboithe edehini diholu; ⁴² “Omijyethek tuhudik, hoi, anyo, aang ithai itek tuhudik kanu de oindu Ohobu. ⁴³ Ara otek lomonye h’ahang omiru hoindunerek ohoholani diwuryo ahang nanyong, itek iye tuhudik hijan isuka inyong lo de thahide tek ohoholani aindu iwuryo ahang nayong. ⁴⁴ Inyong na, ihuhumye dang ahwan, anyo, oindu de Olonyi l’Othulo d’omiru haang iye itek ainduna nanyong.

⁴⁵ “Ngai, hathi de, ohoigyemani loiruk karik elofioro lya? Inyong lo othulo lathuk lahong lonyong esarahina thoindafaithe ohoigyemak honyong, disarak dosong anyari nasong d’omiru hocohi. ⁴⁶ Angai de omuno ohoigyemani lya, ara orimak lahong lonyong inyong ihandyo asang hune, ara inyong laindu di hang! ⁴⁷ Diri, anyahi nang ithai, isarak de lahong inyong thoindafaithe attitto hanyong fodok. ⁴⁸ Ti, ara inyong ohoigyemani lomonyong, oindu de inyahina ahwan nanyong hijan aang de lahong onyahu dihang diholu h’omiru holwa. ⁴⁹ oindu de obocoro abahyo ohoigyemak honyong, anyo anyari karik amatha h’ohoibothok. ⁵⁰ Thiya, oindu de lahong l’ohoigyemani lya iinduna ofaning lobo, laang ohoigyemani otek hijan inyong de loindu; th’omiru hule aang inyong lo otek. ⁵¹ Oindu de inyong lahong ibobongyo, eringak inyong thongaru oyetha omonyorok odwalak. Diya, oindu de ikor erocyo ohala.