¹ D’orii le, oindu de ohobye lotho hide ijahitha ahana ahodwo hamok tomon, heyaru arie h’ahimang ne thauleye th’omudwe orii l’etharama, afwoi d’ohoitharamani. ² Th’ahodwo hune fodok tomon, obafuni miyet. Ara miyet ahong. ³ Anyo, afwan n’ahodwo habafuni hune, eyaru arie hawang owulo di maji h’etharam. ⁴ Ahibu ahodwo ahongok huna iyaru arie hacohi karik hawulo. ⁵ Orii lya, akarahi ohoitharamani. Ara ahodwo emuthitha, ajothoroi. ⁶ Dihiji h’oharie, edwong oililye karik ocame, “Ohoitharamani leedwong! Ifuna di fothuna inyong.

⁷ Ahodwo tomon huna kwak ahenyuni; ethauleye arie hasong. ⁸ Ahodwo habafuni efiyo th’ahodwo ahongok huna arie hamok haulo.

⁹ Ara ahodwo ahongok huna ajyori, “Awang arie hahoi ocohini. Ifwatha inyangahina ahwandek arie hacohi karik haulo.' ¹⁰ Hofwo ahodwo abami hune dinyangunu arie haulo ahani, ahibu ahoitharamani edwong.

¹¹ Th’orii lya, emoraru ahodwo miyet ahongok huna karik ohoitharamani. Afwoi di mutha; ehienoroi oyihiet.

¹² Orii tiibai ahani, edwongi ahodwo miyet abami huna, efiye ohoitharamani th’ongahi isong oyihiet. ¹³ “A a! Awang nang ithai atek,” ohoitharamani etharangak isong.

¹⁴ Yesu engohi ocame lonyong lya th’ajaran, “Omijethek tuhidik! Awang ithai itek ofaning dia omiru.” Orijoro ohobye lothohide iring othulo lolo d’amiji nabo dipoco. Ilongu esarak d’ohogyemak honyong ebarithi hanyong. ¹⁵ Isarak do lobo ebarithi miyet; ara d’etharehe esarak areha; ara d’ethaunihoi esarak aboithe. Ifothu aboithe th’ohegyemak hulya ara hacohi donyong, ara ohoithagyemani alo di poco. ¹⁶ Ara ohegyemani lefothu ebarithi miyet, eyaru hanyong huna di thayocyo, arimak hamok miyet dihide hohune. ¹⁷ Lefothu ebarithi arehai lo dang alo ihandyo ahani. Arimak ebarithi hamok arehai dihide h’arehai huna. ¹⁸ Ohegyemani lefothu ebarit aboithe lo, alo inuhania aboithe nanyong na dihap. ¹⁹ Diholu h’operok holwa, anyahu ohoithagyemani tho poco, efiyo ohegyemak honyong tho nyahi ainyong ehandyo isong. ²⁰ Eyanu ohegyemani lefothu ebarithi miyet lo hahamok diya miyet. Ajyo,

²¹ Lahong lonyong ajyo donyong, “Egyema iye tuhudik, ohoigyemani loyyu eruhu iye arami! Eruhu iye ara iye iiyinik egyema asang hattik. Esarak nang iye de thoindafaithe asang hahitwak. Iwon olenga ohobye hindang.

²² "Ohoigyemani dang lefothu ebarithi arehai th’ohoithagyemani lonyong lo, anyahi lahong lonyong, ajyo, Lahong hindang, esarak iye do nang ebarithi arehai. Idoro, arimak nang hamok dihide hohwa arehai.’

²³ "Ohoithagyemani ajyo donyong, Egyema iye tuhudik, ohoigyemani loyyu eruhu arami! Eruhu iye ara iye iiyinik egyema asang hattik. Esarak nang iye de thendafaithe asang hahitwak. Iwon olenga ohobye hindang.

²⁴ Ohoigyema lefothu ebarit aboithe lo aindu, ajyo, “Lahong hindang, atek nang iye othulo leririk bebe. Ingongoco iye dith’amana nakabong iye iromo ara iye iyehi ohinyomo diya. ²⁵ Abang nang. Inyong nalo nang inuhahina ebarit nahoi aboithe na dihap. Ibe ebarit nahoi.’

²⁶ Ara ohoithagyemani etharang inyong ajyo donyong, “Iye ohegyemani omonyoroni karik ofathani. Itek iye hijan engongoco nang dith’amana nakabong nang aromo, nang ayehi ohinyomo diya. ²⁷ Ira iye nya isarahina ebarithi hundang hune d’ohoindefak h’akoni h’ebarithi; dara nya kodien anyahuna hindang era nang irumahina ayothoi. ²⁸ Hajak ahani hune, iduhuna ebarit aboithe ne adi thonyong, ara ithai isarak do lara ebarithi hanyong tomon lya. ²⁹ D’ othulo lowon h’ebarithi olwarai, ofonihini de halwa donyong. Ara d’othulo lomutha ebarithi hanyong, juk tiibai hune eduhuni de adi thonyong. ³⁰ Omirohina ohoigyemani lofyaha dignwai dimudwe, amaji n’ekor herocio n’ohala.

³¹ Ara mwai Olonyi l’Othulo laindu th’abolori h’anjelohio honyong, oindu de iwoni dikara honyong h’abolori. ³² Ofuni mwai ohothing h’amisok isuduha dihithemi honyong, ekelyo ohothing, iring nekelyerek ohoyohoni akero dinget, anyimot dihotong. ³³ Ikelak mwai akero dinget honyong, anyimot dihotong honyong. ³⁴ Oindu de Ohobu ijaran d’ohothing hotho inget honyong, “Ifuna, ithai hathuk Lalamonye aboroyo, Iyatik ohobye lonya ehuhumahini ithai thoculwe h’ahap. ³⁵ Aleng nang nya ahure, ara ithai isarak nang anyari. Nang ebotho ahibothit, ara ithai iasarak nang ahari h’amathai. Alo nang nya di misok, awang amaji tho nang, ara ithai ilongu nang dithwa. ³⁶ Adaha nang nya iluluyai, ara ithai nang ithayofyo. Adiha nang, nang efitha nya, ara ithai ifunu nang ittihyo, ara ithai imijyo di put honang.’

³⁷ Ohothing hobis afuni ijaran donyong, “Hobu, kanu nya, itehu ohoi iye h’ahure, ara ohoi iyeisarak iye anyari, h’ahibothit, ohoi isarak iye ahari hamathai? ³⁸ Kanu nya iwon iye ara othohomononi, ohoi iye isarak amaji; kanu nya idaha iye iluluyai ohoi iye ithayofyo? ³⁹ Kanu nya idiha iye, iye ifitha, ara ohoi ifwo iye idoryo karik ara ohoi imijyo diput hohoi?’

⁴⁰ Ara Ohobu aindu itharang isong, ajyo, “Diri, anyahi nang dothai, aning nehandyo ithai d’aboithe lotti th’olarok hundang hulya, donang ihandyo ithai.” ⁴¹ Ohobu aindu ijaran d’ohothing hotho ihotong, “Ifwatha adi thonang, ithai hathuhi ecyenahina, ditha h’ahimang namanya mak, nanya athuhi ehuhumahina do Sitan ho anjelohyo honyong, ⁴² Anyo, aleng nang nya ahure, kabong ithai nang isarak anyari, nang ebotho ahibothit, kabong ithai nang isarak ahari h’amathai. ⁴³ Alo nang nya di poco, kabong ithai nang ilongu di hang; nang adaha iluluyai, kabong ithai nang ithayofyo; nang adiha karik nang efitha, kabong ithai nang ifwo idoryo karik kabong ithai nang ifwo idoryo karik imijyo diput honang.’

⁴⁴ Isong dang afuni itharang ajyori, “Hobu, kanu nya, itehu ohoi iye h’ahure, h’ahibothit, kwong amaji, iluluyai, h’adiha akrik difitha, ara ohoi awang iye ilwahyo?”

⁴⁵ Ohobu aindu itharang isong ajyo, “Diri ajo nang dothai, aning nakabong ithai ihandyo d’aboithe do lotti th’olarok hundang hulya, kabong ithai ihandyo do nang.’ ⁴⁶ Ofwo de ohothing hulya d’abahio namanya mak; ara ohobisak afwo d’esu namanya mak.”