¹ Aindu nya iwonan, engohina no Yesu ocamitha lonyong, ajyo, “D’ohothifok honyong, ² “Itek ithai hijan diholu h’operok arehai owon de ofaning l’amuno; ofaning le lofunere de ibehohinere Olonyi l’Othulo di kruce.”

³ Ohoithamojok hohitwa karik ohobolok h’ohothing asuduhai di hang h’ohoithamojoni lohitto, Kaifas. ⁴ Owak isong hulo th’ahap th’ahap ijan otohori Yesu. ⁵ Otehi hijan are otoho isong Yesu d’ofaning l’amuno, ingere de ohothing etharohoje esuka.”

⁶ Ofaning le orimak Yesu di Bethani, dihang ho Simone l’atalulu, ⁷ di nyari, aindu athulo nabo h’ehulo n’elethang, abuhok di hu ho Yesu. ⁸ Atehuna n’ohothifok ho Yesu arami hune, engereji, ajori, “aisong arami hetharohojerek elethang ne ija ahani? ⁹ Irahi ilwahyere ohoicanak.”

¹⁰ Yesu, dihide atehan arami hune ajo dosong, “Ainyong nathai nad’athulo ne? Ehandyo aning nalibo bebe do nang. ¹¹ Ithai h’ohoicanak imanya; awang de isuka hothai fuur. ¹² Abuhohina elethang di hu honang, orijoro iring n’anuhio hindang. ¹³ Diri anyahi nang ithai, amaji nepurarri evanjelyo ne di hap, iihi de ohothing aning nehandyo athulo ne do nang.

¹⁴ Loboling th’ohothifok honyong, lelongoi ara Yuda Iskariot, alo d’ohoithamojok hohitwa, ¹⁵ ajo dosong, “Ainyong isarak ithai nang ara ethafothok nang dothai Yesu?” Esarak isong hulo enyahwo othomona aunihoi arakang. ¹⁶ D’orii le, othifeyo Yuda oyihoi lethanyangahinerek inyong Yesu.

¹⁷ D’ofaning ohoithemoni l’anyari n’ofaning l’amuno, afuni ohothifok ho Yesu ajori donyong, “Dingai de efwo inyo anyari n’ofaning l’amuno?”

¹⁸ Ajo dosong, “Ifwatha di bore d’othulo lodiya; ijaratha donyong ojo “Ohoithayeyenani’’ “Aindek omiru hundang; alo nang inyo ofaning l’amuno h’ohothifok hundang di hang hohoi.” ¹⁹ Ehandyo ohothifok iring nanyahinere isong Yesu, ehuhumye anyari n’ofaning l’amuno.

²⁰ Edwongon n’athari owoni Yesu h’ohothifok honyong tomon h’arehai di nyari ofaning l’amuno. ²¹ Dihide h’anyari, ajo Yesu, “Diri diri ajo nang dothai lobo thothai lolo nang ithanyangahina.” 2

²² Adiha n’othaja hosong bebe, bebe, diri. Atangahini efifiyo ahwandek ajori abok abok do Yesu, “Ikara do ti nang, Hobu?”

²³ Yesu etharang, “Lesarak ahinang nanyong honang dibithi lya, inyong de lya lethanyangak nang lo.” ²⁴ Olo de Olonyi l’Othulo, iring nathuhi egeryere thonyong. Ti, omonyo de d’othulo lethanyangyo Olonyi l’Othulo lya! Ira nya iyiji ara kabong nya kodyen hoiyisun inyongi.

²⁵ Yuda, lethanyangak de Yesu lo ajo, “Nang re Ohoithayeyenani?” Yesu ajo donyong, “Ethuk iye olefeng ajan.”

²⁶ Dihide anyari nasong, eduhu Yesu angiryang, oboroyo, apinyo. Esarak dosong, ajo, “Ibethina, onyethe. Ahwan hindang ne.” ²⁷ Eduhu oihutye, ajyo ihum, esarak dosong, ajyo, “Omathathi, ithai fodok. ²⁸ ahotho hindang ne n’emora angejuk, nabuhohini de th’ohothing olwarai, dihohinere eyatha. ²⁹ Ti, ajyo nang dothai, awang nang h’amatha th’ahayo h’ohiyani lya, lwai d’ofaning lefunere imathari dang di hobye ha Lalamonye.”

³⁰ Athuhon nasong edolo oyele, ajinguni dindak afwoi di donge h’Olif. ³¹ Diya, Yesu ajo dosong, “Engero ithai de fodok adi tho nang th’aharye. Anyo athuk egero, “Abak nang de ohoyohoni, ara akero athuroro.’ ³² Ti, diholu ethadothuna honang, alo nang de ahithemi hothai di Galilea.”

³³ Peter ajo do Yesu, “Juk ongero ohothing fodok thohoi, awang nang edehi iye.”

³⁴ Yesu ajo do Petro, “Anyahi nang iye arami hadiri, do oteng l’amoithe, kabong ohohorong hoisir, irisa iye nang de operok aunihoi.”

³⁵ Petro ajo do Yesu, “Juk owon ara aye do nang, awang nang iye arisa.” Ohothifok ho Yesu fodok ajori ahani.

³⁶ Yesu alo d’amaji nelongoi ara Gethsemane, ajo d’ohothifok honyong, “Owoniyara dini nang lahalo di mojo.” ³⁷ Yesu eyaru honyong Petro h’oduring arahai ho Zebedeyo; othaji lo Yesu aboco adihari th’ethathaciana. ³⁸ Ajyo d’ohothifok honyong, “Odiha ethathaciana n’othaji hindang lwai diiye. Ithilauna dini. Iririyethe ainyong naindu.” ³⁹ Ehuthohina no Yesu tiibai ahani, apwaharu ahomong adihap, amojyo, “Lalamonye, ara ocohi kodien, iyaru ethathacana ne adi thonang. Ti, ikara iring awak nang. Aning newak iye thoihandye.” ⁴⁰ Yesu anyahu d’ohothifok hong. Orimak athuhi ajothoro; ajo do Petro, “Anyo ti, awang ocohi dothai ethilahina honang juk orii tiibai? ⁴¹ Omijethe tuhudik ahibu ithai imojyo tek ithai ethadwalye. Atek nang, oko ohoile, ahibu ahwan ilik.” ⁴² Yesu anyaha di mojyo. Ajyo, “Lalamonye, ara owon oyihoi lekarahinerek awangan hindang ethathaciana, aning newak iye th’ehandye.” ⁴³ Anyahu koti. Oindu irimahina ohothifok honyong d’ajoo. ⁴⁴ Anden adi edyaharu isong koti, alo di mojyo operohothi oithaunihoi. Enyoryo Yesu Ocame lonyong. ⁴⁵ Aindu ajyo d’ohothifok honyong, “Ithai hodiferi h’ayiri? Idorotho, Anyiha orii, Olonyi l’Othulo lofwoi ithanyangahina d’ohoiyak. ⁴⁶ Odothothik. Hafatha. Aindek ohoithanyangani hindang.”

⁴⁷ Kabong Yesu ingohi ocame, edwong Yuda Iskariot, oithatomone h’areha l’ohothifok, edwong. Oindu h’elulung nahittok n’ohothing th’ohoithamojok hohitwak karik hahong h’ohothing. Ofuni h’odemio karik oinduhi. ⁴⁸ Anyahi othulo lolo ithanyangahina Yesu lo elulung angai olo inyong ithaithahina Yesu dosong hijan, “Othulo le mandayo nang, inyong lya. Indefuna inyong.” ⁴⁹ Kwak, aindu do Yesu, ajyo, “Tekka, ohoithayeyenani!” Emandayo inyong.

⁵⁰ Yesu ajyo donyong, “Omotte, ihandye aning newak iye.” Aindu elulung. Endafaitho Yesu. ⁵¹ Diya, lobo th’ohothifok ho Yesu, ahethu odemi esalu ehiyok n’ohoigyemani l’ohoithamojoni lohittok. ⁵² 52 Yesu ajyo donyong, “Inyahak odemi di maji honyong. Ohothing hoilademi, oyethi de th’odemi.’ ⁵³ Igigilo iye awang nang hoira ilongo Lalamonye; era isulahina nang elulungir h‘anjelohio tholohide ho tomon h’arehai? ⁵⁴ Angai ira arami h’adwa hathuk egero ifuna iwonan?” ⁵⁵ D’orii le Yesu ajyo d’elulung n’ohothing, “Ifunu ithai h’oinduhi h’odemyo dindafaitho nang iring ohoholani? Nang hothai di Tempolo dithayeyenio, anyo nawang ithai nang indafaitho? ⁵⁶ Ti, owon arami hune d’ofuni arami h’ohocorok ileyori.”

⁵⁷ Athuhon nasong endefuna Yesu, eyarai inyong do Kaifas, ohoithamojoni lohittok. Diya, orimak ohoigerok h’ohobolok disuduha. ⁵⁸ Diyaru Yesu do Kaifas, othiforo Petro ahibu inyong ingengekaru isong olamarai. ⁵⁹ Othifeyo th’orii le ohoithamojok hohitwak karik asuduhe nahittok n’ohobolok arami hepal ditohyere Yesu. ⁶⁰ Awang h’orimahini, juk ithemyo iye angai. Diholu h’arami hune fodok afuni homok ohothing arehai, ajyori othulo lya, ⁶¹ ‘Ocohi do nang disuluyahahini athwa n’Ojok, ara nang aduho, nang ethaiweji d’operok aunihoi.”

⁶² Ohoithamojoni lohittok adotho, ajyo do nyong, “Awang etharangio nahoi? Anyo ocama isong arami hamonyong hune tho iye?” ⁶³ Odularu Yesu. Ohoithamojoni lohittok ajyo donyong, “Anyahi nang dohoi th’ofure thol’Ojok lesu, inyahi ohoi, iye Kristo, Olonyi l’Ojok?”

⁶⁴ Yesu etharang inyong, “Ethuk iye ajaran iye olefeng. Ti, anyahi nang dohoi, th’orii lya adihithemi, itehu iye de Olonyi l’Othulo owoni dinget h’akolon, aindu dihide h’adikolo hotho hide.”

⁶⁵ Ohoithamojoni lohittok ariit alyenyi hotho hwan hanyong, ajyo, “Athuk acama arami h’amonyong heda Ojok, ajyo, “Ara asang hamonyo hajak angai iwak ithai. Idorotho, ethairu ithai arami hamonyong d’Ojok. ⁶⁶ Ainyong igigilo ithai?” Isong etharangi ajyori, “Ocohi h’aye.” ⁶⁷ Isong hulo amico ahamilak di homong ho Yesu, anangye inyong. Ajyori, ⁶⁸ “Onyahi sede ohoi, iye Kristo. Ngai lobak iye lya?”

⁶⁹ Omiru hulya orimak Petro owoni di fwata, ahodwothi negyema diya efiyo inyong, “Iye do nya ho Yesu di Galilea.”

⁷⁰ Arisa Petro dihithemi h’ohothing fodok, ajyo, “Awang nang atek ainyong icama iye.”

⁷¹ Anden nanyong dingwai dihuthuk oyihyet, ahodwothi nabo negyema atehu inyong, ajyo d’ohothing fodok howon diya, “Owon nya onde lya d’ohothifok ho Yesu la Nazaret.”

⁷² Petro arisa koti th’epit, “Awang nang etek othulo lya.”

⁷³ Omiru tiibai ahani afuni ohothing hoindek diya koko, ajyori do Petro, “Diri iye lobo th’ohothifok ho Yesu. Oleyo th’ocame lohoi.”

⁷⁴ Aboco Petro aculuyo afecyo th’epithahina ahwan th’epit. Kwak ahani ohohorong esir.

⁷⁵ Eyuna no Petro ocame lo Yesu donyong, lojyo. “Dihithemi h’esir n’ohohorong, irisa iye nang de operok aunihoi.” Alo dindak, diyambaritha ekor.